للي خايفين ع البلد لحسن تموت
متخافوش ، الموت سكوت
وإحنا مش في الخطة أصلاً إن بكرة يكون سكوت
إحنا شايلين حلمنا ومكملين
بكرة بيشاور علينا وإحنا مش مستعجلين
ما إحنا لينا كام سنة متقندلين
صابحين في طين ، نايمين في طين
إحنا بنأسس بلد تسمع شكاوى المظلومين
نشتغل نلقى عرقنا قصاد عنينا مش في جيب النصابين
نشتكي نلقى اللي يسمع شكوة الناس الغلابة الطيبين
إحنا بنأسس بلد لا هي خايفة من صوت الآذان
ولا خايفة من إن الكنايس تتبني
إحنا بنأسس وطن عفيان غني
مش وطن يخدم خماستاشر نفر ويبات جعان
إحنا مش عايزين وطن مذلول مهان
المصري مش لايقة عليه كلمة مهان !
هشام الجخ ... مكملين
المفضلات