استراحة عمنا الكبير الشاعر (صلاح جاهين)

[&& اشكوزا &&]

طـــــــــــــــــــــــرزان

يوم الخميس ،
و اللب ، و الأحلام ، فى كيس
طروان بيغطس فى الهويس .
طرزان جدع ،
طرزان شديد ،
دراعه أجمد م الحديد .
قزقزت نث اللب ، هاه ...
طرزان بيصرخ : عا عا عاه ...
خنق الأسد ،
طحن الدماغ ، عجن الجسد ..
قرقشت باقى اللب ، من غير قزقزه ،
طرزان صرخ قال : عا عا عاه ...
صرخت انا كمان وراه .

و لما قال لشيتا : يا امه زغرطى ...
وحط رجله ع التعيس ، فوق التراب ،
حطيت معاه رجلى ، بدون جزمه و شراب ،
و رسمت بعيون الخيال ، بدل السد ،
محمود أَفندى حسين ... مدرس حساب !

[&& اشكوزا &&]

عيون البقـــــــــــــــر

الزجل ده غزل فى عيون البقر ،
يا حلاوة عيونه الوساع ! ..
ما فيهاش و لا نقطة ضياع ،
فيها ليل ، بس من غير سهر ...
فيها بحر غويط ،
فيها صبر عبيط ،
زى صبر الشجر !
يا حلاوة عيون البقر
شعرا شبهوا عيون حريمهم بها ،
و نا شاعر ، و له واحده بيحبها ...
إنما يستحيل !..
سيبنا م الشعرا ،
احنا ناس فقرا ،
و اللى يعشق فتاه ، فيها م البقرة .
يبقى لمؤاخذة تور !

[&& اشكوزا &&]

روز نبــــــــــــــــــــــرج

فى الرواية الأمريكانية .... العصابة
تقتل اللى تخاف ليفتن للنيابة
الزعيم يأمر بسحبه جوه غابه
و الرصاص يعمل عزومه للديابه
أصله كان يعرف حاجات فوق اللزوم
و القتيل عمره ما ينطق أَو يقوم .. !
و العصابة المريكية العالمية ...
مش بتسرق ميّه و الا خمسميه
لأَ .. دى بتقشّط شعوب م الانسانيه
و السلاح ذره و قنابل ميكروبيه
و اللى ييضح جرايمها يتقتل
زى روزنبرج و مراته إتل
الوليفه يقتلوها و الوليف
لجل ما يموت السلام فوق الرصيف
السلام حلم الشعوب كابوس مخيف
للى بيبيعوا السلاح قبل الرغيف
و القضاه فى الخدمه يا ايزنهور
كلهم فى إيدين فخامتكم كور
يحكموا حسب القانون و انت القانون
اللى حاكم ع البلاد تصبح سجون
الدولار يملا الحافظ و البون
و الدموع تملا الحناجر و العيون
و السلوك يتوهجوا مره فى مره
لجل ما تموت نفس كانت عايشه حره
الشعوب مشيت حزينه فى الشوارع
و المكن نام جنب عمال المصانع
لما وقفوا للحداد بعد الفظايع
اللى روزنبرج شافها و هو راجع
للعدم ... فى نهاية الفصل النهائى
م الرواية ... على كرسى كهربائى
كل قوة فى الطبيعه يقتلو بها
كهربا و ذره و غيرها يبتلو بها
الشعوب فى كل يوم و يمثَّلو بها
و الشعوب قوتها مخزونه ف قلوبها
للسنابل و المناحل و الزهور
لما يفنَى الظلم و المكن يدور
المكن حايدور و حايدور بانتظام
لجل ما الانسان يعيش حر بسلام
و السما حايسدها جيش الحمام
فوق أَراضى مصر و جبال فيتنام
و ف أَمريكا نفسها و الناس تقول
إن روزنبرج عايش على طول
مايو أو يونيو 1953

[&& اشكوزا &&]

سلم التطــــــــــور

فى البدء خالص ، كنا سردينفى البحور ،
لقيناها بايخه ف حقنا .
صرنا سحالى ، بجناحات زى الطيور ،
دايرين نلقط رزقنا ،
طحلب و دود ...
و دود و طحلب ، كل يوم ف بقنا ،
شئ مش تمام !
طب نبقى ايه ؟ ... قال لك : قرود !
أصبحنا يا مبارك ، قرود ...
برضك زهقنا ، و ايه بأَه ؟
أَهو ليل نهار غلب و شقا ..
أَين المفر؟!
أَنا عندى حل معتبر ..
نبقى غَجَر !

[&& اشكوزا &&]

سكــــــــس أبيل

عطشان يا صبايا ... دلونى على السبيل
فى قلبي ولعه قايده ... من كتر ( السكسابييل )
شكل الصبايا يهبل ... فى لبس المناطيل
رحت لحكيم يداوى ... نار القلب العليل
فتح الكتاب و قال لى ... عندك عقدة خليل
و خليل ده كان عجلاتى ... فى رب المهابيل
اللى قال الكلام ده ... أستاذ عالم جليل
اسمه فاريد و لازم ... نعمل لك تحاليل
يا بهيه و خبرينى ... ع اللى قتل القتيل
قتلوه السود عيونك ... واللا الهَم التقيل
و احكم يا قاضى المحاكم ... بالعدل و الدليل
قال : اللى جيبه فاضى ... ممنوع يشق جميل

[&& اشكوزا &&]

فى النـــــــــــــــــادى

أولادى ،
كان نفسى يتشقلبوا فى الشمس قصادى ،
و نا قاعد كده و مبلَّم ، فى مكان هادى ،
و مراتى معاها شنطة ، و فيها شطائر ...
آكل ، و رامى الفتافيت للطائر ...
و ف حجر مراتى دماغى تميل ،
أحلم لى حلم جميل ،
حلم بتاع أيها بنى آدم عادى ...

