قـسـمـة ونـصـيـب .....
(يونيو 2008)
س: إيه يا مها.. هتفضلي كده كتير؟
مها: وماله؟
س:الواحد حبيبتي بيتعلم من تجاربه مش يقعد جنبها ويعيط ع اللي راح.
مها: نفسي خلاص اتسدت.
(يوليو 2008)
ص:الأيام بتعدي والعمر بيجري وعايزة افرحلك بأه. انتي مزوداها أوي بشروط وتحكمات تخنق.
مها: المرة دي لازم اختار بمزاجي وعلى كيفي.
ص: بس مش كده! قعدتك طولت وغيرك أصغر منك معاهم...........
مها: مش عايزة كلمة زيادة.. انتهينا.. بجد اتعقدت.. كفاية
(أغسطس 2008)
ع: غيرك حصله أكتر من كده يا بنتي وبيكمل حياته.
مها: بس انا مش قادرة انسى.
ع: مش قادرة تنسي؟ مش ده اللي سابك في وقت كنتي محتجاله فيه؟
مها: ممكن نغير السيرة دي بأه؟ اهوه راح لحال سبيله.. ههههههههههه..عموما بكره هيندم لما يقع في أرابيز واحدة تطلع عينيه.
(سبتمبر 2008)
ك: بصي يا مها فيه واحد زي الفل أعرفه كويس وهيعجبك وقريب من الشروط اللي انتي حطاها،، أقولك.. وافقي انتي بس تشوفيه الأول، بعدين ...................
مها: حيييييييـلك حيلك حيلك،، اشوف مين يا ماما.. بصي، اطلعي من نافوخي انا مش نقصاكي.. وبعدين نفسي اعرف انا مدايقاكو ف إيه.. انا مرتاحة كده من غير وجع دماغ وقلبة مخ.
(أكتوبر 2008)
الحال دلوقتي اتغير بعد ما عدت أربعة شهور على إحساس البعد اللي كنت فيه..
أنا دلوقتي عايشة تجربة حسيت فيها راحة عجيبة وانجذاب من أول نظرة.. شعور غريب ان نصيبك اللي كنت بتدور عليه كان موجود في يوم من الأيام في مكان في العالم ده وأخيراً وصلك بعد ما كان تايه منك..
اسمعني كويس،،
إنت انسحبت من حياتي ف وقت غلط،، وظروف ماكنش فيه حد غيرك ينفع يقف معايا فيها إلا انت،، عيشتني أحاسيس صعبة،، وموقف الندالة منك ده مالوش غير معنى واحد،، ان انا اديتك مكانة مش على مقاسك،،
انت ما تعرفش إحساس ان محدش يرن عليك وما تصرفش فلوسك على كروت شحن ولاتحويل رصيد،،
لا تعرف تبعت رسايل ولا تتزنق فتبعت كلمني شكرا ولا تفلس فتبعت سلفني شكرا،،
عزيزي نوكيا 1100،،جالي سيد سيدك وبالسلامة السلامة يا حبيب قلبي..
تقدروا دلوقتي تباركولي..
اشتريت موبايل جديد بعد انقطاع عن عالم التليفونات والذبذبات والشحن والرنات..
زغرطي ياللي ما انتش معانااااااااااااااا
رد مع اقتباس
المفضلات