رسالة من الحكومة لابنها المواطن

**&& اشكوزا &&** · 23-11-2008, 10:30 PM

عزيزى المواطن بتاع النضال
ياراكب دماغك و غاوى الحلال
نصيحة يا صاحبى بلاش الخيال
و غـمض عـيـونك و ربى العـيال
بلاش المـناكـفـة و لايم و عيش
هتتعـب معـانا و سهمك يطيش

تعالى و هاودنا و عدى الامور
وعيش فى الطراوة وخش الطابور
لكن لو هتـزعل و دمـك يـفـور
هنشهد نهايتك فى بحر الرمال
هتصبح حرامى هتصبح امير
هتصبح حرامى و ندل و اجير
و نقدر نلخبط فى اصلك كتيير
هنحـلـف ان الحبايب شافـوك
بتقبض يا خاين و تقتل اخوك
ساعتها مراتك هتلعن ابوك
و تلطم و تنعى احط الرجال
مالكش انت دعوة بى اا اللى ضاع
و مين اللى شارى و مين اللى باع
و ميـن اللى كـيل و مـين اللى شـال
فحب الحكومة و حب السلام
و عـلم ولادك يشـدوا الحـزام
علشـان بـكـرة هياكلوا الحمام
و ينسوا الاسية و ينسوا الهزال
فلازم يا صاحبى تغمض عينيك
و طـنـش علـينـا نـطنـش عليك
و اياك تـشـاور نـقطع لك ايديك
و تصبح مواطن ما يسويش ريال
عــزيزى المواطـن بتـاع النضـال
يا راكـب دماغك و غـاوى الحلال

رسالة جاتلي علي الميل بتاعي