قاموس الروشنة الجديد 2008

[fm3]

بسم الله الرحمن الرحيم

ده قاموس الروشنة الجديد جدا

الجديد نوفى

مصطلحات 2008

هنمسك مع بعضينا كده حرف حرف من اولا

الالف

لحد اليااااء

وانا عاوز كله يمسك معايا مش همسك لوحدى

انا شايف واحد هناك اهو مش ماسك كويس امسك ياض انتا

نبدأ بحرف الالف

( أ )

استمورننج
يعنى الاصتباحة م الاخر ومن الاسم يعنى بيتقال الصبح لما يكون الواحد عاوز ياكل مثلا او يدخن


اعمل دماغ
نفس المعنى اللى فات بتتقال لما الواحد يكون عاوز يظبط دماغه وبتفرق من واحد للتانى

اديها جاز

بتتقال لو فى خناقة يعنى ولع فى الخناقة وشعللها

اهرب شوية
يعنى اختفى انت دلوقتى

اهبؤ
يعنى همشى من المكان ده مثال انا ههبؤ بقى يعنى انا همشى

ايه الحياة
يعنى ايه احوالك زى ازيك كده

اتسحل
يعنى اتهرى ضرب او اتبهدل زى مثلا انا اتسحلت النهاردة فى كذا مشوار يعنى اتبهدلت

ازبهل
يعنى اندهش

اتوبيس راجع بضهره
ودى بتتقال لواحدة وحشة يعنى تشبيه ليها با الاتوبيس اللى راجع بضهره

امبلايز
يعنى الحوار ماتمش لو كنت مكلم حد على حوار معين يعملهولك وقالك امبلايز يعنى ماتمش

ابجنى
يعنى هات فلوس وانا انفذلك طلبك

اهرش
نفس المعنى اللى فات

انزل من على ودانى
يعنى انت رغاى اوى واكلت دماغى

اوكشن
يعنى موافق


انتخ
يعنى قاعد كده مقضيها ولا ليه هدف فى الحياة

اوجو
بتتقال على البنت اللى بتتأثر بسهولة باى كلام حلو

ادرجى
يعنى شاب اخر صياعة

ارقدلك
يعنى هستناك برة بتتقال لو بتتخانق مع حد وهرب منك او الناس حاشتك ومعرفتش تقفشه فا تقوله هرقدلك

احط عليك
يعنى هستقصدك او ليها كذا معنى بتتقال غالبا لو مضايق من واحد اوى فا تقوله خلى بالك هحط عليك قريب يعنى هتقع قريب

انت من الكفار
يعنى انت من الاعداء

استكانيس
يعنى افرح كده واهيص

افتكس
يعنى افكر واخترع

[fm3]

حرف الباء
(ب)


بيرمى ودن
يعنى بيتصنت على غيره رامى ودانه معاك عشان يسمعك

بخ
يعنى انتهى خلاص يقولك الحوار بخ خلاص يعنى انتهى

بونتى
يعنى واحد شايف نفسه وفارد عضلاته على الناس

باشكا
يعنى اكشف ورقك ماتخبيش بمعنى تانى خليك صريح

بيظيط
يعنى بيدخل فى امور غيره اى حوار يدخل فيه حتى لو مش فاهمه

بيحكها
مثلا لو واحد عاوز يتكلم مع حد تانى ومش عارف فايبدأ يحكها يعنى يمشى من قدامه يعلى صوته قدامه يعمل اى حاجة للفت النظر

بيتسوح
يعنى بيتأثر عليه بسهولة

بيروح
نفس المعنى

باترينا
بتتقال لاى حد لابس نضارة الشاب ده باترينا

بتخبط فى الحلل
يعنى دخل فى منطقة محظورة من الكلام او الافعال او بيفضح سرك لحد

برطعة
يعنى ولا همه حاجة ماشى بدون هدف

بيجيب لورا
يعنى بيخاف

بكاش
يعنى بتاع كلام وغالبا البنت بتقولها للولد فى مواقف معينة

بونو
يعنى حلو وجميل

بؤلة
يعنى يخصنى جامد اوى

بهاريز
ليها كذا معنى سعات بتبقى معناها الفلوس

[fm3]