عندى صاحب ، جِن ،
تًتّه يزن ،
النادى .. النادى .. النادى ..
حادى بادى ، سيدى محمد البغدادى ،
و انضمينا لنادى

يا ولادى ...
فين انتم ؟ ويّا أصحابنا يا دادى !
فين ماما ؟
فاتت م الناحيادى !
و اللحظة فين اللى اقعد فيها و ابلَّم ؟
مقدرش يا فندم ..
فيه واحد جنبى ، كان بنكير ، و اتأمم ،
و مصمم ،
يتكلم ،
فى الوضع الاقتصادى .. !

[&& اشكوزا &&]

فى الجنــــــــــــة

ابريق دهب
و مخّده من ريش النعام ...
تشرب سيادتك ، تنجِعص آخر غرام ،
ترفع عينيك تلاقى منجه مدلدله ،
و فاكهه ياما ، متلتله
أصناف من اللى الكيلو مش عارف بكام ،
منجه ، و فراوله ، و موز ، و تفاح يا وله ،
و خوخ و برقوق م التمام ...
ياللعجب ،
البرتقان ويا العنب ،
فى غصن واحد ... يا سلام
جلا جلا ، يَا محترم جلا جلا .
كل الأمور متسهله .
تطلب حواجب نمل ، و الا قلوب دبب ،
تحضر ، بسرعة مذهله ،
ما عليكش إلا بس تفضل تشتهى ،
تطلب و تطلب فى حاجات لا تنتهى
كله يجاب ،
ما هى جنه طبعا يا مهاب ...
لكن مافيش غير بس شئ واحد وحيد
لو تطلبه ، لا يستجاب ...
انك تعوز تخرج من السور الحديد .

[&& اشكوزا &&]

فــــــــــــــزورة

حزَّر فزّر .. واحد ( مِستر ) ،
يصحى من النوم و شّه مزنهر ،
يشرب ( فيتامين ) قبل ما يفطر
يفطر زبده ، و فينو مَقمّر ،
و مربّه ، و بيض بكذا محمّر ،
ثم القهوه لجل يعمّر
ثم لبانه ، ثم يعفَّر ،
ثم يقوم لك كده يتمخطر ،
يكبش أوراق لونهم أخضر
أكوام أكوام ، آخر منظر ..
يملا جيوبه ، و يمشى يفنجر ،
يركب (كاديلاك ) طالعه تزمجر ،
يشرب ( ويسكى ) ملو الأنجر ...
و لا عنده هموم ، و لا متعكر ،
و ف حضرتنا مش بيفكر ،
و إن جت سيره ، لا يتذكر ،
أصله ف نفسه ، و مش متبحّر ،
و لا يعجبهوش اللىن لاسمّر ،
غير فى البدله لما بيسهر
... إنما خفه ، و دمه سكر ،
مين بقى هوه ؟ .. مش راح أفسر ،
واضح جدا .. حزّر .. فزّر .

[&& اشكوزا &&]

فى ايطـــــــــــاليا

فى ايطاليا ( فينوس ) بتبيع ( بونبون ) .
فى ايطاليا ( أبو للو ) واقف جون .
فى ايطاليا ملايكه .. و فيها العكس .

فى ايطاليا مستودع تماثيل ..
مرمر ، و برونز ، و بشريه ..
كونتات ، بارونات من أصل نبيل ،
ماشيين ، بمرمح أثرية ...

أعاجيب فى إيطاليا كتير تِلحس
بس الأَعجب ايه تتصور ؟
فى إيطاليا كمان ( ملكة اليزابث ) ...
بس الملكة اليزابيث تايلر

[&& اشكوزا &&]

فنجان قهــــــــــــــــــوة

قمت النهاردة الصبح منحرف المزاج
خانقت دبانوشى و شتمته فى سرى و ابتسمت
أنا أصلى لو هاجرت كان حصل انبعاج
فكتمت حلق البير بغطاه الشهير ثم انكتمت

عيل فى سن المدرسة قاللى : يا حاج
و أنا زرت بيت الله لكن ما اسميش كده
و وليه حبلى قالتها تانى .. عقلى وج ..
أنا مسيو كيت و كيت يا سيدة
لابس مثقف زى توفيق الحكيم
ببيريه و تلفيحة
أفوت بشكل سليم فرنسى صميم
آخد (كافيه) فى (سان ميشيل) فى باريس على الريحة
و اسرح و اهيم ورا كل تسريحة

و لما فقت من الهيام
لقيتنى واقع يا حرام
فى مقلب الزبالة و الدبان أمم
يتددوا لى بدفء مصرى و يقولولى
قوم يا حاج
ما يقع غير الشاطر يا حاج
و ألف ألف سلامة ليك ...
يا عم الحاج .