حارة عم سعد (اوبريت غنائي) الفقرة الأولي

**&& اشكوزا &&** · 09-12-2009, 05:24 AM

**الحــــكاواتــي**
كان ياما كان
ياسعد يا اكرام
ولا يحلي الكلام
الا بذكر النبي
عليه الصلاة والسلام
**الجــمــهــور**
عليه الصلاة والسلام
**الحــكــاواتــي**
النهاردة انا جاي احكيلكوا
حكاية عجيبة
من حكايات الف خيبة وخيبة
حكاية قديمة وازلية
مش للتهريج
ولا للتسلية
مش مستني الأجر عليها
ولا عايز منكم نقدية
**الجــمــهــور**
يالا بسرعة
قول ايه هي
واحنا معاك راح نسمع فيها
ان شالله لحد الصبحية

**الحــكاواتــي**

حاجة وعشرين ساكن
لكن
مختلفين
رغم الجيرة
ورغم العشرة
ورغم الدين
كل حارات الدنيا
اتحدوا
وصبحم وحدة
الا الحارة داهي ياخوانا
متباعدين
نفسي في مرة يكونوا حبايب
ادعوا معايا وقولوا امين

**الجــمــهــور**
أمــــيـــن

يالا بسرعة اوام احكيلنا
اسم الحارة ومين سكانها
شوقتنا والله ياعمو
واحنا معاك قاعدين علشانها

**الحــكــاواتــي**

سكان حارة عم سعد
عمرهم ماحبوا بعض
كل واحد ليه حياته
وكل يوم بيزيدوا بُعد
******
اللي ساكن قصر عالي
واللي طالع في العلالي
واللي بيقَضي الليالي
بالونات وعطور وورد
*******
اللي عايش خافي صوته
لا العيال م الجوع يموتوا
والديابة واكلة قوته
وهو عايش تحت الأرض
*******
واللي فاكر نفسه حاجة
وإنه فاهم كل حاجة
ومطاطيها للخواجة
وبسذاجة عايشها قِرد
******
واللي عامل فيها فارس
وانه عارف وانه دارس
وانه هو لوحده حارس
ومش شايف في رجولته حد
********
واللي داره معادش داره
واللي واكل حق جاره
واللي غرقان في انهياره
ومحدش بيلاقي حد
*******
واللي عامل الف غارة
لأنه حاسس بالمرارة
ونفسه يسكن اي حارة
الا حارة عم سعد

** الجــمــهــور**
كمل كمل
ساكت ليه
دي حكاية جميلة مسلية

** الحــكــاواتــي**

الباقي حاكيلكوا عليه
ونكمل في الحلقة الجاية

فاصل ونواصل