استراحة الشاعرة (رشا عبد الرزاق)

[&& اشكوزا &&]

الشاعرة الجميلة
رشــا عبد الرزاق

شابة جميلة
اشعارها تحمل كل معاني الجمال
وتعكس واقع البنت المصرية الجدعة

وهذه الصفحة ستكون واحة لكل اشعارها الجميلة

الموضوع سيكون مغلق
لكن اذا اعجبتك القصيدة
استخدم خاصية الشكر


الموضوع متجدد ان شاء الله

دومتم بود

[&& اشكوزا &&]

مش قلتــِلـَك
مترفعنيش
لأعلى من السما السابعة
انا قلبي سكن ع الأرض من آخر مــِتين وقعه
يا ريتك خــُنتني أسهل
خيانة قلب / لحظة طيش....
بتنداس لــجل ما نكمل
وفوق كفي تتوب مره .... ونبدأ تاني م الأول
لكن أبعد تقربني ؟
وأقرب ... فجأة تبعدني !!
كلام ساكن في رمش عنيك سرقني وراح مدوّبني
رهان على قلب كان حيران
كسبتُه .... خسرتُــه .... ايه يعني ؟ !!
وامتى الحب كان يعني في عز الحر صفصافه ؟
واذا كان الكلام باعني (عنيكي لقلبي متشافه...
أنا وعدك يا هربانه بسنين عمري .... وخوافه )
يا ريتني فضلت خوافه
من الماضي
من الحاضر
من الموعود بمستقبل
أنا صدقت قلبك ليه ده طول الحلم كان أجمل ؟
..... يا صبر الطيبين قلبي وقع ع الأرض واتكسر
حروف الإسورة جرحتني .... طرطش دمي واتبخر
هرب من قلبي طيب ليه هِرِب على قلبي متأخر
ومش قادرة أقول خايفة
عشان مرضيش يطمني
ومش قادرة أقول عارفه
عشان عارفه انه فاهمني
ومش قادرة أترمي على كتفه .... وأتمناه يحايلني ...
ولا هنساه ....
ولو عايز هينساني
واجمل ضعف عشته معاه ....
سجني .... ورد سجاني !
يا آهة اتعلمت بالقوة امتى تموت على لساني
فمقدرتش.....
فمقدرتش في آخر لحظة أبص ف قلبه من تاني
وغمض عيـــنُــه ...
راح لبعيد ...
عشان ميشوفش أحزاني
وفاكر اني معرفتوش
وفاكر اني ما معرفتش لمين رايح ولا شفتوش
هتبعد ؟
قولي رايح فين ؟
دواير توهة واللا خدوش !!
نهاية لمتك لجروح ... تعيش مخلص تموت مغشوش
ويا ما وياما _ لو لفيت _هتلقى المخلصين فــِ وشوش
ومن جوا الورق فاضي ....
بتقرا ازاي.... حبيبي رتوش ....!
بتتهجى الوجع ...... حاسب ...
لو أَبــْعــِد
يبقا مين هيحوش ؟

[&& اشكوزا &&]

ومِسيري يوم أجري لعنيك وتجيني قبل ما أكملـَّك
ومسيري لما أنويك كلام
يرضى اللسان
واتكلمَك
ومِسيري أطويك صفحتين
بينهم زمان اللي انتهى
لما ابتداكْ من أوّلـَك
ومسيرَك انتَ تِحنـَّلي
ترفع عنيك على مشربية بلون عنيَّة تُبصلي
وتقولي :"يا اللاَّ.... هتنزِلي "
وان قلت "امتى؟ " هسيب عنيك
تستنى تحت و أبُصلـَك !
ومسيري يوم أحدف عليك
من ضيْ نـِنْ العين مَطر
وأتملَّى فيك لما تلاقيه
على أرض بتساع الخطر
تطرحني قلب كبير
يطير
مطرح ما ترسي يدُقـّلـَك !
ومِسيري أرتاح من سكاتي في كل قسوة شوق اليك
وانزل على رفة وجع
تعرفها لما بغير عليك
تحلف
أصدق
كل مرة
وكل مرة أكدبـَك
ومسيري أضعف فوق كتاف الحب واتنهد أوي
ده انا ياما جوايا ادَّاريت وداريت على الناس بالأوي
وسمعتهم ... وسكت ليك
ده ان كان جليد
هيرقلـَك
ومسيرك انت تكون شقاوتي
وضحكتي
وأجمل سؤال
يسأل لسانك أنكسف
وعنيك تملِّـيني الدلال
أغلط ...
تتوه ...
تزعل ...
أتوه
ومسيري يوم هتعلمَك !

