استراحة عمنا الكبير الشاعر (صلاح جاهين)

[&& اشكوزا &&]

المماليـــــــــــــــك

زمن المماليك ... حاجه رومانتيك ،
أبطال حواديت ... تحت الشبابيك ،
رايحين ، جايين ... بهدوم كده شيك ،
بوشوش حمرا ... لون عرف الديك ،
راكبين على خيل ... الله يعطيك ،
يعملوا حركات ... يضربوا مزازيك ،
يلعبوا بالسيف ... لعب يسليك ،
يحكوا وياك ... و يغزّوه فيك ...
غير الخوازيق ... بقى ، و المشاكيك ،
و اسياخ النار ... اللى تدفيك .
حاجة تخليك ... تشكر أهاليك ،
اللى ما ولدوك ... زمن المماليك !

[&& اشكوزا &&]

الهلال الجديـــــــــــــــــــد

هل هلالك شهر مبارك ،
يشبه ضحكه سهيانه .
ضحكة مخبية ، معبيّه ،
ضحكه مليانه
أسرار خفيانه .
آه يانا يا جديد من سِرّك
آه يا نا .. يانا .

غمّت عنيا على هلالى ،
و ندهت لأصغر أطفالى ،
سيَّبنه دروسه
لجل استفتح شهرى بصورته ،
و ف قورته أَبوسه ،
و استنى الخير من دنيانا ،

أنا بوسته ، و فَتّحت ،
بصيت له ، و سرحت ...
كان راخر برضه ، بيضحك لى
ضحكه سهيانه ،
مليانه أسرار خفيانه
... يا محتار يانا .

[&& اشكوزا &&]

بهــــــــــــــــاء ابنى

عينيا بتزغلل ... و عقلى متبرجل ،
و شركة الطيران ... قالت : قوام انزل ،
مسافر اليابان ... و الوقت كالثعبان ..
دى شنطه ، و ده باسبور ... آه يانا يا غلبان ...!
دماغى مخووته ... و طافح الكوته ،
خلاص على السلم ... و بابوس ، و باسلم .
قَاللى بهاء ابنى : ... احكى لى حدوته !

[&& اشكوزا &&]

بعد الفطـــــــــــــــــــــــار

عينى غفلت حبتين ، بعد الفطار
كل عام و انتم بخير رمضان كريم
عينى غفلت ، م التعب طول النهار ،
و المجاهده ، و المناهده ، وسين وجيم ،
لحظه و التانيه ، و بعد اللحظتين ،
جانى احساس إن حد دخل قعد ،
و ابتدا يسبّح ، و ابص بنص عين ،
نص قلبى انسرّ ، و النص ارتعد
شفت بيرم .. أيوه بيرم .. أيوة هوّه ..
لبده مصرى ، جلابيه مغربى ،
شمَله شامى ، سبحه من أرض النبوه
حد ما يعرفش بيرم و النبى ... ؟

شفت بيرم ، بالصديرى اسكندرانى ،
شفه ، متلفع بشال من العراق ،
و الحزام يمَنَى ، و عطر الايد سودانى ...
حد ما يعرفش بيرم يا رفاق .. ؟

ضحكته المره اللى بتنقط عسل
قلت : خير إنشاء الله قال : فين الديوان .
فين ديوان بيرم ) ما بطلتوش كس ...؟
قلت له : معلهش قال معلهض إيه !
و نا تايه عن بلدنا يا ولد ... ؟
البعيد عن عينها ، يا حسرة عليه ..
يا بلدنا ، يا حلوه ، آه منك بلد !

قلت له : راح نحتفل بك قاللى : لا ،
احتفالكو وفّروه على نفسكو
قلت له : ح نشيد بفضلك قاللى : ها ،
فضلى فين ، إذا كنتو ناسيين درسكو ؟

قلت له : علَّمنا : بيرم قاللى : شوف ،
المياتم فى الأزة ملطَّعه ،
أنا مش عايز كراسى صفوف صفوف
أنا .. صفّولى حروف المطبعة !!

[&& اشكوزا &&]

أمانــــــــــة يا للى

أمانة يا للى على باب الانتخاب داخل ،
من قبل مسك القلم ، و الخط ، تتماهل .
اسأل ولادك ، فى سرّك ، بكره عاوزين إيه ؟
الحكم يظهر ، و تلقى الحل بالساهل .
عاوزين أمان يابا ، عاوزين لاشتراكيه ،
مدخول كفايه ، و عدل على الجميع شامل .
الأرض فى ايدينا يابا ، و عندنا الفواريق
عاوزين ايدين ثورويه ، تشقلب التربه ،
تخلى عزبتنا تدى الغله بالكامل ،
عاوزين عقول ثوريه ف مجلس الامه ،
رايده اللى رايدينه ، عارفه الحق م الباطل ...
اختار لنا يابا ، خلق تغيرّ الدنيا ،
و لا عندناش فرق بين الست و الراجل ،
و لا حد يخدمنا ، جنب زعمينا ، غير يابا
المثقف الثورى و ( الفلاح ) و ( العامل ) ...

