«®°·.¸.•°°®» ورده بلدى «®°°·.¸.•°®»
ـــــــــــــــــــــــــــــــ
الحبايب
اللى حاضر واللى غايب
لسة فيهم قلبى دايب
اللى قالوا : عيب وحاسب
واللى قالوا : احلم وشاغب
هما دول
اللى كانوا .. أو .. لازالوا ..
يعرفوا إيه الأصول
لأ ولسة ف بالى غيرهم
ورد أكتر
ورد بلدى
صعب إن انسى النديم!!
وانسى شوقى .. وانسى رامى
التاريخ مليان أسامى
أفتكر مين والا مين؟!
عقلى كدا محتاج لدفتر
والزهايمر
للأسف بيزيد معايا ..
كل ماكبر
ورد بلدى
والمواردى
جده حلوانى ..
وباني ف حضن أرضى
إسمه رزق .. أو اسمه شُهدى
أى إسم والسلام
الزهايمر مش راحمنى
ليل صباح ..
دايماً اسرح ..
وقت مافتح ..
سيرة الورد المزهر
سيرة الناس الملاح
اللى انا قالق راحتهم بالسؤال
عن ود راح!!
اللى عن دنيانا غاب
ألف رحمة ونور عليه
روحه تسمع دق قلبى
تيجى مع نجم وحجاب
واللى يبدأ بالكلام
يبتدى بوصلة ملام
يبتدى بهمسة عتاب
يسألنى : خير!!
خير يا عوضى .. إيه اللى صابكوا؟!
الخلاف على فين واخدكوا؟!
ليه نهاركوا لونه كحل ..
ومش معدى؟!
وان جاوبت التهتهة تقص الكلام
والخجل يوضح ف ردى
يتكسف وشى البشوش
والعرق ما يرطبوش
بعد ما قرب يصدي
المفضلات