[&& اشكوزا &&]

مَـصر مش هيَّه الحكومه

مَـصرمش هربان ونايم

مَـصر"طيَّب " بالضرورة

لو يـِبان بالظلم

ظالم !

مَـصرمش رقْص وغناوي

مَـصرمِش حـَبّة كسالى مرْصوصِين فوق القهاوي

مَـصر مِيِت مليون مُناضل

فيهُم النـّـَفـَس اللـِّي مَحْـشـُور



فـِ الضّوافِر

لسَّه قادر ..

يِبْقا وقت الجَرْح تَضْميدَهْ على الدَّم اللي نازل

يبقا سَنْدِةْ كِتْـف مَكْسورة وِمَبْدورَه على هَـدَد المنازل

يِبْقا طَلـْقـَة فـِ صِدْر مُجْرِم

لما يـِتـْلـَقـَّى بـِعَزْم الصَّبْر شَلَّال القَـَنَابل

يـِبْقا لَمْلـَمِةِ اللـِّي فاضل

وارْتِجاعو

مَصْر مش هِيـَّه اللـِّي بـِتسَلـَّم على ايـِدين إللّي باعوا

مَصْر مش هِيـَّه اللـَّي بِتوَطـَّي في صوت الحَقْ من بعد ارتفاعو !!!

مصر يعني ... كل مصري

ياما مَاتوا جُوَّا مصر وبرَّا مصر وياما ضاعوا

وياما آسوا

وياما صـَلـْبـِةْ ضَهْرُهُمْ عـَدِّتْ مَصايب

ياما طول الصّبْر قوّاهم على زَعـْق الغرايب ...



إللـَّي زَفـَّتْ لِيهُم الموت بـِالزَّكايـِبْ

واللـّي رَفـِّتْ رِمْشُهُمْ مع كُل صُبْح بـِهـَمْ صايب

واللي عايزين يـِلمِسوا وجعك يا غزه بقَـلـْب طايب

آه يا غزه ....

إنتي نازَفـَه وجَمْبي نازِف بالوَجَعْ مَعَ كُل غـَزَّه

إنتي فاكرَه الدّم هايـِنْ ؟

إنتي فاكرَه المَصْري يـِقـْدَرْ يِبْقا خايـِن !!!

لو على دم الشهادة

يبقا طول العمر دايـِن !

لو على شرف العباده

يبقا بـِيْحاول...وِصاين

إنتي فاكره المَصْري خايـِن؟؟

أوْ مُنافـِق ؟

أوْ بـِيـِتْحَجِّجْ بـِعَجْز الحِيلة غيرْ ذُل الحقايـِق؟!!!!

والا فاكرَه ان احْتِلالِك

خيط مَهُوشْ مَوْصول بـِقَهْرْ المَصْري مِنْ دون الخلايـِق !!

لَجْل لمَّا تِنادي يـِسْمَع

نـَدْهِتِكْ تِدْبَحْ....

وِتِوْجَعْ

والغضب _لَوْ كان مالينا_ لجْلِ خاطرِكْ سَهْم راشِق

رَشْقِتـُه بـِتْدوُر عَلينا .... بالرّقابْ فوق المَشانِق!

واللـَي كان قايم يا غزه

يبقا عايز ألف قـُومه

لو تـِبان الخطوة عاجزه

تبقى مقـْطـُوعَه على السّكـَّة مَهيشْ ماشيَه على رِجْل الحكومه !!

مصر من جُوَّاها عايزَه....

لأ أ ّ

مش هِـيَّـه الحُكومه .

[&& اشكوزا &&]

ولما أبدأ
أخط الخط بتزوق
وتندهني يا ناس روحي
وبتلزق
عشان أفرح
ويجري الفرح م المطرح
أروح ماسكاه
وأقوله : متختشي مره
ولو سرقه
ده أنا هنطق
يقول : ماشي عشان تُرزَق
ويعملي كمان قهوة
ويفرد ع الجبين ورقه
ويكتبني بخط أزرق
يا بايخ زي يوم العيد اذا عدا بدون فستان
خلاص يعني مهنش عليك تفوتلي بالتة الألوان
؟؟؟؟؟؟
يقولي اللون ده من توبك
ومولود الكلام عنوان
خلاص يا فصيح هتتفلسف
كفاية تجود عشان أعرف
بإني لسه جوا حروف
ولسه بخاف
ولسه من إللي جاي بتشاف
ولسه بحن للدقه إللي وسط البرد تبقا لحاف
ولسه بقول أنا بنتك
يا بحار....والزمن مجداف
.........
وبيزمزق أهو مني
هيمشي خلاص
ثواني لسه فيه كلمة فِـ قلبي لجل لأغلى الناس
وحشتوني
ملامحي زي ما هيه
وصوتي بالكلام غيه
عيوني ع الشطوط لكن
نصيب قلبي معديه
وفرح قليل
وحشتوني
يا رنة عمري بالمواويل
بيرميلي الفرح منديل
خلاص ماشي
؟؟!!!!
أكيد راجع
دا حمَّال الأسية يشيل

