أنا الشعب والشعب أنا
أنا الشعب والشعب أنا
أنا مصر ومصر أنا
أنا المصرى العنيد المصر
وأنا المصير القاسى الصعب
أنا التزوير ف الانتخابات
أنا اللى زور واللى حور
واللى عاند واللى حجر
ورفض يبيع ضميره
عشان شوية قرشنات
أنا الصرخة والآهات
أنا الضحكة والكدبة
على وش البهلونات
أنا الشعب والشعب أنا
أنا مصر ومصر أنا
أنا الصوت والسكات
أنا الفزع والجزع
قدام البهوات
والبكوات والبشوات
أنا الشعب والشعب أنا
أنا مصر ومصر أنا
أنا النسمة على شط النيل
وسحابة صافيه على موجة بتميل
لمسه دافية من شاب نحيل
بتوعد بنت بوش بشوش..حلو..جميل
بتنطق..متخافيش..هعمل المستحيل
هحقق أمانيكى..وهتعيشى ف هنا
أنا الشعب والشعب أنا
أنا مصر ومصر أنا
أنا الحركة ف الشوارع
وصوت الأدان ف الجوامع
ودق العمل ف المصانع
رنة أجراس الكنايس
وتعليم بايظ ف المدارس
أنا الزحمة ف إشارات المرور
وعشره جنيه متكرمشة
من سواق غلبان معزور
أنا الشعب والشعب أنا
أنا مصر ومصر أنا
اعتصام واحتجاج وعذاب
على رصيف مجلس..
بيقول ببجاحة وتناحة
أنا الشعب
أنا اللحية والجلبية
والنية المستخبية
والفتوى الفضائية
والغنوة المتشخلعة
وجمهور.. لبس البردعة
أنا الشعب والشعب أنا
أنا مصر ومصر أنا
أنا اللى عليت وبنيت
وغذيت واتغذيت
ف كتب التاريخ
أنا الحاضر
اللى من غير ما يكبر
بيشيخ
أنا الحرية ف الكلام
والكلام الحر
أنا الحال اللى مش تمام
والوضع المر
أنا اللى هزيت التاريخ
واللى هتهزأ ف التاريخ
لو سكت على زمن المسخ
أنا الشعب والشعب أنا
أنا مصر ومصر أنا
رد مع اقتباس
.gif)
المفضلات