تعبتينى

**raouf_ra3** · 16-10-2012, 12:11 AM

انا عارف ان الكلام تقيل وغلس وممكن مايعجبش ناس كتير بس دة انا وانا حسيت البلد كدة مع اضراباتها واعتصاماتها
فمتزعلوش منى

كرهتك يابلد
تعبت من فقرك
وتعبت من قرفك
وزهقت من فنك
وزهقت من فزع اهلك
سنين عملالى قال طرشة
وعمال انا اندهلك
وتعبت اغنيلك وزهقت انا ديلك
وبقيتى ديل الامم وبقيت انا ديلك
وتعبت اشتكى منك
اوحتى اشكيلك
وكرهت الوانك واشكالك
وكرهت معركتك وإشكالك
وكرهت لبيرالك
وكرهت من طلق لحية
وعمل علامة ولا ناسك
وكرهت انا ناسك
وكرهت احساسك
وكرهت طميك
وطينك
وكرهت انا فاسك
وانسى انى كنت فى يوم
فى ديل عشقك انا ماسك
وكرهت دهبك
اللى مش طايله
وكرهت انا ماسك
وكرهت نفسى

وكرهت حراسك

ملعون ابوكى يابلد
تعبتينى
ملكتى الروح والدم
وغصبا عنى ملكتينى
طب ليه فى ضلمة عمرى سبتينى
وعلى دماغى عمالة تدينى
هوة انتى مبسوطة ؟
فرحانة ؟
قصدك تذلينى ؟
انا نفسى احس فى يوم بالحنان فيكى
اعاتبك
اقوللك كرهتك
اقوللك ظلمتينى
تمدى ايديكى على خدى
تشيلى الدمعة من عينى
تهدينى انا المقهور منك
تصالحينى
تضمينى
وعلى صدرك
ترسينى

raouf
12 اكتوبر2012

**mohamed allam** · 16-10-2012, 01:12 AM

تفائل خيرا اخى

**Mohamed ashour** · 17-10-2012, 10:36 PM

جميله أخي العزيز
بس تفائل خير
وان شاء الله اللي جاي احلي

**احمد مشعل** · 17-10-2012, 10:43 PM

علي رأي الشاعر هشام الرميحي

ادي جامد يامحمود علشان جامد ماأخدش .

**&& اشكوزا &&** · 17-10-2012, 10:45 PM

الله
جميلة جدا
ولاسف مش قادر اقولك تفائل خير

**smsm342** · 18-10-2012, 01:24 AM

اخي اطلب الخير تجده وقال الله انا عند ظن عبدي بي
وكلا يري بعينة واسف علي الجملة الاخيره

**السخاوى** · 18-10-2012, 10:04 AM

مفيش تفاؤل يابوب

وعلى رأى الشاعر سلعوه صاحبى

أدى جامد عشان جامد لسه جاى

ههههههههههههه

**raouf_ra3** · 18-10-2012, 05:07 PM

شكرا على المرور ياشباب
ومعلش انا نوهت الاول ان الكلام ممكن يكون غلس
بس اهه اللى بحسة بكتبه
وعلى رأى الشاعر بينا وبين البلد دى علاقة حب وكره
وربنا يستر