عايز أكتب شعر وخايف
لو بالصدفة قرتيه
عايز اكتب شعر وحاسس
منك لو هتحسيه
يمكن إحساس أنا عشته
حسيتى معايا و عشتيه
والقلب ال بإيدى قتلته
و دفنته فى تربة تقسيه
صِعب على قلبك حالته
وقولتى المجروح نشفيه
زرعتى حبك جواه
وبكلمة حلوة ملكتيه
عقلك قالك يلا نجرب
خدتى قرارك و جتينى
بسهولة وبكل بساطة
فى شباكك علقتينى
و صبحتى ما بين القمرات
أول طبيبة داوتينى
ممكن حاجة سمعتها عنك
بعد ما شوفتك وعرفتينى
يمكن لمعة ضحكة سنك
سحرت عنيى وبهرتينى
يمكن كتر الرغى وزَنٌك
حلى حياتى وطعم سنينى
كل الناس خدو بالهم إنك
ملكتى قلبى وسحرتى عينى
مش موضوع زى القمر
ياما قبلك شافت عينى
أجمل منك مليون مرة
بس إنتى بس شغلتينى
ولا حتى عشانك طيبة
ماياما فى الدنيا بنات
من ربها قريبة
وعلى راسها تاج ملكات
وبردو مش خفة دم
مانتى ليكى م الحركات
إل ينقط و يزيد غم
ويخلى العقل فى متاهات
والحالة فى سحرك معدية
طلب الغايب ع المرئية
دايما أحب الصعب ال هيتعبنى
ودا طبع قديم فى البشرية
يموت الانسان فى الممنوع
والحب بقا حالة عكسية
دايما تجرى وتقطع نفسك
والناس قدامك و وراك
فى ال بيجرى وراك يتمنى
نفسه يكمل عمره معاك
و ال بتجرى وراه ولا بتلحق
حتى دقيقة يكون وياك
وناس كتير بتنادى عليها
بردو بتجرى و لا سمعاك
وناس وراك ولا حاسس بيها
وبتسعى دايما لهناك
وإنت بتجرى عليك تختار
م ال بيجرو تملى معاك
لسا مصمم تقطع نفسك
وتحصل ناس مش عايزاك
واللا تّقدر ناس علشانك
إتهدت من الجرى وراك
وتبطئ م السرعة شوية
وتجرى موازى ال بيهواك
إرضى ال إتمنى رضاك
صون ناس فى عنيها صيناك
إكسر القاعدة العكسية
وحقق حلم إتمناك
فى الختام أحب أتأكد
يا من ملكتى الإحساس
إوعى كلامى عليكى ينكد
أنا شعرى مكتوب للناس
لو كان الكلام بيأكد
أو ينفع أصلا مقياس
يبقى صحيح أنا كنت فى حبك
أقل من أقل مداس
المفضلات