[&& اشكوزا &&]

لا تقاطعني رجاءاً

لا تقاطعني رجاءاً
حين أكتب لك حرفا يتشابك في حرف ، ليخط كلمة من بعدها كلمة وكلمة .....وسطرإالى صفحات
من ثرثراتي
حتى لا أتذكر طقوس الصمت التي تعلمتها حد الإجادة
بأصعب الأدوات


لا تقاطعني رجاءاً
حين أضع في خلفية اللحظة تلك الموسيقى التي كانت تحمل لي _ دون موعد _ صوتك
حتى لا أعود إلى موسيقى اللا صوت ....
في كل الألحان التي أسمعها دوما
ولست تأتي بعدها


لا تقاطعني رجاءاً
حين أعقص ضفيرة من الإحساس العذري
وأنطلق بلا حد في تلك الحقول التي كنتَ دوما خلفها ....
تراني
حتى لا أعتكف في صحرائي من جديد ...
كي لا تراني


لا تقاطعني رجاءاً
حين أستسلم لتلك الرجفة التي تنهض بالإحساس الى حافة السماء
وتخلق في عنفوان الربيع أجمل إسم لكل الأشياء التي لا تُسمَّى
حتى لا أقسم على نفسي أنني أرتجف فقط
... لإطلالة الشتاء


لا تقاطعني رجاءاً
حين أسامر أبيات شعري التي انتظمت على أوزان حبك وصاغت أسطورة لقائك وفقدك ...
وأَمِنَتْ ...
حين آمنت أنها قد هُزمت يوم هزمنا القدر
حتى لا أستيقظ على آخر بيت أخبرتني
فيه أنك الحلم الذي تركني
بعد أعظم عهد باللقاء

!!

[&& اشكوزا &&]

يا ربنَّا
من ييجي كام مليون سنه بَعْصاك وقلبي بيهجُرك
من أد إيه بوعد ومش بوفي وتدعيني وانا بستمْهِلَك
واما تناديني الأمنية
بِرضاك
تاخدني المعصية
وتلف بيَّه الدايره أشكي التوهة وأرجع أحنلَك


يا ربنَّا
لوفاتت الأيام عليَّه سنين بتسرق بعضها
لما تلاقيني بمد إيدي لحب غيرك رُدَّها
الخوف على الدنيا انكتب
والضعف ليه مليون سبب
وانت القوي فوق الخطايا وفوق سمانا وأرضها


يا ربنَّا
أنا مش بعيط لجل ليله تعدي وأرتاح بالدموع
زوَّادي يبقا القرب وأبعد واشتري بالدنيا جوع
لو ضلم الاحساس أوي
اشرق على قلبي القوي
واحيي اللي مات قَبْلِنْ يموت اللي مَيِمْلِكْشِ الرجوع


يا ربنَّا
يا اللي متصعبشي الهدايه عليك وقادر ع القدر
يا اللي مبتردش دُعايا وانت أقرب للبشر
من ضمة الروح للوريد
من فرحة الصايم بعيد
اجبر طريق اللي عرف معنى الكمال لما انكسر

[&& اشكوزا &&]

حوانـيت الكــلام ... قـفلـــتْ

وداريني
من الحلم اللي متلخبط على وش الكلام داري
وخليني
أكمل سكتي مش خايفه م الآخر في مشواري
نطير والأرض تبقا جناح
أنا عايزه اللي جاي فرحه على جبين النصيب ترتاح
و(ممنوع) الفراق كلُّه
ولو خيط الوصال مغزول بأوجاعنا في توب ضلُّه
وممنوع في الغرق موتي
مدام مسك الشراع ملاح
!أنا مش أد يا بحر الغرام غدرك
ولا في برّك......
لقاني وراح
ولا أد الجراح تتمس
يا راسم كلمتينَك غنوة مرصوصه في سِياجَك رص
متسألنيش عن القمر اللي مش قادر يكون فرحان
ولا قادر كمان يحزن
و تتعصب أوي جدا
عشان الضحكة لو قامت على كتاف الأدان تدّن
يقوم الفجر لو باهت
لكن بايت....
بخير جدا
لا طال حلمُه...
ولا طال النهار موجوعْ
....
....
....
....
....
حوانيت الكلام قفلتْ
وباعت للقلوب الوقت
(عزيز عيني)
على عيني ....
يكون الحلم مش دلوقت

