على وركة شجر ،،، مدت عمرهه اشراع


امل كطرة نده والشجر غازلهه

غازلهه الشجر ،، بس امل جانت خيط

غازلهه الشجر ،،، والموت غازلهه

على امتونه العمر شايلهه خمس اسنين

وبعدهه عللكبر ناخت محاملهه


خشبة فاس امل والدنيه ركبت فاس


خنكتهه وامل جانت تجاملهه

يعطش موتهه ،،، ومجعت عمر تنطيه

وفضالة عمرهه بحلكه تبزلهه

على راك الجفن خطت عمرهه حروف

تكمل نص سنه والدمع يغسلهه

صمت دم ابوهه بجفهه حنة عين

وصفنت مستحه والدمع جفلهه

امل غابة مشاعر والسوالف نار

وكل ماينذكر والدهه يشعلهه

مثل عود الزرع لو ضاك خلك الريح

يحنيهه الدمع ،،، والصبر يعدلهه

بثكل الجوع جانت واثكل من الجوع

ومن الجوع صارت اخف من ضلهه

الحبل من ينتجي عالحجر ياكل بيه

وشفه التنتجي عالجوع ياكلهه

على حلك الكبر ثلمت ارغيف الموت

زفتله عمر وتراب زفلهه


بعيون الحلم رسمت بكايه ضنون

ونامت بالحلم بس كبر صارلهه

عرت لبست وطن تدري بي عريان

كلتله برد ،،، عريان كاللهه

ونخة تنورهه وكاللهه راح الجوع


راح الجوع ،،، لاكن راح يكتلهه


صح شبعت امل بس امل شبعة موت

يبست روحهه واحترك ساحلهه

ساحلهه احترك وايده بشعرهه وجان

ساحلهه اعله كبر الجوع ساحلهه

امل كسرة ضلع من ضلع ابوهه المات

ولان كسرة ضلع للباب عازلهه

كبر لوح الصبر وانغلك باب اللوح

ومفتاح الصبر بالباب شاتلهه

انفتح باب الصبر ،،، بس جان بي بسمار

وهي كسرة ضلع واتكسرت كلهه


للشاعر عباس العبادي


تحياتي لكم