آدى اللى فيهم !

[&& اشكوزا &&]

تركى بجـــــــــــم

تركى بَجَم .. سِكِر انسجم
لاظ شقلباظ
اتغاظ هجم
أَمان أَمان ... تركى بجم

دبور جبان من غير زبان
زنّان كبير ... يمضغ لبان
يسمع نفير يخاف يبان
أَمان أَمان ... تركى بجم

سوس بازفان ... اقطع لسان
عربى واقف لك ديدبان
ادخل تموت جّنات مكان
أَمان أَمان ... تركى بجم
سيكتير زمان ... سيكتير كمان
ادخل ح نضرب فى الملان
خليك تقول أَنا جلفدان
و لا ينفعوك الأمريكان

[&& اشكوزا &&]

دعايــــــــــــــة انتخابية

آلوه ... آلوه ... يا أمم
تعالالى لالى يا محترم ..
الحمد لله ، انكم
ما بتعرفونيش كلكم .

لو كنتو عاوزين أسطوات
أنا أسطى سواق ( الفيات )
و إن كنتو عاوزين فلاحين
أنا عندى حبة فدادين

و الا انتو عايزين يا ترى ،
مرشحايه مغندره ،
متبدَّره ، و متحمره ،
إذا كان كده ، فأنا ( .... )

[&& اشكوزا &&]

رجــــــــــــــــــز

على قراب السيف ، ارتكز .
و على رنين السيف ، أَتجز .
جرّدت نصل الشعر ، من قراب
النحو ، و الإعراب ، و الإَعراب ،
من أجل ما يشفى ، و يشتفى ،
من أجل ما يكفى ، و يكتفى .
فى حربكم .. يا غزوة الندم ،
يا أوصياء الشعر ، يا قمم ،
يا من فقدتم عمركم هبا ،
أَهلا بكم ، و أَلف مرحبا ،
أَردكم أَنا أَقل القوم
أَصدكم ، بلفظ كل يوم :
بكلام قلب الناس فى الخفا ،
و بهمسة المحب فى الصفا ،
و بزعقة الفلاح فى الحقول ،
لما الغراب ينقر البقول ..
فى وقتنا ، ما ينفع الحجى ،
إلا نعوت الذم و الهجا .
عجبى ، و يا عجبى لآلهة
فى جبل (الاولمب) ، تافهة ،
ما قِدرت تكلم البشر ،
فحررت شكوى كما الدرر
و قال عرض الحال : يا وزير ،
نحن الموقعين ، نستجير ...
الخلق لا تهوى سوى الجديد ،
سوى الكلام الحق و المفيد ،
و العين يا مولاى ، مبصرة
و اليد يا مولاى ، قاصرة .
ارأَف بنا ، و انظر لغلبنا ،
اقذف بنا فى وجه شعبنا ،
قل ان فن غيرنا حرام ،
و تفضلوا بقبول الاحترام ،

ووقعوا :

العزى ...
هبل ...
طبَل
و هكذا ، مخص الجبل !
يا خيبة الأمل !

قال القدامى : الضرب فى الكذا
كذا ، و طبعى يكره الأَذى ،
و ربما أَثى لبؤسكم ،
يا مضحكى الثكلى بيأَسكم ..
لكن ، أوان الهزل للأَسف
مضى ، و يوم حسابكم أَزف .َ

[&& اشكوزا &&]

رد ...

الشارع قال للحارة :
إخييه ...
ريحتِك طعميه ، و فول و بصارة ...
آييياه ..
كل بيوتك بغدادلى
مافيهاش تكييف
و بيبانك نازله لتحت ، بدال ما هى طالعه لفوق ،
و لا حتى ليكى رصيف ،
سِتّاتك بلدى ، و ليل و نهار ع العتبه
قاعدين كده جوق ....
رِجَّالتك نكته و عجبه ،
و لا يعرفوا ذوق ،
و عيالك دول ،
نسانيس مقاصيف الرقبه ،
.....................
الحاره ردت رد ..
خلى الشارع ينسد !

[&& اشكوزا &&]

رســــــــــــــالة إلى جندى

يا بن عمى يا للى فى الخط الأمامى
لك سلامى ،
و سلام أطفالى ، و مراتى ، و أبويا ،
و امى ، و اخوالى و عمامى ...
كلهم فى خير و مشتاقين إليك
كلهم متلهفين ترجع لنا ،
و كمان من عندنا يسلم عليك ،
كروان الفجر ، و البط اللى سابح فى القنا ،
و إبراهيم و حسين و ماتعتّش أسامى
يا ابن عمى ،
يا للى عنوانك فى خط النار بعيد ،
شِدّ حيلك ، كلنا وياك هنا ،
مدفعك جبناه حسب وصفك شديد ،
من دمانا صبّيناه صلب و حديد ، قاسى و عنيد ،
صب منه ع الأعادى كرهنا .
خد من الرجعية تارك ،
خلى كل الدنيا تسمع فرقعة رعد انتصارك ،
و الجميع يا نور عيوننا ،
فى انتصارك