لماذا تصبح متطرف ؟


 التطرف صفة يتسم بها بعض أصحاب الفكر و الرأي تضفي على صاحبها رونق خاص ينفر البعض منه و يجذب له البعض الأخر. و لكن البعض الذي ينجذب هو ( بعض ) له عقل ضحل يمكن تشكيله بسهولة لذا عندما تكون متطرفاً ستكون :


1- إنسان مميز ( حتى لو كان تمييز في الغلط )
2- لك هدف ( بدلاً من كونك عايش ع الهامش )
3- تجد متنفس لكل عقدك
 4- بسهولة تكون قائداً لمجموعة سهلة الإنقياد.





 خطوات سهلة التنفيذ :




أولاً : تصحى من النوم و تشرب كوب شاي به 4 ملاعق شاي و يا ريت لو كان شاي من نوع رخيص و تحط عليه 12 ملعقة سكر ( دي بداية جيدة ليوم متطرف مشرق )


ثانياً : تختار لك حاجة ( بدون تفكير ) تكون متطرف فيها ... ممكن تختار تالت حاجة تيجي على بالك ( برضه بدون تفكير ) و في حاجات كتير تقدر تكون متطرف فيها .. ممكن تكون متطرف في السياسة أو الكرة أو العلاقات الإجتماعية أو الدين أو اللبس أو حتى الأخلاق .



 ثالثاً : بعد ما تختارلك أمر من الأمور الحياتية القابلة للتطرف فيها انت كدة وصلت لنص المشوار و الباقي هتعمله و انت سايب ايدك خالص .. ما تقلقش اهدى و ركز و التطرف ان شاء الله هيكون من نصيبك.

 رابعاً : التطرف نوعين .. أقصى اليمين أو أقصى اليسار ..
أظن سمعت كتير عبارة ( يميني متطرف أو يساري متطرف )
مش مهم قوي تعرف يعني ايه يميني متطرف أو يساري متطرف و لا مهم انك تكون يميني أو يساري ...
 المهم و ايللي لازم تركز فيه كويس جداً .... انك تكون متطرف و خلاص .



 خامساً : شربت الشاي ؟ لو ما شربتوش الحق اشربه و لو شربته اعمل لك فنجان قهوة و تعال كمل :
 الخطوة دي هي البداية الفعلية لعصر ذهبي جديد يتسق و النهج الذي قررت انتهاجه بما يتفق مع اللاشيء.
 أبشر :
You are now in the middle of nowhere
 يا سعدك يا هناك ...
 هتجيب يا سيدي 21 جريدة
7 جرايد بتواريخ قديمة و 7 جرايد بتواريخ جديدة و 7 جرايدة مش مهم فيهم التاريخ..... و ياريت الجرايد دي تكون جرايد حكومية علشان نزيد الطين بلة لكن برضه لو جرايد معارضة ما يضرش ... و على رأي المثل ( ما ازفت من زفتى إلا ميت غمر )

أول 7 جرايد هتقرا منهم العناوين ايللي تخص الشيء الذي قررت أن تصبح متطرفاً فيه ( ركز العناوين و بس ) ما توجعش دماغك المتكلفة.

 ثاني 7 جرايد و دول أهم شوية الحقيقة .. محتاجين صبر و تمحيص أكتر .. تقرأ منهم 7 موضوعات لا أكثر في تخصصك الجديد ( سواء دين أو سياسة أو كرة أو غيره ) مش مهم تقرا الموضوعات بكاملها كفاية عليك قراءة ربع الموضوع لأنك بالطبع مش مهم تفهم حاجة.

 ثالث 7 جرايد أيها المتطرف المبتديء هم أهم سبع جرايد على الإطلاق .. و دول بقى يا سيدي تلف بيهم صدرك علشان الكحة.

 كدة انت أصبحت إنسان مثقف و على علم و دراية كافية جداً بمجريات الأمور و الأحداث و كمان عندك خلفية جامدة جداً عن موضوعات الساعة .


