.gif)
رمضـــــان ( أنوار دنيتنا و آخرتنا )
رمضان
و النفحة السنوية
فوانيس بتزين دنيتنا
الشهر التاسع فى حسابنا
و الأول فى حساب عبادتنا
بنعود و نكمل لمتنا
و الرحمة اللى بتملى بيوتنا
بكار رغم الأشواق صمم
انه يعيش بس فى طفولتنا
موبينيل بتلحنلنا روحنا
و خواطر بيصحى طموحنا
أحمد مكى بكل أدواره
بيأكد على صوت ضحكتنا
بيبسى و كوكاكولا بتلهمنا
و الذكر يزين فى كلامنا
أفشات بتزغزغ أيامنا
و كنافة تزغزغ معدتنا
و قطايف غرقت شربات
ع الفيس بيكرروا فى الأفشات
و العركة فى أول يوم دايما
محجوزة ما بين الميكروباصات
رامز تلفان بس مهَيبر
مصطفى شعبان نفخ مقرر
ماتجوم تتطمن على أكلك
الريق الناشف يشفعلك
و التمر على الريق ينفعلك
و الفرض بسبعين أو أكتر
غادة و هيفاء كتر خيرهم
لزما نتشرف بظهورهم
خروب فى الشارع و موائد
و صلاة التراويح فى القائد
و سحور خجلان انه مكرر
خجولين ننكر فضله العائد
قرآن الفجر يريحنا
و يطبطب على حزن جروحنا
و الدعوة فى وقت الفطر تمللى
تلخص أوجع ما فى روحنا
النور يتجمع فى عيوننا
و بياض ألسنة الصايمين
و فى آخر عَشرة بنتعشم
يغفر تقصير أول عشرين
نتمسك فى أواخر النفحة
و بواقى لأشواق شايلينها
لوشوش واحشانا و واحشينها
عن ليلة القدر و تخمينها
و دموع بتأمم صلواتنا
رمضان و النفحة السنوية
أنوار دنيتنا و آخرتنا
لـــ
المبدع نبيل محمد
رد مع اقتباس
.gif)
المفضلات