تعالوا نتناقش بهدؤ ليه فى ناس اختارت شفيق ؟؟؟

[ابوكنزى]

تعالوا نتناقش بهدؤ ليه فى ناس اختارت شفيق ؟؟؟

ممكن كل واحد يتكلم من وجهه نظرة و يوضح
ليه فى ناس اختارت شفيق
هو صحيح ممكن يكون الناس معجبهاش الحريه
و لا الحياه بكرامه
و ان فى ناس اتعودت على العبوديه و الذل
و لا ايه الموضوع
ممكن نتكلم مع بعض بهدوء
و نحاول نفهم ليه الناس مش عايزة التغيير
لان اكيد كل واحد فينا يعرف حد من اللى اختار احمد شفيق
و اكيد ساله انت ليه اخترت احمد شفيق



هكون اول واحد يشارك
و هقول رأيى بصراحه
الموضوع له عدة اسباب
طبعا هتكلم على الناس اللى اختارت شفيق

اولا ان الثوار نفسهم زودوها حبتين
كل جمعه مليونيه
كل حاجه اعتصام
و كمان حكايه وزارة الدفاع حسست الناس انه لازم يكون رئيس
من العهد السابق عشان يقدر يسيطر على حاله الفوضه
الموجودة فى الشارع المصرى
تانى حاجه ان معظم الاقباط فى مصر كانوا مع اختيار احمد شفيق
و دة لسبب ان الاعلام صور ان الاسلاميين لو مسكوا الحكم
هيسبب مشاكل كتير للاقباط
سبب اخر ان كل المرشحين هاجموا العسكرى
و للاسف ديه غلطه كبيرة
لان اى راجل عسكرى لو ملوش حق الانتخاب
لكن له اسرة و معظم اسر العسكريين
اعطوا صوتهم لاحمد شفيق
غير ان كثرة الاعتصامات و المليونيات اثر بالسلب
على المواطن العادى اللى بياكل اكل عيشه يوم بيوم
و الناس كرهة المليونيات
و كمان كرهة وقف الحال

سبب اخر ان اسلوب شباب الثوره كان غير مقنع لكبار السن
او بالبلدى كان فيه تطاول و قله ادب
يعنى كل واحد مختلف معاهم يبقى فلول
كل واحد يعارض يبقى خاين للثوره

اختيار ميدان التحرير لرئيس وزراء فاشل بمعنى الكلمه
رئيس ضعيف اوحى للناس ان اى اختيار اخر من الثوار
سوف يؤدى الى مزيد من الفوضى

اسف على الاطاله
و ان الموضوع مش منسق
لكنه كلام من القلب
و ارجو اننا نتناقش بهدؤ
و نحاول نكسب الناس ديه و نفهم بعض و بعد كده نفهمهم

[ELMASRY.7000]

موضوع رائع فعلا أبو كنزي
وفعلا الواحد محتاج يقف وقفة صادقة مع النفس

أنا عن نفسي لا يهمني مين هيكون الرئيس
كل المهم بالنسبة لي
إن الناس تلاقي الخبز والغاز ووسائل الحياة بسهولة وكرامة
وكرامة الناس لا تهان فى أقسام الشرطة

ساعتها لو كان الرئيس مهما كان أنا معه

الناس العاقلين دايما عاوزين يعيشوا فى هدوء وإستقرار
ولو أحمد شفيق ذكي من بكرة يطلع ويطمن الناس إلي خايفة منه ويوعدهم بصدق أنه ناوي على التغيير
ممكن يكون في أمل
لأنه من المستحيل أنه الشعب هيتفق على إسم واحد
إحنا زهقنا من التشتت والإنقسامات
الناس عاوزة تعيش وتاكل عيش
معظم الشعب ملوش في السياسة وقرفها
تعرف أن نسبة التصويت 50% يعنى نص عدد الناخبيين لم يذهبوا مش
فارقه معاهم الناس زهقت فعلا

وربنا يختار لنا الأحسن
وإن كنت لم أتمني لا شفيق ولا مرسي
بس نقول قدر الله وما شاء فعل

[ABOUSALMA007]

كلامك اخي في قمة المسؤولية والتحليل

[ابوكنزى]

تعرف أن نسبة التصويت 50% يعنى نص عدد الناخبيين لم يذهبوا مش
فارقه معاهم الناس زهقت فعلا

ربنا يستر و تفضل الناس ديه متشاركش
لان بجد الناس ديه لو شاركت
النتيجه هتبقى اكتساح لاحمد شفيق
ههههههههههههههههههههههه
نتيجه الانتخابات اثبتت
ان عمر سليمان لو كان نزل
كان هيفوز بدون اعادة
و طبعا دة لنفس الاسباب اللى قولت عليها

[Xicus_Bone]

شفيق مخضرم و تدرج في المستويات الوظيفية
و قد مسؤلية ادارة بلد
مش زي ناس تانية لسة بتتعلم
و ناس تانية عندها نقص و كبت و مصدقت تكوش على كل حاجة
شفيق هيعبر بينا الأزمة
و ده رأيي شخصياً

[MiNa*GSM]

ربنا موجود

[okly]

شفيق مش جاى يحكم مصر شفيق جاى يعمل مهمة انو يخلص على الاخوان وانو يطلع حسنى وولادة

واخر حاجة ممكن يفكر فيها هو الشعب لانو اصلا معندوش برنامج خاص بية لان البرنامج موجود بقالو 30 سنة يعنى متجرب وهيمشى

واللى هيحصل الاخوان هيرجعو السجن تانى دة اكيد والشرطة هترجع تانى زى ما كانت وانيل من الاول لان كل افراد الشرطة بقى عندهم رغبة الانتقام من الشعب


وعلى فكرة شفيق هو الرئيس سواء فى اعادة او مفيش


وسواء الشعب قال اة او لاء


لان الموضوع كان محسوم من قبل الانتخابات

[atghyan]

شعب تعود على العبودية دا السبب لكن شفيق جلاد جى يرجع النظام القديم

وشوفوا اول تصريح لسوزان على cbc

صرحت سوزان مبارك زوجة الرئيس المخلوع حسني مبارك لقناة البي بي سي ان النتائج جاءت مؤكده ان الشعب المصري كان راضيا عن حكم مبارك و ان كل من انتقضوه كان قله قليله لا تذكر.
اضافت سوزان ان كل من اعطي صوته لشفيق ذلك لوضوح موقفه المويد لحسني مبارك الذي صرح اكثر من مره انه مثله الاعلي في الحسم و اتخاذ القرار المناسب

في الاوقات المناسبه !!

اكدت سوزان ان علي الشعب ان يستعد لجوله الاعاده التي ستجري بعد أيام قلبله مؤكده أن النصر سوف يكون حليف شفيق انشاء الله


فهل الناس فهمت ولا لسه

الى انتخب شفيق خان دماء الشهداء

[ابوكنزى]

يا ريت نحاول نستفاد من الموضوع
و نتكلم بهدؤ اكتر من كده
و كل واحد حر فى رأيه
لكنى ارجو ان اللى يرد يتكلم برد يفيد الموضوع

[kohlr2002]

اقولك انا الناس اختارت شفيق ليه


الفلوس بتتكلم يا ابو كنزي يعني انا اعرف ناس في مهنتنا اصحاب شغل كبير و ليهم اسم

دعموا شفيق ماديا بمليون جنيه و بالتالي عنده ناس تبعه اجبرهم انهم يختاروا شفيق و خد بقي عندك بتوع السايح و بتوع الحزب الوطني و اصخاب الشركات

هما دول اللي اختاروا شفيق