أيوة بغير

**GhArOmA** · 19-10-2010, 02:22 AM

أيـــوة بغيـر !
للشاعر هشان الجخ

لا انا نقصان ولا ضعفان
ولا مسطول ولا سكران
ولا زايغ من عيني الضيّ
ولا حد احسن مني في شيّ
بس بغير

واللي قالولك غيرة الراجل قِلّة ثقة او قلة فَهم
خَلْق حمير

غيرة الراجل نار في مَرَاجِل
نار بتنوّر مابتحرقش
واحنا صعايدة بنستحملش
شمسنا حامية وعِرْقنا حامي وطبعنا حامي
واللي تخلّي صعيدي يحبها
يبقى يا غُلْبها
اصلنا ناس على قد الطيبة
كلنا هيبة

والنسوان في بلادنا جواهر
طب لو عندك حتة ماس
حتخلّيها مداس للناس؟؟
ولا حتقفلي اوضة عليها بميت ترباس
يمكن حتى تأجري ليها جوزين حراس
يبقى انا لا انا جاهل ولا غافل
كل الفرق ما بيني وبينك اني صعيدي
ينعل ابو ده اليوم الاكحل
اللي لا ليه اخر ولا اول
اللي طلعت لقيتني صعيدي

لو كان بايدي
كنت اعملك هندي بريش
واقلب شعري كنيش كرابيش
والبس لك سلسلة متدلدلة خرزة وقلب
بس ازاي البس لك سلسلة ؟؟ هو انا كلب ؟؟

ثم العبرة ماهيش في اللبس
اصل المشكلة عَندك .. عٍندك ..
قلت حاسيبها وبكرة تحس
بعده تحس
بعده تحس
ده انا لو جبس كنت زعقت
ماشي صداقة وماشي زمالة
بس ماجَتْش على الرجالة

ماهي نسوان الدنيا كتير
وانا ما بقولش تخاصمي الناس
ولا تِتْحِجبي عن الرجالة
ولا تعتكفي وتسكني دير
بس يا ريت حبة تقدير
اني بحبك
واني بريدك
واني زرعت حياتي في ايدك
واني غزلت بنات الدنيا عقود على جيدك
واني تعبت من التفكير
واني بغير

أيوة بغير

[ame]http://www.youtube.com/watch?v=94ABR1lOXxE&feature=player_embedded[/ame]

**السخاوى** · 19-10-2010, 02:29 AM

جميله جدا الكلمات

والمعنى أجمل وأجمل

وحقيقى هشام الجخ شاعر قادم بقوة الصاروخ

تسلمى غرام على الأختيار المميز

++++++

**Tarek On** · 20-10-2010, 01:16 AM

جميلة جدا

من يعرف معنى هذا الشطر ؟ هقول عنه شاطر .. وهو اجمل شطر بالنسبة لي ..

واني غزلت بنات الدنيا عقود على جيدك

**R E M O** · 20-10-2010, 01:38 AM

القصيدة دية سمعتها فى برنامج
وكان معاة واحد بيعزف بالعود

رائع جدا

**~~eslam katy~~** · 20-10-2010, 02:39 AM

ممتاز اختى سلمت يداكى

**R E M O** · 20-10-2010, 02:48 AM

المشاركة الأصلية كتبت بواسطة Tarek On

جميلة جدا

من يعرف معنى هذا الشطر ؟ هقول عنه شاطر .. وهو اجمل شطر بالنسبة لي ..

واني غزلت بنات الدنيا عقود على جيدك

هو يقصد ان جميع البنات هو بالنسبة لية
هو عقد جميل هايلفة على ايدها

تعبير مجازى يمثل فية البنات بعقد ممكن هى تلبسة

**Tarek On** · 20-10-2010, 09:38 PM

المشاركة الأصلية كتبت بواسطة R E M O

هو يقصد ان جميع البنات هو بالنسبة لية
هو عقد جميل هايلفة على ايدها

تعبير مجازى يمثل فية البنات بعقد ممكن هى تلبسة

بالظبط ياقلبي بس انت اخطأت بتفسير كلمة واحدة ( الجيد - جيد ) = ( العنق - عنق )
ملاحظة ان الياء لاتشدد في كلمة جيد

**GhArOmA** · 21-10-2010, 12:48 AM

برافووووووووووو جامدة حصة النحو والاعراب دى ههههههههه
هى القصيدة رائعة وهو طريقة القائه ليها وتلقائيته تحفة
ميرسى ليكو جميعا يا حلوين

بس ريمو انا عندى استفسار
هو العقد بيتلبس على الايد يا عمو ولا فى الرقبة هههههههههه