بسم الله الرحمن الرحيم
السلام عليكم ورحمة الله وبركاته
مين مننا مش بيتمني يتعلم الانجليزي فلونت ومين جتله فرصة وظيفه ملهاش حل بس اللغه الانجليزية كانت عائق لانهم طالبين انجليزي فلونت او اكسلنت علي الاقل وطبعا معظمنا خد كورسات كتير وبرضه في النهاية بتلاقي نفسك مش بريفكت لا في النطق ولا في السرعه لاننا للاسف يا جماعة ضحية التعليم الحكومي الفاشل اللي كله معتمد علي التكست المكتوب من غير اي ممارسه وكله معتمد علي حفظ الجرامر والتلقين يعني بتكون جايب في الثانوية العامة مثلا 25 من 25 يعني المفروض كده انت ممتاز بس للاسف متعرفش تقول كلمتين علي بعض ولو سمعت حد بيتكلم متعرفش تلقط منه علي 3 او اربع كلمات مع انك جايب الدرجه النهائية وطبعا في الكليه (اقصد الكليات الغير متخخصة) بيكون الانجليزي دا سد خانه وخلاص اما الكورسات فكلها زي بعضها
المهم يا جماعة انا مش عايز اطول عليكم اكتر من كده انا النهارده جايبلكم طريقه جميله هتخليك تتعلم بسرعه وتحقق نتائج مذهله باذن الله في وقت قصير جدا بس هي عايزه شوية مصابره وتركيز واللي هينفذ الطريقه دي بس صح باذن الله خلال شهرين هيلاقي تغيير جذري في مستوي اللغة عنده لان من الاخر مش هتتعلم انجليزي غير لما تعلم نفسك وتتعب
وكمان جايبلكم كورس عشان يكون مساعد ليك في تنفيذ هذه الطريقه يعتبر من احسن الكورسات في العالم في تعليم الناتف انجلش ( Native English )
اولا الطريقه ودي خلاصه مجهود خبراء عالميين سنين كتير :
1- لا تحفظ الكلمات(vocabulary) فرديه ولكن تعلمها في جمل
يعني متحفظش كلمه لوحدها لانك اكيد هتنساها لانها ملهاش رابط في عقلك وهيبقي صعب جدا انك تفتكرها ولو افتكرتها مش هتجيلك وانت بتحاول تكون جمل وانا عندي طريقه يا جماعه ملهاش حل هتخليك تحفظ الكلمات ومتنسهاش بسهوله وهي كالتالي :
اولا : كل يوم هتجيب نص انجليزي يعني مثلا خبر من موقع euro news او bbc او اي موقع اجنبي او مثلا جريده انجليزية من اللي بيتباعو عندنا زي اندبندنت مثلا وهتحاول تقرا الخبر ده وتفهمه كويس والكلمه اللي متعرفهاش هتجيبها من جوجل ترانسليت وممكن تترجم النص كله في جوجل ترانسليت http://translate.google.com/?hl=en&tab=wT المهم تفهمه كويس وتعرف معاني كل الكلمات اللي فيه وبكده هتبقي عرفت الكلمات الجديده عن طريق التفكير والبحث مش الحفظ وهتكون ثبتت في مخك لانها مرتبطه بموضوع
ثانيا : العكس هتجيب نص عربي وهتحاول تترجمه انجليزي بنفس الطريقه انا عارف يا جماعه الموضوع هيبقي صعب في الاول بس هو عاوز صبر ولازم تكون مستمتع مش واخد الحكاية تحدي واجباري يعني لازم تحب الحاجه اللي بتعملها عشان تقدر تحقق تقدم
2- الاستماع الاستماع الاستماع :
يعني لازم كل يوم تسمع نصوص انجليزي وتحاول تركز وبقدر الامكان تفهم يعني مثلا ممكن تتابع قنوات الاخبار الانجليزيه زي CNN مثلا بس المهم انك تحاول تفهم انا عن نفسي برشح قناة MBC4 خصوصا برامج التوك شو زي برنامج اوبرا لانها برامج امريكيه اصلي وبيكون فيها الانجليزي الي حد ما مفهوم المهم تسمع كل يوم انجليزي
3- اجعل الانجليزي في اعماقك : وهي اهم الطرق
كلنا طبعا عارفين انجليزي الي حد ما كويس بس بتيجي عند تكوين الجمله وتلاقي نفسك مش عارف تجيب كلمتين علي بعض وتقعد تفكر عند كل كلمه (اه انا كنت فاكرها )مع انك عارف كل مكونات الجمله وحافظ كل كلماتها بس بتجيبها ببطئ .. لكن لو شوفت نفس الجمله بس بالانجليزي هتلاقي نفسك عارف معناها وتقول امال انا مش عارف اكونها ليه؟؟ وبتكون المشكله هنا مش انك مش عارف انجليزي او مش عارف كلمات او جرامر طب امال ايه المشكلة ؟؟
المشكله هي ان مخك متبرمج علي العربي لان اللغة الام في مخك هي العربي بالظبط زي القاموس الانجليزي عربي والعربي انجليزي
انا يا جماعه هقدملكم طريقه عبقرية وهتحس انك بتتحسن كل يوم عن التاني وهي ازاي تخلي مخك انجليزي عربي !!! ببساطه يا جماعة الطريقه هي انك فعلا هتقلب مخك وهتخلي لغة تفكيرك انجليزي.. طبعا في ناس هتستغرب ازاي يعني ؟ ببساطه يا جماعه الطريقه انك هتخلي مخك جاهز يعبر بالانجليزي زي العربي تماما .. يعني مثلا انت رايح تنام متقلش لنفسك (انا هقوم انام بقه دلوقتي)انما قول ( i am going to sleep right now) او افتكر موضوع معين ونقشه مع نفسك بالانجليزي وهكذا بس تلغي العربي من مخك يعني متقعدش تترجم انت هتعتبر نفسك لغتك الاساسية الام اللي انت مولود بيها هي الانجليزي هتخلي مخك يبقي اوتوماتك انجليزي بمعني اصح هتعمل (uninstall) للعربي و (install) للانجليزي
ولو ملقتش نفسك عارف معني كلمه او جمله او تعبير ربنا يخليلنا الجوجل ترانسليت والكلمات دي هتثبت في مخك وهتبقي ريدي للاستخدام في اي وقت لانك عملت اعداد لمخك انه يكون جاهز يعبر بالانجليزي في اي وقت وبسرعه وهتلاقي نفسك علي طول عمال تدور علي معاني كلمات زي الطفل اللي لسه بيتعلم الكلام وبيسال علي معاني الاشياء حوله وطبعا عمره ما بينساها تاني
بس حاول تستخدم الماتيريال الحقيقي الاميركي ودا ان شاء الله موجود في الكورس زي مثلا have got to تبقي gotta ومثلا want تبقي wonna و yes تبقي yeah .... وهكذا
- اما بالنسبه للنطق ودا برضه مهم جدا لان في كلمات كتير جدا بننطقها غلط انا هديلكم موقع نطق رائع بينطق صح بصوت بشري بينطق نصوص لحد 3 سطور علي بعض هتحط النص هتختار الصوت واحسن صوت واحد mike او كريستين وهتضغط speak وبعدين هو هيعمل دونلود للنص علي جهازك mp3
http://www2.research.att.com/~ttsweb/tts/demo.php
4- اجب علي اسئله بالانجليزي :
والطريقه دي حققت نجاح كبير برضه مع ناس كتيروهي انك تسمع قصه وحد يسالك اسئله بسيطه منها وانت تجاوب متقلقوش لان دا برضه في الكورس
المفضلات