بلد كان اسمها مصر

[3llam]

30سنة فساد
لم يهان شيخ أو كاهن 30 سنة فساد ولم ينتهك حرمات الموتى فى جنائزها
30 سنة فساد
ومصر لم تفتقر وتتسول هكذا

30 سنة فساد
وكنا بنضحك ونخرج ونتبسط ونغنى لمصر

30 سنة فساد
لم يقتل فيها عدد ماقتل فى عامين النكسة

30 سنة فساد
ولم يقتل على مدارهم 16 جندى مصرى فى رمضان

30سنة فساد لم تحاصر الكتدرائية المرقسية والمقر البابوي

30 سنة فساد
والقضاء كان محترم وشامخ بشهادة العالم

30 سنة فساد
والدولار ثابت أخر عشر سنين

30 سنة فساد
وكان عندنا سياحة وصناعة وتجارة وزراعة

30 سنة فساد
وكان فى أمن وأمان وحب وسلام

30 سنة فساد
وكان فى دولة أسمها مصر

30 سنة فساد
وعندكم جيش بتفتخروا بيه وسط العالم كله

فى كام شهر راحت فيهم بلد


كانت أسمها مصر



بكره هنسمع عن مصر الشماليه والجنوبيه
التقسيم قادم مثل السودان والعراق وحاليا فى سوريا

[السخاوى]

حسبى الله ونعم الوكيل

ولكن عندى يقين بأن الغمه أوشكت ان تنزاااااح


قريبا جدا جدا


ولن تكون نهاية مصر

ستكون نهاية كل خبثاااااااااااااء مصر

[ابوكنزى]

مصر موجوده و هتفضل موجوده
مفيش حاجه اسمها كان
فى حاجه اسمها انننا بنمر بظروف صعبه
و ان شاء الله هنعديها و نمر المرحله الصعبه ديه
و مش عايزين ننسا انه من غير ثوره و من زمان اوى
و ناس كتير كانت بتقول انه هتقوم فى مصر ثوره مجاعه
و ان فى ناس كتير فى مصر تحت مستوى الفقر
مش عايزين ننسى انه و لا كان فى تعليم و لا علاج و لا شغل و لا وظيفه
انا متفق معاك فى حاجات كتير اوى
لكن لازم تعرف ان العيب فينا احنا
انا فاكر مقوله للشيخ محمد حسان
بيقول ان الثوره اظهرت احسن ما فينا لكنها ايضا اخرجت اسؤ ما فينا

[salah.egypt]

الازهر يتحاصر عااااااااااااااااااااادى جدا
كنيسه تتحاصر عااااااااااااااااااادى جدا
مكتب الارشاد لالالالالالالالالالالا طبعا وقوات امن بالالاف
مرحبا بكم فى دوله تجار الدين وارباب السجون

[ashraf77160]

30سنة فساد
لم يهان شيخ أو كاهن 30 سنة فساد ولم ينتهك حرمات الموتى فى جنائزها
كأنك مش مصري و لا شوفت و لا سمعت عن اهانة و حبس مئات المشايخ
من كلاب أمن الدوله عبر عشرات السنين
30 سنة فساد
ومصر لم تفتقر وتتسول هكذا

30 سنة فساد
وكنا بنضحك ونخرج ونتبسط ونغنى لمصر

30 سنة فساد
لم يقتل فيها عدد ماقتل فى عامين النكسة

أي ثوره في الدنيا تقوم علي نظام فاسد لازم يحصل كده من نظامها القديم و المستفيدين و كمان الناس التي لا تخاف الله و تخاف السلطه فقط
30 سنة فساد
ولم يقتل على مدارهم 16 جندى مصرى فى رمضان

لاء يا أخي الكريم سبق و اتقتل مباشرة جنود مصريين في عهد المخلوع بالمئات و من ضمنهم واحد زميلي و لكن مكنش حد بيفتح فمه و لا حتي أهل المقتول و ربنا يفضح الي عمل كده في جنودنا دنيا و آخره30سنة فساد لم تحاصر الكتدرائية المرقسية والمقر البابوي