[&& اشكوزا &&]

بَــواقِــي طُفُــولْتـِــي

بودع فيك بواقي طفولتي يا صحبي
واعاتبك ليه
وداعك فيه رضا ربي
وداعك كان معاد مكتوب على جبينك ومتخبي
ومكتوبي خلاص أكبر
وانا جواك يا دوب بحبي
يا نن العين
أنا هيه
اللي شدت خطوها بعمرك
عشان عود الشباب يتشد
اللي كانت سانده أحلامها على كتافك
ومتحاوط عليها بسد
اللي عاشت بيك كلام تاني
معاك اتقال
وفيها اتمد
أنا "الحدوته" ...و"الدلوعه"....و"الضحكه اللي زي الورد
"أنا وسط البنات بنتك
على قولك " يا دوب البنت "
عرفت ازاي يا صحبي كبرت
عرفت ازاي أنا هيه
!اللي صحيت فجأه
عرفت فجأة
فين وقف الحنان ووقفت
من الساعه اللي لما ناديت عليك فيها ولما سكت
وبُست عنيك
عارفها عنيك
؟
على مرايتي هشوفها كتير وطول ما الضي ده في عيني
وليه يا وشوش بتبكي عليه وليه عماله تبكيني
محدش فيك يا أغلى الناس يطبطب أو يعزِّيني
عشان دمعي اتحبس على مُجريات كِتفك
وكتفك فين
؟
عشان منتش يا دوب بابا
ولا حزني عليك آهه اذا طالت تكون حرفين
ولا نار الفراق بركان
بواقي طفولتي كانت فارس الفرسان
كانت حضني اللي بيك دفيان
ومية حب ترويني ومتملش من العطشان
كانت شِعري
اذا قُلته
عشان يرضيك ولمُت عليه
كانت خوفي اذا اتحجج عشان بإيديك تُطُل عليه
ويتمايل على ضفرتين
بواقي طفولتي في وداعك
بودعها وأشيلهالك
على معادنا
في نن العين

[&& اشكوزا &&]

أصعب الحاجات

إنك تبقا واثق ومتاكد إنك بتبذل أقصى جهد مع نفسك ... مع دماغك .... مع وقتك ... في شغلك ... مع اهلك ... مع قلمك ....
تبقا واثق ومتاكد إنك بتستنفذ أقصى طاقاتك
وبينك وبين نفسك تبقا عارف ومتأكد إن ده مش كفايه ...
وإن شكلك بيعكس غير كده
وإنك بتأكد بعكس الحقيقي اللي هو صدقك وآخر ما عندك
حاجات
مينفعش تحلف عليها
مينفعش تتصدق إلا بالنتائج
إلا هيه مش بإيدك
وفي الآخر
تصدق إنك مقصر جدا في كل ده ...... تصدق ... وإنت بس إللي عارف ... إن دي مش الحقيقة

......................
......................
......................
......................

إنك تستعبط .... وتعمل مش عارف إيه اللي ناقصك ...
لأ ... وتحلف للناس ويمكن لجواك كمان
إنك فعلا مرتاح كده ... مع إن يمكن كده هو مشكلتك ...
يصدقوك ... مش عشان شكلك بيقول إنك مش بتكدب ...
بس يمكن عشان هم عايزيني يصدقوا
يمكن لما يصدقوك هيستريحوا ....
وده اللي إنت كتير بتبقا محتاجله ... عشان متفتكرش

.......................
.......................
.......................
.......................

إنك تبقا عارف إنك مركز أوي في حاجات مش هتمشي غير لو بطلت تركز فيها أوي .... ...
ومهما ركزت اكتر مش هيحصل منها إلا على أد ما بيحصل .....
وتلوم نفسك بالجامد جدا .... عشان إنت مش بتركز في بقية الحاجات......
المهمة
وانت مش خايف من الحاجات ... إنت خايف من لحظات التركيز فيها

......................
......................
.....................
......................

إنك تبقا لوحدك أوي ............ والناس كتير