ويلا بينا على الحرف الجديد

حرف التاء

(ت)

تنشن
يعنى زعلان او متعصب يقولك بس عشان انا متنشن يعنى متعصب

تنح
يعنى وقف يبص على حاجة زى العبيط

تسالى يالوز
بتتقال لما يكون واحد بيعاكس واحدة مش شرط حلوة ولا وحشة معناها ماتيجى نتسلى شوية

تس تس
بتتقال للشاب الممل اوى يقولك الشاب ده تس تس يعنى ممل وخنيق وليها معنى تانى مش هقولو

تعبان مولة
يعنى غشيم جدا مالوش فى حاجة

توت فروت
بتتقال لاى حد شايف نفسه زيادة عن اللزوم

تريلو
بالفتحة على التاء يعنى تجاهلو اعمل مش شايفو يقولك ايه ده سمير جاى هناك اهو يقولو تريلو يعنى اعمل مش شايفو





حرف الثاء

ث

ثبت
ليها كذا معنى المعنى الشائع بين الشباب يعنى هدى او مثلا كل بعقلى حلاوة
مثلا لو انت بتتخانق مع واحد جه هداك بكلمتين وكده ده معناه انه ثبتك

ثورجى
يعنى واحد على طول صوته عالى وبيزعق على طول
حرف الجيم

ج

جلنف
قليل الذوق فى الكلام يعنى اسلوبه وحش فى الكلام

جبت جاز
يعنى خلاص تعبت جدا مش هقدر اكمل

جعجاع
يعنى واحد صوته عالى دايما بيتكلم بصوت عالى

جلدة
يعنى واحد بخيل جدا

جالى جرب فى ودانى
يعنى خلاص بقى انا زهقت من كتر كلامك ده ارحمنى شوية

[fm3]

ح

حطيت ايدى على البلف
يعنى انا كده فهمت معنى الموضوع او اساس الموضوع

حاتى
يعنى جامد او فاهم يقولك الشاب ده حاتى فى الكورة مثلا يعنى جامد فى الكورة

حافرتى
يعنى دايس فى الدنيا يعنى ليه خبرة كبيرة اوى فى الدنيا

حاورتجى
يعنى بتاع كلام وحوارات طول ماهو قاعد يفضل يألف فى حوارات عن نفسه او عن حد تانى

حاجة بربع جنيه
يعنى اى مصلحة وخلاص بس نعيش

حانوتى
يعنى بخيل جدا او سعات بيبقى معناها محظوظ جدا

حرك
يعنى شاب مجتهد بيتحرك كتير



حرف الخاء
خ

خبط فى الكلام
يعنى دخل منطقة محظورة من الكلام بدأ يغلط يعنى

خدوده انش
بتتقال لواحدة جميلة جدا ورقيقة بقصد المعاكسة

خريان ما دريان
يعنى ولا فاهم اى حاجة فى اى حاجة

خيشة
برضو معناها واحد مش فاهم حاجة بس بيحاول يبين انه فاهم

خرمان
لفظ معناه انا محتاج سيجارة حالا يقولك انا خرمان يعنى عاوز سيجارة

خلبوص
يعنى مية من تحت تبن عامل فيها موسى وهو فرعون

خمس
زى join يعنى مشاركة بتبقى فى سجارة او فى كوباية شاى

خدنى تحت جناحك
يعنى ساعدنى عشان اعلى وانجح معاك

خر
يعنى اعترف بكل حاجة

خمفشارى
يعنى حاجة مش مفهومة خالص

حرف الدال
د

داس عليها قطر
بتتقال على البنت الوحشة جدا برضو بتتقال فى المعاكسات

دباليمو
يعنى حاصل على دبلوم تجارة بقى او صنايع مش هتفرق دباليمو وخلاص

دهاليز الحياة
معناها مشاكل الحياة

دفش الزبون
يعنى اوعى تسيبه يمشى قبل مانطلع منه بمصلحة

دبلج المسائل
يعنى ظبط الحياة

دؤرم
يعنى شاب ذكى وبيفهم فى كل حاجة

دغف
عكس دؤرم يعنى مايفهمش فى حاجة

داير
يعنى لافف وفاهم الدنيا

[fm3]

