كيف يتحدث معلقى المباريات و مقدمي البرامج (جامده جدا جدا )
أخواني اعضاء المنتدي الكرام
رمضان كريم عليكم
وجعله الله في ميزان حسناتكم
كيف يتحدث معلقى المباريات عن (أبو تريكة) ؟!
§ (أيمن الكاشف): «(محمد أبو تريكة).. (محمد أبو تريكة) مشاهدينا الكرام.. (محمد أبو تريكة)»!.. ماله (محمد أبو تريكة).. لا تسأل أرجوك.. المهم إنه (محمد أبو تريكة) وخلاص!
§ (طارق الأدور): «النجم الكبير (محمد أبو تريكة).. يااا ياااا يااااا.. لعب فى الترسانة عشر سنين و3 شهور وأسبوع وساعة وربع ـ مصرى ـ مسلم ـ ذكر ـ 30 سنة وأربع دقايق ـ متزوج ويعول.. جاله الجدرى زمان وأهله خافوا عليه جداً لأن مرض الجدرى كان خطير أيامها.. ومن المفارقات الطريفة إنه عمل عملية اللوز لما اشتكى منها.. يااااا يااا يااااا!»
§ (عصام عبده): «(محمد أبو تريكة) يمنى النفس بتسجيل هدف مبكر رغم إننا فى الدقيقة 85 لكن (أبو تريكة) يظل لاعب تحب أن تشاهده طول فصول السنة، ومنتخب مصر ضاغط، منتخب الفراعنة ضاغط، وكتر الدق يفك اللحام!»
§ (أشرف شاكر): «اللاعيب الفنان.. فنان (أبو تريكة) فنان.. إيه الجمال والمهارة دى؟! لاعيب لاعيب من عينة اللاعيبة اللاعيبة (أبو تريكة)، كل الناس هنا فى مصر بيحبوه وحتى لما بيمشى فى الشارع الناس بتحبه وبتحب تتصور معاه، وهوبا جول هوبا جول هوبا جول.. والجول التالت لإنبى!».. طبعاً (أبو تريكة) كان خارج الـ18 فى المباراة!
§ (هشام فهمى): «وآه يا كورة وآه يا كورة.. و(أبو تريكة) ظهر فى الصورة.. ومية مية الأهلاوية.. وحلوين أوى الزملكاوية.. ويا حلاوة الإسماعيلاوية.. يا كورة يا كورة.. وحوى يا وحوى إياحا!»
§ (محمد الكوالينى): «والتصوييييييبة (محمد أبو تريقة) عدى الراجل من جنب القورنر وشاط القورة حلوة لكن (قامينى) جول قيبر حرس الحدود بإستاد المقس بيتصدى لها!»
§ (أحمد الطيب): «(أبو تريكة) موهبة العصر والأوان وفارس الفرسان.. قال لها تعالى لى يا بطة.. جات له بطة.. عمل فيها كل حاجة، وقالت له الليلة يا عمدة.. هيا حبكت.. وكانت الليلة، وصباحية مباركة يا بطة!»
§ (حمادة إمام): «و(أبو تريكة) والترقيصة.. حلوووووة.. حقيقى يعنى.. تمللى كدة بنقول اللاعيب اللى بيرقص دة بياخد معاه اتنين إداريين من الجهاز الفنى بتاع الفريق الخصم فبيخف الضغط على الفريق بتاعه، حقيقى يعنى.. والوصول للمرمى تمللى بيكون بتلت طرق، التصويب البعيد أو الاختراق من العمق أو الرفع من على الأجناب أو طريق (صلاح سالم) الله يرحمه!»
§ (محمود بكر): «يعنى الأهلى اشترى (تريكة) من الترسانة، حرمهم من لاعيب كويس كان ممكن يساعدهم فى معركة الهبوط، وتلاقى الفرق الكبيرة بتاكل الفرق الصغيرة بلغة الكورة كدة، وهو لاعيب من عينة (سمير قطب) و(الفناجيلى) و(زكى جمعة) مين (زكى جمعة) مش موضوعنا الوقتى!»
-بالنسبة لمقدمي البرامج:
§ (هشام رشاد): «تفتكر يا كابتن (مجدى) كابتن (أأأأأأأأبو تريكة) ااااالنهاردة هيلعب مع مع مع الأهلى واللا مع الألمونيوم؟!»
§ وتكون إجابة كابتن (مجدى): «واللهى يا (هشام) أنا مريت بتجربة مشابهة لما كنت محترف فى البرتغال ولعبت وقتها مع الألمونيوم لكن الحال اتغير دلوقتى وأكيد (أبو تريكة) عاقل وهيلعب مع الجيش!»!
§ (خالد الغندور): «(أبو تريكة) يا جماعة لاعيب أكبر إإإ كابر أيوااا كبير، و(شيقابالة) (لاحظ القاف وتضخيم اللام).. لو أخد فرصة يا جماعة هيكون أفضل لاعب فى القارة الأسمرانية يا جماعة لأنه لاعيب لون جلدته.. إإإإ بشرته.. إإإإ لون شكله أسمر يا جماعة، وأرجوكم تبعتوا رسايل إس إم إس حالاً وتشاركوا فى الاستفتاء مين أحسن لاعب أسمر فى مصر (شقابالا) واللا (أبو تريكة) واللا (أسامة حسنى).. لاحظوا إن أحسن لاعب أسمر فى مصر!»
§ (علاء صادق): «(موحمد أبو تريكة) لاعيب جميل جيدن وإنسان فوق الوصف، تحب تتحاور معاه وتناقشه، بيتعرض لظلم تحكيمى فااادح، لأن الغندور فاشل، تخيلوا حكم مبيعرفش... ها ها ها ها!»
§ (مصطفى عبده): «وإحنا من هنا بنقول للاعب الموهوب (محمد أبو تريكة) شد حيلك، عاوزينك تتمرن كويس، وتثبت إنك أحسن لاعيب فى الترسانة، ومنتخب مصر للشباب محتاجلك جداً... إحنا مش مع حد ضد حد ولا بنجامل حد ولا بنحابى لحد، إحنا هنا محل محترم، بناكل إعلامنا بعرق جبيننا، وبنقول للى مش عاجبه يقلدنا
(هشام فهمى): «وآه يا كورة وآه يا كورة.. ابدا ابدا ابدا .... .... نتمناها الاحلى ... ننشدها الاجدع .... وهيه الكورة كده تعطيها تعطيك ... تديها تاخد منها.
(محمود بكر ): شكل الملعب اتغير و نقدرنقول بعد مرور تسحتاشر دقيقه شيكل الاداء اتغير
اتمنى المتعه للجميع
ناقصين 3 معلقين مين يقولنا عليهم
اخوكم / صالح
رد مع اقتباس
.gif)
المفضلات