هل نستحق حاكم عادل ؟

[ابوكنزى]

بسم الله و الصلاه و السلام على سيدنا محمد رسول الله


رغم ترددى الشديد لكتابه هذا الموضوع
خصوصا فى يوم فيه مليونيه ضد الرئيس و ضد الاخوان

لكنى تابعت اغلب المواقع و تابعت هتافات المسيرات المتجهه الى التحرير

هتافات ضد رئيس البلد

مش ده المهم و مش ده موضوعى
لانى شخص عادى لا انتمى الى اى حزب او جماعه او تيار

و اعلن تأييدى للدكتور محمد مرسى

مش عايز اطول فى المقدمه لكنى هدخل فى الموضوع


سؤل الامام على سؤال و كان سؤال فيه خبث شديد
لماذا لم يولى علينا حاكم مثل سيدنا عمر بن الخطاب
فبماذا كان رد الامام على رضى الله عنه
قال كان سيدنا عمر امير المؤمنين على اناس مثلى
و وليت انا على اناس مثلك


طبعا بعتزر لانى مش قادر افتكر صيغه الواقعه بالتفصيل
لكن بصراحه هو ده موضوعى

و هو ده اللى عايز اتكلم فيه


يتبع

[ابوكنزى]

طبعا انا لا اقصد اى مقارنه بين صحابه رسول الله
صل الله عليه و سلم
و بين حاكم مصر الحالى او حاكم اى دوله


لكن الرد هنا من الامام على رضى الله عنه
له معانى كتيره
هل احنا كشعب نستحق حاكم عادل


هل الشعب اللى واخدها عافيه فى كل مكان
يستحق الحريه

انتم عارفين انى من بولاق ابو العلا
و كل يوم بعدى على شارع 26 يوليو

الباعه احتلت الشارع تماما
مش ممكن الشارع تعدى منه اكتر من عربيه واحده
لانه الباعه احتلوا الرصيف وو الشارع بالكامل
انا شفت البياعين سارقين كهربه من شركه الكهربه نفسها
اللى موجوده فى شارع 26 يوليو
كلها عافيه و علنيه و محدش يقدر يعمل حاجه



طبعا كلكم شفتم اللى حصل فى ميدان الجيزه
و تعدى الباعه الجائلين على قوات الامن
و تصديهم لقوات الامن بالسلاح

كلنا عارفين ان رفع الاسعار من الناس نفسها
طبعا الحكومه مسئوله عنه
و بصراحه اعتقد ان حكومه هشام قنديل حكومه فاشله

لكن انا مش عايز اعمل موضوع
انا عايز اطرح سؤال

هل نستحق حاكم عادل

و احب اذكركم بقول الله تعالى

إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ


ارجو النقاش من الجميع
و ان يكون النقاش بدون تجريح لاى فرد او حزب



ابو كنزى

[ahmedana]

انا رأيي يا محمد ان الرأيس مظلوم لان دخل لعبة مش بتاعتو هو راجل محترم على عيني وراسي

لاكن ليس رجل دولة

والراجل قاصد يغير للافضل


انا رأيي يسيبو الراجل يكمل سنة

لو ما قدرش يغير يبقى ساعتها الاخوان والسلفيين اللي هايخرجو ويطالبو برحيلة


اما رأيي في اللي بيحصل من دلوقتي فهو ظلم للراجل اللي انا شايف انو هايغير

بس الصبر يا جماعة

[ابوكنزى]

لاكن ليس رجل دولة

اكتب كده اى اسم يا احمد
تكون انت شايفه رجل دوله
و شوف هتلاقى معارضين للاسم و لا لا


انا مش عايز الموضوع يتحول لناس تدافع عن الرئيس و ناس تهاجمه
انا عايز اتكلم عننا عن الشعب المصرى

تفتكر لو انت و انا فكرنا فى كلام نشيل الرئيس بعد سنه و لا 2
اصله مش كويس و مش راجل دووله