حرف الراء
ر

راح النار
يعنى غار فى داهية

روق القنانى
يعنى فوق من اللى انت فيه ده وكبر دماغك الحياة حلوة

رويتر
يعنى شخص رغاى بينقل الكلام

ريشة
يعنى دمك خفيف ياض او انت فاكر نفسك دمك خفيف؟

راعينى
يعنى اهتم بيا شوية

حرف الزين

ز

زبون
الشخص اللى ممكن تستغله وتطلع منه بمصالح

زومبجى
مروج الاشاعات

زلومة
بتتقال للى بيحشر نفسه فى كل حاجة

زنطاح
يعنى هجاص بتاع كلام

زبلة
يعنى قصير اوى

زغابة
يعنى ناس كتير اوى

زغروف
لفظ يطلق على المخدرات

زمبوقة
يعنى واخد مناخيره كبيرة

زنان
يعنى لحوح

زنكلونى
يعنى شاب فافى

زلاطاطا
يعنى بت جامدة

[fm3]

حرف السين

س

سكح مراجيح ع الضيق
معناها الدنيا كلها مشاكل وقرف

سبوبة
معناها العمل السريع او الاضافى

ساستمنى
يعنى اشرحلى

سكاموزة
يعنى الجيرل فريند بتاعتى واحد صحبك مثلا يقولك مين دى تقولو السكاموزا يعنى صاحبتك

سلعوة عندها بواسير
يعنى بنت وحشة جدا

سمعنى بودعك
يعنى اتكل على الله غور من وشى

سكامونس
يعنى رقيق اوى بتتقال غالبا على الشباب الفافى سكامونس

سلبوتة
يعنى عادى

سنجف
يعنى ضحك عليه فى الكلام يقولك انا سنجفتو يعنى ضحكت عليه

سلكلى المسائل
يعنى مشيلى امورى

سقاقة فى المدكة
يعنى كبر دماغك

سيجارة النتن ولا بتولع ولا بتكييف
يعنى السيجارة اللى بتيجى من البخيل مش بتفيد باى حاجة

وبالمرة شوفو الحوار ده بين واحد خرمان واتفقنا ان خرمان يعنى عاوز سيجارة وواحد نتن يعنى بخيل

الخرمان
دخانك عمانا ( يعنى عاوز سيجارة )
النتن
اهى شبورة وتعدى ( يعنى مفيش )
الخرمان
طب كبريتك لسعنا ( يعنى عاوز سيجارة برضو )
النتن
واوا وتخف ( يعنى مفيش برضو )
الخرمان
ياجدع ده الاتوبيس دخل فى البنزينة وولع ( يعنى هات سيجارة ياجلدة )
النتن
سبحان الله قضاء وقدر ( يعنى مهما قلت مفيش سجاير برضو )
نكمل بقى بقيت الحروف


سبل
اسلوب فى المعاكسة بالعين من خلال النظرات وحتى اشتهرت اوى بين البنات تلاقى واحدة بتقول لواحدة انت هتسبلى

سنهورى
يعنى الشاب العصبى اوى

سنكافولا
يعنى كله تمام اوى

سنجاب بلابل فى التروميات
يعنى محدش فاهم اى حاجة يقولك الدنيا سنجاب بلابل فى التروميات يعنى محدش فاهم اى حاجة

[NOUR*GSM SYRIA]

مشكورة اختي على الموضوع الجميل والشيق

[fm3]

مشكورة اختي على الموضوع الجميل والشيق

على الطلبات يا باشا
انا راجل
واسمي فوزي

[القلب الأبيض]

مشكووووووور

[ELMASRY.7000]

مشكور يا فوزى