مَـصر مش هيَّه الحكومه
مَـصر مش هيَّه الحكومه
مَـصر مش هربان ونايم
مَـصر "طيَّب " بالضرورة
لو يـِبان بالظلم
ظالم !
مَـصر مش رقْص وغناوي
مَـصر مِش حـَبّة كسالى مرْصوصِين فوق القهاوي
مَـصر مِيِت مليون مُناضل
فيهُم النـّـَفـَس اللـِّي مَحْـشـُور
فـِ الضّوافِر
لسَّه قادر ..
يِبْقا وقت الجَرْح تَضْميدَهْ على الدَّم اللي نازل
يبقا سَنْدِةْ كِتْـف مَكْسورة وِمَبْدورَه على هَـدَد المنازل
يِبْقا طَلـْقـَة فـِ صِدْر مُجْرِم
لما يـِتـْلـَقـَّى بـِعَزْم الصَّبْر شَلال القَـَنَابل
يـِبْقا لَمْلـَمِةِ اللـِّي فاضل
وارْتِجاعو
مَـصر مش هِيـَّه اللـِّي بـِتسَلـَّم على ايـِدين إللّي باعوا
مَـصر مش هِيـَّه اللـَّي بِتوَطـَّي في صوت الحَقْ من بعد ارتفاعو !!!
مَـصر يعني ... كل مصري
ياما مَاتوا جُوَّا مَـصر وبرَّا مَـصر وياما ضاعوا
وياما آسوا
وياما صـَلـْبـِةْ ضَهْرُهُمْ عـَدِّتْ مَصايب
ياما طول الصّبْر قوّاهم على زَعـْق الغرايب ...
إللـَّي زَفـَّتْ لِيهُم الموت بـِالزَّكايـِبْ
واللـّي رَفـِّتْ رِمْشُهُمْ مع كُل صُبْح بـِهـَمْ صايب
واللي عايزين يـِلمِسوا وجعك يا غزه بقَـلـْب طايب
آه يا غزه ....
إنتي نازَفـَه وجَمْبي نازِف بالوَجَعْ مَعَ كُل غـَزَّه
إنتي فاكرَه الدّم هايـِنْ ؟
إنتي فاكرَه المَصْري يـِقـْدَرْ يِبْقا خايـِن !!!
لو على دم الشهادة
يبقا طول العمر دايـِن !
لو على شرف العباده
يبقا بـِيْحاول...وِصاين
إنتي فاكره المَصْري خايـِن؟؟
أوْ مُنافـِق ؟
أوْ بـِيـِتْحَجِّجْ بـِعَجْز الحِيلة غيرْ ذُل الحقايـِق؟!!!!
والا فاكرَه ان احْتِلالِك
خيط مَهُوشْ مَوْصول بـِقَهْرْ المَصْري مِنْ دون الخلايـِق !!
لَجْل لمَّا تِنادي يـِسْمَع
نـَدْهِتِكْ تِدْبَحْ....
وِتِوْجَعْ
والغضب _لَوْ كان مالينا_ لجْلِ خاطرِكْ سَهْم راشِق
رَشْقِتـُه بـِتْدوُر عَلينا .... بالرّقابْ فوق المَشانِق!
واللـَي كان قايم يا غزه
يبقا عايز ألف قـُومه
لو تـِبان الخطوة عاجزه
تبقى مقـْطـُوعَه على السّكـَّة مَهيشْ ماشيَه على رِجْل الحكومه !!
مَـصر من جُوَّاها عايزَه....
لأ أ ّ
مش هِـيَّـه الحُكومه .
شعر للمبدعه رشا عبد الرازق
رد مع اقتباس
.gif)
المفضلات