صاحبي الصعيدي
صاحبي الصعيدي
رغم الخلايق غلابة
بين الحنين و اللهيب
تلقى ف حُضن الربابة
ألفين غريب و غريب
........................
صاحبي الصعيدي
اللي قلبُه ربابة
تنحت الموال ف صدره
تبكي للي انقال عليها
عن بشر من عينه سافروا
ألف خيَّال تحت جلدُه
ألف فارس فوق جبينه
جوا عينُه
يحكوا عنه
....................
ياسكة اللي يروح و يرجع
مالي قلبُه دموع
ياسكة تانية مقفلة
ما لهاش رجوع
ياسكتين
بين الضلوع
..................
صاحبي الغريب
اسكندرية
ماخدتش منه كتير
و ما ادتوش
غير حبة حاجات
ماكنش محتاجها
"الجينز
نضارة صيني
و كوتشي"
حبة حاجات ما تساويش
"روايح البحر
و عيون السمك
الموج
المشي ع الكورنيش"
حبة حاجات غالية
تعيش
................
لساك يا بحر
قادر تمارس سطوتك ع الخلق
صاحبي الصعيدي
بين موجة و التانية
تتفك أختامُه
و يتفرد قلبُه
ع الشط قدامُه
........................
فارس يا صاحبي
لساك بتضحك
و الدنيا بتاخد ما بتديش
و الشنب الطارح فوق وشك
كان كل ما تضحك يتبعتر
وكأنُه بيرفض فرحك
أو يرفض حتي تعيش
لساك
مش عارف تضحك ضحك الهم
لساك بتضحك
ضحكة السلطان
لأ.. ضحكة الشاطر حسن
لما تجيلُه
ست الحسن
وتقُلُه نتجوز
فيقولها
- و برضُه لساه بيضحك
ما بيبكيش -
ماعييش
....................
رايدني أبكي؟!!!!
الدمع ما بيرويش
و ضهرك المحني
ف عمرك الممدود
ده آخر الاحزان
و المالح..دمعك
لو غرق دمك
حتلاقي عضمك خاخ
ترجع لأصلك
-و مهما كانِ إبعيد
فالعرج دساس-
تنفد برحك
من تحت رجل الناس
..........................
إزاي يا صاحبي
ما يقف ف وش البحر غير الريح
و شراعي زي المركبة
من ورق
الغرق
كالعادة أزرق سماوي
أرق م الشط الغريب
أرق من ناسنا
كالعادة ع الصخر
مكسورة أنفاسنا
.....................
إياك تعيدها
كسرة النفس لحريم
و الرجال
مالهومش غير النظرة مع جزة سنان
جرِّب و لملم عمتك
ياحزين
.....................
الحزن قلب اللي إنوعد بالخوف
و الوعد مكتوب ع الجبين
سطرين
سطر لولد
و سطر لبنيَّة
ولد إنما.. عادي
فن الملاغية
أصعب عليه م النوح
الروح.. كما البسمة
القسمة دباحة
النسمة من عينه
يدبحها ريح الطل
و الرقة فواحة
و البت نواحة
رقة و بين إيدها
طاحون و بعده طاحون
تبكي العيون
و الأرض لم تنصان
قلعت سواد الملس
لبست سواد الطين
رِكب الشيطان ودنك
عاندته بالنبوت
يا يقتلك....
...يا تموت
ده الوعد مكتوب ع الجبين
سطرين
"جرِّب و لملم عمتك
ياحزين"
sayed_fone
رد مع اقتباس
.gif)
المفضلات