تفتكر كده هنبقى دووله لا طبعا و لا حتى دوولت

ناس نازله بمليونيه اسمها
مصر مش عزبه

طيبب هو فى دووله متحضره تتكلم عن رئيسها بالشكل ده
ممكن تلاقى فى اى مكان ناس بتتكلم عن تغيير رئيس منتخب

الناس بتتكلم عن التغيير اكنه تغيير بنطلون
لا طبعا مفيش تغيير هيحصل فى يوم و لا سنه
نفسى الشعب يصبر بمزاجه
بدل ما كان عايش صابر و راضى غصب عنه
دلوقتى فى ناس كتير بتقولا لا
لا و خلاص
اه عافيه
هو كده
للاسف بقى هو ده كلامنا و هى ديه طريقتنا




الشعب المصرى غير راضى عن الرئيس المخلوع
لانه كان سبب رئيسى فى حصار غزه


هو نفس الشعب غير راضى لفتح معبر رفح و فك الحصار

؟؟؟؟؟؟؟؟؟؟؟؟؟؟؟؟؟؟؟؟؟؟



الشعب من كام يوم كان بيطلب بأقاله النائب العام


تصدق نفس الشعب قال لا ده تدخل فى السلطه القضائيه



عموما كلمه اخيره للشعب اللى مش عاجبه العجب
نشكركم على حسن تعاونكم معنا

[NoUr@aBoAnAs]

والله بصراحة كلامك يا احمد منطقى
ايضا كلام ابو كنزى كلام واقعى جدا وهيا فى الاول او فى الاخر وجهات نظر مختلفة
وعلينا احترام وجهة نظر اى شخص .
علشان فى الاخر هنوصل لحل منطقى محايد باءذن الله

اما بخصوص الرئيس او حكومة د/هشام قنديل فهى من وجهة نظرى الشخصية المتواضعة ليست ناجحة وليست فاشلة
بمعنى
انت يا بو كنزى وضحت ده بناءا على ايه مع احترامى الشخصى لك .
وحددتها وفقا لاى معايير
على العموم . المشكلة الكبرى اننا كشعب مش بيدى لبعض اى فرصة لاظهار وجهة نظره
او ترجمة الافكار والاراء الى واقع ملموس فى شتى المجالات صحة وتعليم والخ
اللى انا عاوز اقوله مافيش حد سوى عاقل له فكره المتواضع فى بناء مجتمع صالح ناضج
فى وضع ايديه على صمام المشكلة . علشان مصر كلها مشاكل فى شتى مجالاتها .ايضا زى مافيه
ناس كتير عاوزة تبنى وتصلح فيه ناس اكتر عاوزة تهدم وتخلها بازرميط

نرجع لمرجوعنا الاساسى وهيا الحكومة المسئولة .
ماتقنعنيش ان واحد ماسك حاجة بتتنهب وبتتسلب بقالها اكثر من 40 عام
وتقصير فى شتى الوزارات . وتقولى سنة ولا اتنين وهظبطها
ماشى انا باءذن الله هحاول اظبطها بس فيه حاجة بقى انا كفرد من الشعب المتواضع . يجب عليا انى اصبر على هذا الكلام
الى ان تنتهى المهمة . وساعتها اقدر احدد واحاسب

علشان انت فى الوقت ده هتكون ظهرت امامك جميع الاراء اللى كانت مطروحة او بمعنى جميع الالتزامات والوعود
وتعالى احسبها مع اى شخص مسئول
انت قولت انشاء الله هتعمل كذا وكذا .....
عملت ايه
وهو ده فعلا الشعب الواعى المثقف اللى عاوز بلده فعلا فى تقدم ونجاح
انما انا لسه ماسك من كام شهر هاتحاسبنى عليهم من اولها كده
لا ده مش منطقى بالمرة
يا سيدى ده الواحد لما بيجيله زبون بتليفون فاصل واستلمه منه
وقلتله يومين كده وعدى عليا قبل ما اليومين بييجوا يكون عدى عليك وسألك مليون مرة
عملت ايه فى التليفون
المشكلة الكبرى ان مافيش حد بيدى حد فرصة علشان يعمل المطلوب

