طفل صغير بيسأل أبوه عن دخله فا دار بينهم الحوار ده:
الإبن: بابا ممكن أعرف انت بتاخد كام في الساعة؟
الأب: ده مش شغلك، ليه بتسأل الأسئلة دي؟!
الإبن: أنا بس عايز اعرف، بالله قوللي بتاخد كام في الساعة؟
الأب: لو لازم تعرف.. باخد 50 جنيه في الساعة..
الإبن: (وهو باصص في الأرض بحزن) بابا ممكن تسلفني 25 جنيه؟
الأب: (بعصبية) إنت لو بتسأل السؤال ده عشان في الأخر تطلب مني فلوس بالطريقة دي عشان تروح تشتري لعبة ساذجة ملهاش معنى فا اتفضل ادخل اوضتك.
دخل الإبن الأوضة وقعد الأب متعصب شوية ولما بدأ يفكر ان ابنه ممكن يكون فعلا محتاج الفلوس في حاجة تانية.. راح له الأوضة.
الأب: صاحي؟
الإبن: اه يا بابا..
الأب: امسك ال 25 جنيه اهي..
الإبن بفرحة طلع فلوس من تحت المخدة و زود عليهم ال25 جنيه..
الأب: (بعصبية) طب طلبت فلوس ليه وانت معاك؟
الإبن: الفلوس اللي معايا ماكنتش كفاية.. دلوقتي أنا معايا 50 جنيه وعايز أشتري ساعة منك تيجي بكرة بدري تلعب معايا..
أكيد هتتخيلوا موقف ومشاعر الأب ساعتها..
مغزى القصة: لكل الناس اللي بتكرس كل وقتها للشغل.. حاولوا توفروا بعض الوقت للأهل والأصدقاء والأقارب عشان الفلوس وتوفير الاحتياجات المادية مش كل حاجة.
المفضلات