بطل تناكه وعيش عيشه اهلك
بنسمع كتير جمل من دى :
- يبنى بطل تناكة و عيش عيشلة اهلك بقى
- مش عاجبه حاله .. خلاص مبقاش فى حاجة عجباه
- بيتكبر على البيت اللى اتربى فيه و عاوز يسيبه .. بيتكبر على ابوه و امه
- ما ربنا ساترها علينا اهو و احسن من غيرنا .. نتحسن ليه بقى ؟
و من ناحية تانية :
- انا مستحيل ادفن طموحى فى المكان الحقير ده انا مكانى مش هنا
- مبقتش قادر استحمل العيشة هنا خلاص
- انا حظى وحش و كل السكك مقفلة فى وشى .. بس لو تجيلى فرصتى هئب على وش الدنيا
.......... الخ الخ
كلها جمل بنسمعها كتييييييييير مش بس فى الافلام و فى الحقيقة كمان
دايما الاعلام بيصورلنا ان اى فقير يوم ما يحب يسيب مكانه تحت السلم و ييكبر يبقى متمرد جاحد عاق لابوه و امه .. و كاننا مكتوب علينا الفقر يعنى
و يصورلنا بردو السلبى اللى فضل عايش طول عمره تحت السلم ما حسنش من نفسه انه كدة راجل طيب و فى حاله .. و بياكلها بالحلال
يعنى هو الشغل و النجاح و الرغبة فى تحسين الوضع حرااااااااااااااااااااام ؟؟
سيبونا من الاعلام
وتعالوا نناقش
ايه الفرق بين الرضا بقضاء الله و السلبية ؟
و ايه الفرق بين الطموح او الايجابية و بين السخط على القضاء و القدر ؟
باختصار .. السخط هو الا ترضى بما قدره الله لك و تتمنى تغييره
اما الايجابية و الطموح هى الا ترضى بما تفعله انت و تحاول تغييره
يعنى ايه ؟؟؟؟
مثلا لو فى موظف بيشتغل فى شركة و بيقبض مرتب .. بس المرتب ده مش كبير و هو عاوز يحسنه
فى احتمالين :
اولا :
- يقعد يقول اعمل ايه تانى يعنى اموت نفسى؟ انا بس حظى وحش
- الكوسة هى اللى ماشية و انا ما اترقتش عشان ابن اخت المدير معايا مع انى اقدم منه
- الشركة اصلا وحشة و مش مقدرانى و انا عاوز شركة غيرها
- يعتبر ان كل ثانية بيضيعها فى الشغل كتر خيره اوى عليها .. و مش عاجبه المرتب
التانى :
- يشتغل ليل و نهار و مهما اشتغل ما يعجبوش بردو و يقول لا انا ممكن اتعب اكتر
- يحب الشغل و يديه من وقته و مجهوده كتير
- يرضى بالمرتب مهما كان قليل لانه نعمة .. بس مش عاجبه شغله و دايما واثق انه ممكن يقدم الاحسن
الفرق بين الاحتمالين ان الاولانى سخط و تمرد على قضاء الله اما التانى هو فعلا الطموح لان الله قدرله يبقى فى الشركة فى فى المكان ده فى الوقت ده .. و هو مش مطلوب منه غير يشتغل و بس من غير حجج .. ولو عاوز يتحسن بجد يبقى يحسن من اداؤه اولا .. حتى لو مالقاش مقابل فورى لازم يثق فى "ان الله لا يضيع اجر من احسن عملا"
الرضا و الحمد هو التسليم ان اللى ربنا قدرهولك ده هو احسن حاجة ليك و مهما كان هو نعمة كبيرة
لكن السلبية انك يبقى عندك اقتناع ان مجهودك جبار و مفيش اكتر منه و انك اكتر واحد شغال فى مصر و الشرق الاوسط لكن حظك وحش و مش واخد حقك و اللى حواليك مش مقدرين الجوهرة اللى معاهم
ولا تنسى
ان الله لا يضيع اجر من احسن عملا
اجتهد ولاتقف مكانك
وسيبها على اللى خلقك
وتوكل على الله
رد مع اقتباس
.gif)
المفضلات