[هشام الرميحي]

لا احنا نستحق مبارك و أسوأ

و الامثله كتييييييييييييييييييير

هاتلي صفه وحشه مش منتشره (أنا مش بقول موجوده ولا لا) بقول منتشره

هاتلي حاجه واحده اتفقنا اننا نعملها بعد الثوره و عملناها من رشاوي و نظافه و عدم تحرش و و و

هاتلي واحد تثق فيه و تقول انه بيعمل لمصلحه مصر

فاكر فيلم يا عزيزي كلنا لصوص

فعلا أحنا كلنا لصوص

كل واحد بيسرق من البلد بطريقته و بياخد منها اللي يقدر عليه و كثرت المسميات

[amr_gsm]

محدش عاجبه حاجه خالص
فينك يا مبارك
أكتر حاجه كان ناجح فيها
كان حابس الشعب كله فى اللى كان فى السجن بجد وفى اللى كان جوه نفسه
بس كنت تقدر تقول بم فى حاجه ولو قولت مين اللى كان هايسمعك

[احمد مشعل]

خلاص يبقي الشعب يريد تغير الشعب .

[محمد صلاح]

واعتصموا بحبل الله جميعا ولا تفرقوا

[NoUr@aBoAnAs]

لا احنا نستحق مبارك و أسوأ

و الامثله كتييييييييييييييييييير

هاتلي صفه وحشه مش منتشره (أنا مش بقول موجوده ولا لا) بقول منتشره

هاتلي حاجه واحده اتفقنا اننا نعملها بعد الثوره و عملناها من رشاوي و نظافه و عدم تحرش و و و

هاتلي واحد تثق فيه و تقول انه بيعمل لمصلحه مصر

فاكر فيلم يا عزيزي كلنا لصوص

فعلا أحنا كلنا لصوص

كل واحد بيسرق من البلد بطريقته و بياخد منها اللي يقدر عليه و كثرت المسميات

المشكلة يا هشام ان احنا كشعب

مغيبين تماما
عن كل حاجة ... كل واحد مالهى فى اكل عيشه وهو ده اللى مبارك كان بيتعامل بيه
انه قدر بالفعل يسيطر على افكار الفرد خلاه ما يفكرش لا فى سياسة ولا فى حقوق ولا ولا ولا كتيييييييييير
تعالى مثلا خلى واحد كان يتكلم من لحظة ما يخلص كلامه

ده اعتبره منفى لفين بقى ماتسألش
ولامثلة كتير
اذكرلك مثلا على سبيل الكثال
ايمن نور ايه اللى حصل فيه
فاكر ولا ؟؟؟؟؟؟
مش معنى كلامى انى بدافع عنه لا انا بتكلم فى سياسة كان بيتبعها مبارك .

من لاخر لازم كل مواطن يبدأ بنفسه اولا
يبدأيغير السلبيات اللى بيمارسها ويطبق الايجابى على اولاده وعلى بيته وكل من كان له سيطرة على اى حد .. بمعنى رب البيت يغير من نفسه وبيته . صدقنى المشكلة فينا احنا مش فى
حكومة ولا ريس ولا غيره .
يعنى انا لسه كنت بنتكلم انا واصدقائى
امبارح عن بعض السلبيات
احنا ليه مثلا لما يجى اى شخص يتكلم مع حد
يدمج بعض كلمات انجليزى
تقدر تفسرى دى . عارف ليه علشان مافيش انتماء للغة العربية . تعالى انزل مثلا المانيا اسبوع سياحة
هتفضل تذاكر بعض الجمل والكلمات علشان تقدر تتعامل .صح مش ده اللى بيحصل .
لا تعالى اعكسها خلى واحد المانى جايلك مصر ولا فى دماغه عارف علشان عنده انتماء رهيب لوطنه واللغة بتاعته . صدقنى المشكلة فينا احنا كشعب