استعداداتك (ماذا فعلت كي تقابل هذا الشهر الكريم)؟
والله كل اللي عملته اني قلت كل سنة وانت طيب لكل شخص قريب مني مش أكتر من كدا لاني مضغوط جدا في الشغل.؟(بس الصراحة نفسي أرجع زي زمان أيام لما كنا نتجمع كلنا في مدخل حد من جيراننا ونبدأ نعمل زينة رمضان ونعلقها,ونفسي أبويا برجع يسحبني زي زمان من ايدي ونزور كل قرايبنا)
* لكل شخص طبق مفضل لديه ما هو طبقك المفضل.؟
المكرونة بجميع أنواعها (مكرونة بالصلصة,مكرونة بشاميل,مكرونة باللحمة المفرومة,مكرونة مسلوقة)
*مشروبك المفضل.؟
في رمضان اللبن بالبلح (وطبعا بحب أكسر البلح بايديا مش حد تاني يعمله) أما في الأيام العادية مدمن نسكافية.
*ماذا تفعل بشكل اساسي ويومي في شهر رمضان.؟
بحاول اني أقرأ في المصحف علي قد ما أقدر سواء في الشغل أو المواصلات أو البيت دا الشئ الاساسي وطبعا بقية اليوم جزء منه في الشغل والباقي نايم.
*شي لا يجب الاستغناء عنه خلال شهر رمضان.؟
السواك والمصحف الشريف
*عند تثبيت شهر رمضان واعلان ان يوم غد اول ايام رمضان ماذا يكون احساسك؟
بحس بأيام زمان أيام الخير والبركة
*اشخاص تتمني ان تتناول معهم افطار رمضان؟
جدي(الله يرحمه)
* ما هي اضافتك لمائدة الافطار بالمنزل؟
بناول الأطباق وبصب المشروبات في أكواب وبكسر البلح مش أكتر من كدا
* ماذا تفضل (الافطار بالمنزل او مع الاصدقاء)؟
مفيش أحلي من لمة البيت والأسرة كفاية بس انك تلاقي والدك بيدعيلك ووالدتك وجدتك والناس اللي انت بتحبهم ويفتحو نفسك عالأكل
* تمت دعوتك الي مائدة الجيم فلاش الرمضانية ماذ ستحضر معك؟
(بسبوسة) لان في ناس حبايبي عندهم محل وبيتوصو بية فدي تعتبر هدية متواضعة وجميلة لاخواني
* ما هي عادات وتقاليد اهل المنطقة في رمضان والاكلات المفضله..؟
الصراحة مش عارف لاني منقول للبيت الجديد من 5 سنين وساكن في الدور الرابع وماليش خلطه بالجيران فمش عارف هما ايه عاداتهم
* مواقف جميله مرت بك وانت صائم؟
في موقف جميل قوي كل ما أفتكره أحس ان الدنيا لسة فيها خير,في واحد جالي المحل مرة زبون زي أي زبون كان عنده مشكلة في عدته المهم المشكلة كانت بسيطة فتحتله العده وعملتهاله ومرضتشي أحاسبه لأنه شكله راجل طيب وأنا استريحتله, فيشاء السميع العليم اني في يوم من أيام رمضان كنت واقف تايه قبل الفطار بساعة مستني أي عربية توديني لحد الموقف ومكنتش لاقي خالص عربيات بس الحمد لله فجأه لاقيت الراجل دا قدامي بيسلم عليا وبيسألني انت واقف هنا ليه فقلتله اني مش لاقي عربيه وعايز اروح الموقف عشان أروح افطر مع جدتي فنادالي واحد من اللي شغالين معاه وركبني معاه المكنه(الموتوسيكل)ووصلني لحد الموقف ووانا راكب ورا الأخ دا افتكرت جملة كان والدي بيقولهالي علي طول (العمل الصالح هينفعك في الدنيا وفي الاخره) سبحان الله كأن ربنا سخرهولي مخصوص انه يبقي واقف هنا في نفس المكان دا ويشوفني وفي رمضان كمان مش أي يوم تاني ويبعت حد يوصلني فالحمد لله لسة في ناس كويسة وفيها الخير.
* ماذا تتمني في شهر رمضان المعظم؟
ان ربنا يغفرلي كل ذنوبي وذنوب المسلمين ويهدينا يارب
* بماذا تبداء فطورك؟
بالتمر واللبن بالبلح
* اتي اليك اعز صديق في رمضان ماذا تقدم له عند الافطار؟
طبعا رمضان كله خير والأكل في رمضان بيبقي له مذاق خاص ونكهة مميزه بس أكيد يعني هأكله مكرونه(هوا طبعا هيشوف نفسي مفتوح عالاكل وخاصة اني بحب المكرونة فان شاء الله نفسه هوا كمان هتتفتح عالمكرونة,او ممكن يكون مضطر انه ياكلها هوا ونصيبه)
* احساسك والعيد
صلة الرحم ومتعتها دا الاحساس والشعور الوحيد اللي بحسه وهو البهجة والسعاده والحب والطمأنينه والخير والأمل وكل شعور كويس في الدنيا بحس بيه لما أشوف قرايبي وأسلم عليهم وأزورهم ويزوروني
*نصيحة رمضانيه لرواد الموضوع
عليكم بالقران الكريم في هذا الشهر المبارك
*كلمة اخيرة في حق هذا الشهر العظيم
صومو تصحو
المفضلات