بيجى علينا اوقات بنبقى مخنوقين من كل حاجه حوالينا
وبنضطر نشتم فى احلى بلد فى الدنيا مبعفيش نفسى من الحكاية دى
لكن لما بسئل نفسى هل انا فعلا اقصد اشتم الارض الى عيشت حياتى بحلوها وبمرها عليها
هل انا بالجحود ده عشان اشتم وانقم على اجمل بلد فى الدنيا وناس كتير من بلاد تايه يتمنو يكونوا مصريين؟
انا اتعميت مثلا ومبشوفش الاف العقليات المشرفه الى شرفتنا بره والعباقره الى لغايه دلوقتى بيظهروا رغم كل الظروف السيئه دى؟
لا طبعا قطع لسان اى حد يغلط فى احلى بلد فى الدنيا وانا بجد بفتخر انى مصرى
يعنى انا بحب الارض الى اتربيت عليها يبقى انا بشتم مين ؟؟؟
مش عايز اجاوب على السؤال ده لان اجابته هتبقى عامله زى النقطه السوده فى صفحه بيضا الى عايز يعرف اجابته مش محتاج يفكر
عشان كده انا هقول على الحاجات الى بحبها فى بلدى( اشخاص, اماكن, طقوس)
بحب اتمشى على كوبرى قصر النيل الساعه 4 الفجر
بحب جامعه القاهره قوى مع انى مش فيها بس بحبها لما بروح اشوف صحابى وبحس انها رمز لمصر زي البرج والاهرامات
بحب عمرو دياب واحب اسمع اغنيه محمد قنديل بين شاطين وميه بالذات لما بسافر اسكندريه على شاطىء ميامى وفى شارع خالد ابن الوليد وانا ماشى
وكل المحلات مشغلاهم بيبقى فى طعم خاص كده للاغنيه غير الى انت خدت عليه حتى لو اغنيه قديمه قوى
بتحس انك اول مره تسمعها
بحب شله طفولتى البريئة والشيطانيه فى ذات نفس الوقت اول مبقابل
حد منهم لازم يرجع فلاش باك للمصايب الى كنا بنعملها واحنا صغيرين وكانت من احلى الايام
بحب اصلى فى جامع الحسين ديما فى رمضان واكل رز بلبن من الملكى
بحب منتخب مصر قوى (منتخب الساجدين)
بحب كشرى ابوطارق حب السنيين لانه احلى كشرى فى مصر
وكمان وصل العالميه (صاحبه ابتدى بعربيه ولغايه دلوقتى راجل غلبان وبجلابيه وبسيط ومحبوب قوى )
بحب شاطىء ميامى قوى وبحب اسكندريه بشكل عام كلها
بحب اطبق لتانى يوم عشان انزل بدرى واقف على احلى عربيه فول فيكى يامصر
بحب شهر رمضان طبعا فى مصر وروحانياتو الجميله والشوارع المنورة والزينة بجد وحشنى قوى
\
بحب القهاوى المصرية وناس عواجيز قاعدين عليها بيلعبوا طاوله او اى لعبه
بحب هدوء شوراع وشواطىء وليل مرسى مطروح قوى
بحب اجرى بسرعه فى شوارع مصر فى عز الزحمه وانا مكتسب موهبه سلاحف النينجا فى تفادى خبط الناس :D
بحب المترو : ودى وسيله موصلاتى من سنين بقى فى حب بينا وتفاهم
بحب صباح اى عيد سواء الكبير او الصغير وبحب قوى صلاه العيد
واقوم اضرب الجلابية وانزل مع ابويا وجدى واخواتى نصلى
بحب فصل الشتاء فى مصر اوى اوى
بحب لما اروح متأخر وادخل الاقى والدتى مستنيانى وهى مبتسمه احساس امان وحب مفيش بعده
بحب اى حد شرف مصر بره ورفع اسمها
وبحبداء فى ميدان التحريرنصب تذكارى تخليداً للشهداء فى ميدان التحرير
السبت، 12 فبراير 2011 - 19:30
بحب كل اساتذتى الى علمونى حاجات كتير قوى من صغرى وبجد بشكركم
لو قعدت اكتب من هنا للصبح على الحاجات الى بحبها فى بلدى ايديا هتدوب من كتر الكتابه وبرضو مش هخلصها
ومظنش ان فى حد بيكره البلد الى اتولد فيها محدش يكرها ياجماعه هى ملهاش ذنب بلدنا جميله جدا من حقنا نكره النقطه السوده بس
لكن الارض مظنش والله بلدنا حلوه واكبر من اى حقد لحاقد وكره اى حد
المفضلات