من ( بيروقراط ) مركز مش فاكر ايه ؟!
كل بلدهم بهوات سبحان العاطى ،
الكاتب بيه و مدير المصلحه بيه ،
و السيد عبد العاطى البيروقراطى
راجل دوغرى ، فاهم إيه اللى عليه
راجل يعرف أمتى ينخنخ ويطاطى
و كمان يعرف امتى يدلدل رجليه .
ييجى المكتب ، بدرى بمواعيد ظباطى
و الساعة اتنين و لا ورقة تكون فى ايديه .
فنان فى الشغل ، وفنه أرستقراطى
الفن فقط للفن ، بتضحكوا ليه ؟
لا تقوللى مصالح شعب و لا كلام و اطى
الهدف السامى علاوة تلاته جنيه .
و السيد عبد العاطى البيروقراطى
( السد العالى ) ف نظره .. اسمه دوسيه !
(صلاح جاهين)
المفضلات