غزة - للشاعر / اكرم حسن احمد
غزة - للشاعر / اكرم حسن احمد
خمسه
أربعه
تلاته
اتنين
واحد
..
أعداد كتير لكن
نفسي
نكون واحد
ونرجع المه
نمحي.. سنين غمه
أحنا صحيح أمه
ولا خلاص ..راحت
عايشين.. بنظلم بعض
واعشقنا ليه.. البعد
والله ميت صدام
ما يساوى
بوش.. واحد
..
خمسه
أربعه
تلاته
اتنين
واحد
..
رغم الهبوط
لكني .. مش جاحد
بصلى
بصوم
بوحد الواحد
لكن مافيش
واحد
قادر يشيل السيف
ممكن يكون
الخوف
ولا تلاقيها ظروف
ولا عشان.. البطل
خلوه فى يوم العيد
خروف
..
خمسه
أربعه
تلاته
اتنين
..
انت وانا
فاضلين
يانعيش وراسنا لفوق
يا دنها
ف الطين ..
ممكن نعيش ف الحي
لكن.. ح تفضل
حي
مين اللي فاضل.. مين ..
هو صلاح الدين
عايش
بأمجادوا ..
واحنا
مابنا كتير
رغم النفس ماتوا ..
تهنا ..
مابين السكك
ماعرفنا فين.. ريحين ..
هاتها شمال
هاتها يمين
توه
بين الزحام والعدد
لكننا
نايمين ..
او اننا صاحيين
لكننا خايفين ..
او اننا شجعان
لكننا خايبين ..
او اننا شاطرين
ايوه صحيح.. شاطرين!! ..
شاطرين
نقول احنا
الفن والمعنا
والرقص والمغنا
والهيصا تجمعنا
واحنا
وأحنا
وأحنا
وأحنا
وأحنا
واحنا متين.. محنا ..
القدس
مش أحنا
وعرقنا
مش احنا
وغزه
مش أحنا
ولآ احنا.. فين رحنا ..
سدوا حدود العرب
فتحوا خطوط النت ..
البت تتمايص
والواد بيصبح
بت ..
ف غزه
شايل حجر
واحنا
ف ادنا رموت ..
مولود ف حضنه الكفن
واحنا
نخاف م الموت ..
تلاتين سنه
وخايف
انه يعيش
وحده ..
انه ينام
وحده ..
وياسعده يابخته
لما
يقول ماما
وكل احلامه
بت
اسمها نانا
من كام سنه واحنا
احلامنا تعبانه ..؟
من كام سنه واحنا
افعالنا تعبانه ..؟
..
خمسه
اربعه
تلاته
..
والله العظيم.. تلاته
ليعود عمر
ويعود معاذ
وان حد عاز المصطفى
موجود مامات
بس احنا ..عاشقين السكات!!
حتى انقطع بنا
الرباط
لكن ورغم اللي انقطع
في ميت ..رباط
ح يطلعوا مليون صلاح
ويرجعوا كل اللي راح
لكن ف وقت الانقطاع
انت اللي موجود ف المساحه
وانا اللي مرمى ع البساط
..
خمسه
اربعه
..
غزه
سكت الكلام
غزه
كتر الكلام
غزه
والدم سال
غزه
مات الجنين
غزه
مليار ونص اتفرجوا
وقلوبها زى الحجر
ولا غزهاش غزه
..
خمسه
..
من كام سنه
. ماشيين
و لسه.. ما وصلناش
من كام سنه
عايشين
و لسه ..دورنا ماجاش
من كام سنه
نا يمين
و حتى.. ما حلمناش
من كام سنه..
و احنا ..
تاهة ملامحنا
رافضين.. نكون لمه
و الرفض.. طال لما
انكسرت ..الضمه
و انفتحت الأوجاع
و الدم سال
ع الأرض
و روحنا نبني سلام
ف روحنا ..
مرجعناش
..
خمسه
اربعه
تلاته
اتنين
واحد
اعداد كتير لكن نفسى نكون
واحد
اعداد كتير لكن
نفسى نكون
واحد
رد مع اقتباس
.gif)
المفضلات