نختم عددنا ونقول
كل شبر بهالوسيعة ملك ربي تعلمين
وأعلم إن اللي خلقني هو خلق لك هالعيون
لكن انتي من جلستي وانتي فيني تحدقين
كن ما به ناس غيري بهالكراسي يجلسون
لو سمحتي عاد أسمعي وحتى لو ما تسمحين
المهم اللي بقوله تسمعينه و يسمعون
ع الأقل ليا نظرتك سوي روحك تستحين
غضي طرفك مثل غيرك خوف ربعي يلمحون
الركادة عاد زينة والحياء فـي البنت زين
وفيـك جآزم لا ركادة ولا حياءٍ يذكرون
تعرفيني ؟! أعرفك ؟! ما أذكر إنا ملتقين
لا أعرفك من تكوني و لا تعرفي من أكون
وإطمأني إن كان قصدك بس فيني تشبهين
ما هـو أنا إلي تعرفيه والبشر يتشابهون
مـا دريتي من التشابه يخلق الله أربعين
وأعرف أربع يشبهنك بس والله يستحون
وإن كان قصدك شي ثاني عاد قولي وش تبين
خايف إنا نصير فرجة وإللي ما شتروا يتفرجون
وإذا ببالك عاجبتني لا يحوشك تحلمين
صح ربعي من جمالك فيك صار يمدحون
بس وش لي في حلاتك دام فيها ترخصين
حشمة البنت وحياها والكرامة يلفتون
ولو توفر فيك هـذا مع حلاتك تبشرين
ما هو أنا ألف غيري باب بيتك يطرقون
وش علامك رغم كل اللي أقوله وتسكتين
مو طبيعي هالسكوت وهالبرود وهالسكون
إنتي خرسـا أسألك ولا منتي تسمعين؟؟
قالوا ربعي ذي كفيفـة قلت لا لا تمزحون
لين شفتك يوم رحتي يمسكونك باليدين
ما دريت إلا عيوني أربع أربع يذرفون
آه ياني منه مشهد يوم شفتك ترحلين
جيت اشوف عيون ربعي لقيت الكل يدمعون
يالكفيفة يالعفيفـة إن قلت آسف تقبلين؟؟
يغفر الله ذنوب عبده ليا خطا وهل تغفرون ؟؟
المفضلات