دقيقة حداد ..
على الشهدا إللى راحوا بلاش
على الحلم إللى فـ الإنعاش
على إللى قالولنا فـ يوم
تعالوا نرجّع الأمجاد ..
دقيقة حداد على الأحفاد ..
هتكبر فى وطن مقسوم
و يفضل قلبهم مهموم
و احلامهم تطير منهم
يجيبوا اللوم على الأجداد ..
دقيقة حداد على العواجيز ..
على الشيب إللى فوق روسهم
على العُمر إللى كرمش حُزن فـ وشوشهم
على خوفهم من الطوفان
لياخد إللى باقيلهم بنات و ولاد ..
دقيقة حداد ..
على الأرض بتاعت عوّاد ..
تمنها كان شباب غالى و زينة الناس
تمنها شعب .. بيحاميلها و بينداس
تمنها حسرة مدفونة ..
على البلد إللى عاشت فى حِماها بلاد ..
دقيقة حداد ..
بعد ما فات المعاد ..
لـ نبيل عبد الحميد
المفضلات