هذه قصيدة لشاعر مغمور أعجبتنى فنقلتها لكم
حكيم زمانه طلع بقرار
قرار عجيب ولع الأسعار
وخلي ليل الفقرا نهار
وانكشفت بيه
كل وجوه العار
وقال إيه
محدود الدخل هيعيش
والعلاوة دي زيها مفيش
والباقي يجيب بيه
كيلو لحمة وقرصين حشيش
ويوزع الباقي كحك مناقيش
ضربة معلم كبير
على قفا كل فقير
هيج عش الدبابير
ولم كل الفرافير
حواليه زى الصراصير
عاملين شكل ومنظر يملي العين
ومن جوه قلوبهم مليانة طين
واللي يشوفهم يحسبهم قلب متين
وهما لكل واحد فيهم حقد دفين
يا جدو ليه الأجرة تزيد
وحالنا مفيش فيه جديد
رينا يديك عمر مديد
وتخفض الأسمنت والحديد
يا بني اللي زاد السولار والبنزين
ويدوب زادوا قرش ومليمين
تيجي أنت تقولي الأجرة زادت مرتين
طيب أجيب فلوس العيش منين
العلاوة أكيد فارقة
جت في وقت كله خنقه
تشتري بيها لحمة تكفيك شهر
وتركب التليفون وكفاية قهر
وتدفع فاتورة الكهربا والغاز
وتشتري لك ثلاجة وبوتاجاز
وتودي عيالك الجامعة وترجعهم
وتلبسهم أشيك لبس وتدلعهم
ويتبقالك تلاتة تعريفة
تعينهم لأيامك الخفيفة
يا نهار أسود مالوش أرار
يا ليل أغير مالوش فنار
الدنيا اتكركبت واتملت غبار
ودق يا شاكوش على رأس المسمار
يمكن أفوق وأفهم كلام الحمار
عقل الراجل خده الغراب وطار
بيتكلم ع التعريفة في زمن الدولار
وع الصبح في ليل مالوش نهار
بكرة يقو للي اركب الناقة وروح مشوار
الله يخرب بيت اللي أخد القرار
المفضلات