.gif)
مصر بخير
السلام عليكم و رحمة الله و بركاتة
قبل ما ادخل فى الموضوع
انا عارف ان فى سلبيات كتيرة موجودة الان فى المجتمع المصرى
و كنت وما ازال ضد الحزب الوطنى وضد حكومتة و اعضاءة
و مخبيش عليكم انى امين شباب بولاق فى حزب مصر الفتاة الجديد(حزب معارضة)
و طبعا كلنا عارفين او على الاقل بنسمع عن الفساد و الرشاوى و اهمال المستشفيات
و لو فضلنا نعد مش هنخلص النهاردة
طبعا الكلام دة ممكن يزعل منى ناس كتير و لكنها الحقيقة
و كل دة موجود فى كل دول العالم
مش دة الموضوع الى عايز اتكلم فية وعارف ان المنتدى بيمنع الكلام فى اى مواضيع
تخص السياسة او الدين
انا عايز اقول ان بالرغم من كل الحاجات دية
ان مصر بخير
و الخير موجود فى اهلها الى يوم الدين
و ان المصريين بتظهر جدعنتهم و شهامتهم وقت الشدة
يوم امس و انا فى المحل اتصلوا بيا من البيت
وقالولى ابنك تعبان اوى و مش قادر يتنفس و حالتة صعبة اوى
و راحوا بية للدكتور و قالهم مقدرش اعمل حاجة
لازم تطلعوا بية الى مستشفى ابو الريش
استر يا رب
طبعا قولت ان الموضوع خطير
ربنا يستر من ابو الريش واهمال المستشفيات الى بنسمع عنة
المهم ركبت تاكسى و جريت على المستشفى
وقولت لسواق التاكسى عايز كام و هو طبعا كان شايف الحالة الى انا عليها
لقيت السواق مش راضى ياخد فلوس و بعد الحاح قلى خلاص اى حاجة
قولت فى بالى امال فين الجشع بتاع سواقين التاكسى
وصلت المستشفى و بعديها بخمس دقائق و صل التاكسى التانى
و فى الولد و هو تعبان جدا قولت لسواق التاكسى عايز كام
قلى خلاص مش عايز فلوس خالص و هو كمان بعد الحاح شديد
لما رضى يأخد فلوس (مصر بخير)
قولت هى الدنيا اتغيرت كدة لية و الناس مالها بقت طيبة كدة
دخلت جرى على المستشفى و الاستقبال
و اول ما دخلت لقيت كل الاطباء سنهم صغير و الدنيا زحمة موت
المهم دخلت على الاستقبال و دخلونى على جلسات بخار
و بعد كدة كشف على الولد اكتر من دكتور
و الحمد لله جات سليمة
بعد ما هديت و الحمد لله اتطمنت قولت ادفع فين او كام
قالولى كل دة بالمجان
قولت بالمجان دة مصر لسة بخير
ايوة يا جماعة مصر بخير
و الخير موجود فى المصريين
لكن بيظهر وقت الشدة
انا عارف انى طولت عليكم اوى
و كمان الموضوع مش مرتب و لا حاجة
لكن الكلام خارج من القلب و انا احب ان اشكر
مستشفى ابو الريش للاطفال
و طبعا سواقين التاكسى
مصر بخير
رد مع اقتباس
.gif)
المفضلات