كل سنة وأنتم طيبين جميعاً
وحشتوني جداً جداً
النهاردة جايبلكم موضوع جديد عبارة عن قصة حقيقية ودة الجزء الأول منها (بناء على طلب اخويا وحبيبي تهامي)


ودلوقتي مع الجزء الاول



محروس شاب منياوي أسمر كان في أول العشرينات من عمره ، كان قصير ونحيف وحرف الراء عنده مُفَخَّم بطريقة لذيذة جداً.كان أول شاب قابلته أول ماروحت الكتيبة بتاعتي .اتصاحبنا جداً وكنا طول الوقت مع بعض .كان دايما ينادي عليا ويقوللي (يابو جاد) بتعطيش الجيم وعمره ما قالي يا احمد لأنه كان أصغر مني . محروس كان حلاق في قريته لكن كان مخبي علي الكتيبة كلها الموضوع دة ما عدا أنا وكام واحد من أصحابنا القريبين مننا لأن أصحاب الحرف بيتعبوا جداً في الجيش وكان خايف يبعتوله مثلاً عشان يحلق لقائد اللواء وبعدين قائد اللواء ماتعجبهوش الحلاقة يروح باعته ع السجن . محروس كان عارف إني مش بعرف أحلق دقني وعشان كدة كان متطوع يحلقلي دقني في السر .... كنّا نجيب كوباية شاي وسيجارة ونخَمِّس فيهم مع بعض وهو بيحلق لي كنّا عساكر بقى وبنكح تراب .... مع الوقت وعشان أنا وهو دايماً مع بعض وهو قصير جداً وانا طويل جداً أطلقوا عليه (الواد محروس ابن احمد جاد) وكل ماحد يشوفني يقوللي ابنك فين وكل ما محروس يعمل حاجة لحد يقوله انا هقول لأبوك

الله يمسيك بالخير ياحورس
الى اللقاء مع الجزء التاني.