الشرخ الأول دايماً
اللى هيظهر فى مرايتك
هيجر الباقي وراه

والفتلة الفاضلة فى ياقتك
هتبهدل بالطو سيادتك
وتكُرُّه لحد قفاه

معرفتش قولة ياه
غير بعد ما شفت بعيني
كورة التلج بتتدحرج
ومحدش حاسس بيها
واللى سابوها ف أولها
أول ناس جم تحتيها

ف عرفت إن الدخان
اللى إستعمانى زمان
مطلعش سحابه وكان
عقب سجاره مطفيها
وكان قايد من جواه

وبمحض الصدفة البحتة
قصاقيص صورتِك كات لسه
متفضّل منهم حتة
جوه الطقطوقه معاه

والشرخ الأول دايماً
بيجرّ الباقي وراه
والفتلة الفاضلة ف ياقتك
هتكُرُّ التوب
لقفاه