 سادساً : حتى يطلق عليك لقب خبير و عالم ببواطن الأمور توجه بحماس إلى رصيف الكتب المستعملة و البالية و خد معاك ورقة و قلم و انقش باستخدام القلم على الورقة أسماء 4 أو خمس كتب بتتكلم عن تخصص حضرتك و أهم حاجة تكتبها قبل عنوان الكتاب .. إسم الكاتب

ملحوظة لو عندك موبايل بكامير ممكن تصور أغلفة الكتب بدل ما توجع دماغك و تكتب ( جهدك أثمن من انك تضييعه في تفاهات الأمور ) .



 سابعاً : تحفظ عن ظهر قلب 3 من أسماء المؤلفين للكتب السابق ذكرها في الخطوة السابقة .



 ثامناً : تدخل على الانترنت و تفتح صفحة جوجل و عنوانها لو ما تعرفوش : www.google.com
 و تكتب اسم تخصصك الجديد و لو ما بتعرفش تكتب ممكن تروح أي مقهى انترنت بــ 2 جنيه و تطلب من صاحبه انه يعمل لك الحكاية دي .. معلش هتغرم شوية بس كل شيء و له ثمن.



 تاسعاً : تقرأ ( على فرض انك بتعرف تقرأ برضه ) عناوين نتاج البحث من جوجل و تشوف الناس بتتكلم عن ايه اليومين دول في تخصصك الذي أصبحت بالفعل و بكل ما تحمله الكلمة من معان ٍ ( خبير )


عاشراً : لاحظ الكتاب و المثقفين ايه رأي أغلبهم في موضوع الساعة ... يؤيدون أم يعارضون .



 حادي عشر : مش محتاج أقول لك طبعاً ان رأيك بالتأكيد لازم يكون مخالف ليهم و بقوة . لو بيقولوا أه ... يبقى نقول لأ و لو بيقولوا لأ يبقى يبقى تفتح بقك ع الاخر و تقول أأأأأأأأأه كأن عندك اللوز بالظبط.



 ثاني عشر : أي حد يحاول يناقشك في رأيك المحترم و المعتبر اتخذ معاه الإجراءات الأتية :
* شكك في علمه بالأمر فهو بكل تأكيد جاهل .
 * اذكر باستمرار أسماء الـ 3 , 4 كتاب ايللي حفظت أسمائهم .. دول تقولهم عمال على بطال .
 * اتهم من يجادلك انه إما غبي أو منافق ( و كونه جاهل ده شيء مفروغ منه ) و مفيش مانع انك تقول عليه عميل مهما كان التخصص أو الموضوع ايللي هتتكلم فيه حتى لو في الكرة يعني مثلاً لو بتتكلم عن عودة جوزيه للأهلي و انت معارض عودة جوزيه .. تقدر تقول و بكل ثقة عن مؤيد عودة جوزيه انه عميل صهيوني يتربص بحال البلد و يسعى لإثارة الفتنة الطائفية و دس الأجانب بين صفوف القوميين .
 * لو ايللي بيحاول يتناقش معك في رأيك ده بيتكلم معاك صوتياً ما تسمعش و لو بيتناقش معاك من خلال صفحات الانترنت لا تقرأ .
و اجعل ردك من دماغك ذاكراً البنود السابقة و متجاهلاً كل ما يقول .
 * اعمل جروب على الفيس بوك و اعزم أقاربك و أصدقائك و كل من تعرف و لا تعرف للجروب ده و انشر فضايح الناس ايللي بتعارضك و اكتب فيهم ما في الخمر .. كل ايللي يجي على بالك من سب و شتم و لعن و اتهامات و طلع فيهم كل عقدك الماضية و المستقبلية و دي أهم فوائد كونك متطرف .
 *ما تنساش دايماً توضح في اخر كلامك ان اختلاف الرأي لا يفسد للود قضية و ان الهدف من هذه النقاشات الجادة هو الوصول إلى الحقيقة و ان حدة الخلاف بين الطرفين ده شيء بناء يساعد على إيضاح الرؤى الغامضة و الوصول بها مباشرة ً إلى عقل و قلب الضحية ( اقصد المستمع أو القاريء ) .