إحنا الغلطانين!!.
نفسى أغير مكانى.. وأعيش فى غير زمانى
من غير ما أتعب وأعانى.. وأكون م المرتاحين
لا هم يجينى تانى.. ولا خوف من الأمانى
وأعيش حياة عجبانى.. وأكون م الفرحانين
صاحية هناك المشاعر.. بالحب الكل شاعر
ولا خاين كده ولا داعر.. ولا ألاقى هناك فاسدين
لا سرقة ولا رشاوى.. لا قلوب بتزيد قساوة
بيتعاملوا بغباوة.. ولا فى رحمة ولا دين!
الحق صوته عالي.. الكل قلبه خالى
م الحقد والتعالي.. ولا أى حاسدين
ونعيش دايماً فى النور.. ولا حاجز كدة ولا سور
يلخبط الأمور.. ولا إحنا دريانين!
فى دوا للتعبان.. وأكل لأى جعان
لا تايه ولا حيران.. يقول أنا فين أنا مين؟!
نفسى أشعر بالأمان.. والرحمة والحنان
والتقوى والإيمان.. راحوا فين يا مصريين؟!
العيب مش فى المكان.. ولا حتى عيب زمان
العيب ده عيب إنسان.. إحنا الغلطانين!!
رد مع اقتباس
.gif)
المفضلات