30 سنة فساد
والقضاء كان محترم وشامخ بشهادة العالم

لو كان محترم و شامخ مكنش حصل لنا كده من الاول دا بداية النكسه مذبحة القضاء و تعيين قضاه بالواسطه و تابعين للنظام مع احترامنا للشرفاء

خد مثال واحد مكنتش أحب أحكيه

حمايا الله يرحمه اتقتل أيام القضاء الشامخ أمام بلد بأكملها من قبل عائله تستولي علي أراضي الناس بالقوه فتصدي لهم رغم كبر سنه فقتلوه فأخذ القاتل 3 سنين حبس و خرج بعد سنتين لظروف صحيه

سلم لي علي الشموخ أصل وحشني جدا
30 سنة فساد
والدولار ثابت أخر عشر سنين

عندك حق في دي و لكن نشوف مين السبب بجد و مين الي طير مليارات الدولارات في مده قصيره بدل ما نرمي الحمل علي الي استلم الاحتياطي قليل و حافظ عليه في 6 شهور

30 سنة فساد
وكان عندنا سياحة وصناعة وتجارة وزراعة

و الحمد لله ما زالت موجوده و تتعافي و في زياده بفضل الله بسبب الشرفاء و المخلصين في حب هذه البلد و هم كثر

30 سنة فساد
وكان فى أمن وأمان وحب وسلام

30 سنة فساد
وكان فى دولة أسمها مصر

و مازالت يا بوب

30 سنة فساد
وعندكم جيش بتفتخروا بيه وسط العالم كله

و ما زلنا نفتخر بيه بفضل الله لما تم اختيار قياده منه مخلصه تسعي لرفع كفائته

فى كام شهر راحت فيهم بلد


كانت أسمها مصر



بكره هنسمع عن مصر الشماليه والجنوبيه
التقسيم قادم مثل السودان والعراق وحاليا فى سوريا

لو سمحت برجاء حذف السطر الاخير لان هذا لن يكون أبدا باذن الله الا علي جثثنا

لو حضرتك متابع و عرفت أخبار طريق السودان البري لفهمت أشياء كثيره و بعد كل انجاز لازم تلاقي فسده يعكروا علينا عشيتنا فبلاش غضبنا يخلينا نقول أشياء غير راضيين عليها

مع كل الاحترام و التقدير

[salah.egypt]

ashraf77160
فوق بقى من اللى انتا فيه
انتا مفكر ان الاستبن اللى مش عارف كلمتين ينفع رئيس جمعيه
كفاكم تبرير ضيعتوا البلد وضيعتونا معاكم
وبتطلب من علام يمسح السطر الاخير ليه
هيا الحقيقه بتوجع والطريق المجهول اللى مشينا فيه الاخوانجيه تجار الدين
وايه حكايه جثثكم دى . لا تقلق وان حدث ذلك من اجل بقاء العصابه والمنافقين فى السلطه
سيأتيك التكليف من القياده بتجاهل ذلك وسنجد المبرون فى كل مكان وكل ميديا
ارحمونا يرحمكم الله

[محمد السيد.]

يااخ صلاح كل واحد حر فى رأيه
اشرف شايف كده وانت شايف عكسه لا داعى للخروج عن قوانين المنتدى


ملحوظه بمناسبة الموضوع
مصر ستقف على اقدامها مره اخرى ان شاء الله
برغم شفشقيات الكوز المخروم
طبعا عارفين انا بتكلم عن مين

[salah.egypt]

برغم شفشقيات الكوز المخروم
طبعا عارفين انا بتكلم عن مين

المشكله ان فى ناس لسه بتتعامل بماضى انتهى ورحل
وتركت الواقع الاسود الذى نعيشه بسبب تأيدهم للباطل

[محمد السيد.]

انت شايفه باطل
غيرك شايف مش باطل
ولا تحجر على رأى احد