سبع نصايح لتجنب الموت المفاجئ

[3llam]

سبع نصايح لتجنب الموت المفاجئ :


1- عقلك محسوب عليك
عمرك محتاج لـ قلب
هتشوفها بغير عينيك
الذكرى في كل جنب
البنت الأولى ليك
البنت التانية ذنب


2- استعجل كل ذرة
اتأخر كل مرة
الحجج الفارغة ياما
إن راحوا هيجي غيرهم
معظم أولاد الناس
المحترمين مواعيدهم
ماماتوش على سرايرهم



3 - كتر التفكير في الجنة
بيضيع معنى النار
خلدك إجبار في الآخرة
في الدنيا الخلد قرار



4- لو كانلك نقطة ضعف
أحسن خليهم اتنين
الشئ لو زاد للضعف
الحمل عليه بـ يلين
وقت الفتنة فيه طريق
و الحق مالوش فريقين
أخرج كل أما تضيق
ماتعرفهمش لـ فين
الشرقيين أمثالنا
إجابتهم تبدأ ( هل )
- ذكروا الشهوة في أمثالنا ؟
- ( هل ) كات أيامهم خل ؟
أهالينا اتكسفوا يقولوا :
( الجنس ساعات الحل )



5- ازهد لم الفلوس
و ازهد جمع الصحاب
اتدارى في الحضور
تظهر وقت الغياب
قلل مـ النوم و الثورة
و القهوة و قفل الباب
صدق أمك و امبارح
و النشرة إن قالوا ضباب


6- القلق فردي
الفراق حزبي
التاريخ مَرضي
مـ النصيب حاسبي
كذّبي غيري
صدقي كذبي
فين خطوط سيري ؟
- نظرتي بـ تسبي ؟!
- الوجع ثابت
و الجمال نسبي



7-اتصاحب يوم عـ الموت
و إن قرب مرة اتفاجئ
طول ما العلاقات عكسية
فيه واحد منكم لاجئ
يمكن تحتاجه في يوم ؟
يمكن أسهل من النوم ؟
نقطة ضعفك بتخافه
مع إن ماحدش شافه
مش كل الشوف فيه مرارة
فـجأة بتقلب بزيارة ..
‘‘ أب ‘‘ لأيتام و ملاجئ
نقطة قوته يا مغفل
كون إنه تملي مفاجئ






الشاعر محمد عاطف

[ALIGHRIB]

قال الله تعالى

{وَلِكُلِّ أُمَّةٍ أَجَلٌ فَإِذَا جَاء أَجَلُهُمْ لاَ يَسْتَأْخِرُونَ سَاعَةً وَلاَ يَسْتَقْدِمُونَ }الأعراف34

[LYON]

ونعمه بالله
بس النصيحة مقبولة يا أخي
وأعلام أن الأعمار بيد لله
الف شكر علام

[raouf_ra3]

كلمات جميلة ياعلام

[Mohamed ashour]

سلمت يداك علام
انتقاء متميز