حلقات جزرة مسلسل اقتصادى مصرى وهومتجدد

**gti** · 20-07-2008, 04:41 AM

بسم الله الرحمن الرحيم

جزرة ده صحبى وخريج اقتصاد وعلوم سياسة وهو هيتشرف وسيقوم بشرح الاوضاع فى البلد بطريقة سهلة نفهمها احنا الشعب المصرى

**gti** · 20-07-2008, 04:42 AM

أول موضوع هأتكلم فيه الحقيقة هو الموضوع الي شاغل بالي قوي دلوقتي واحتمال يكون شاغل بالكوا انتوا كمان
:زيادة الأسعار
ويقابله بلغة السادة المسئولين :كلمة التضخم باب الضاد فصل الخاء والميم
اخر اخبار عم التضخم ده انه من حوالي اسبوعين قررت الحكومة خير اللهم اجعله خير تزود الفايدة علي الودايع وبالتالي البنوك العادية هي كمان رفعت الفايدة وده حل مؤقت للتضخم,ليه؟
لما سعر الفايدة يرتفع الناس هتحط فلوسها في البنك وبالتالي تقل الفلوس الدايرة في البلد "تُمتص السيولة" فيقل الطلب علي السلع ,ماهو مافيش فلوس الناس هتشتري إزاي يعني ؟
فيقل سعر السلع او علي الأقل تثبت شوية وبالتالي نحجم التضخم ,لحد كدة أخر حلاوة والعملية ماشية كويس
طبعا البنوك مش هتاخد الفلوس تخللها لازم تطلعها تاني بس بعائد أكبر عشان تكسب والاهم يكون مضمون عشان مايتخربش بيتها, فامفيش بنك في مصر المحروسة هيخاطر ويخش في مشاريع ومصانع ودراسات جدوي مع ان المفروض ان ده الي يحصل فتكتر السلع في السوق فسعرها يقل ونخلص من التضخم
لكن البنوك بيريحوا نفسهم ويمولوا قروض استهلاكية:واحد عايز عربية,واحدة مزنوقة في مصروف البيت فراحت علي ماكينة الفلوس وتبقي تسدد الشهر الجاي وكدة يعني
وانا كنت عملت بحث من سنة ونص علي بنك فيصل "لزوم الدراسة والدرجات يعني"

وهو بنك من احسن من البنوك في مصر الصراحة ده غير انه اسلامي
,اكتشفت ان 85% من قروضه قروض استهلاكية مابالك بالبنوك التانية الي هريانا اعلانات عن قروض من غير ضمانات ولا بطاقة وفي ربع ساعة تاخد القرض وتسدده علي ربع قرن انت او الورثة بعد عمر طويل
ده بالنسبة للقروض لكن في طريقة تانية لتصريف الفلوس لإن البنوك مابتقرضش كل الفلوس الي بتجلها لإن نسبة التشغيل في مصر كانت 2006 حوالي 52% "أعذروني ماعنديش أرقام جديدة ومش عايز أفتي ,بس اكيد هتبقي قريبة من كدة"يعني حوالي كدة نص الفلوس الي داخلة البنك مش عارفين يصرفوها ,يعملوا ايه؟
يشتروا بيها أذون خزانة
يعني الدولة تستلف منهم الفلوس دي ود.يوسف بطرس غالي يمضي لهم علي وصلات أمانة بفلوسهم زي مرعي بتاع الكّّلِمة بالظبط ,وطبعا عليها فايدة والدولة تاخد الفلوس تصرفها كمرتبات أو اي حاجة تانية المهم ان الي اتسحب رجع تاني يعني المشكلة هي هي مانبناش الا ان احنا حملنا نفسنا سعر فايدة وخلاص و السلع الموجودة هي هي محلك سر وكأنك يا ابو زيد ماغازيت
المهم ان كل الي حصل ده ينفع كحل مؤقت لحد ماتشتغل المصانع ويكتر الانتاج ولما تكتر السلع سعرها هينزل لوحده وده الضمان الوحيد ضد التضخم لإن الندرة هي السبب في وجوده اساسا ,اما لو اعتمدنا علي سعر الفايدة فقط فحالنا عمره ماهيتعدل
المرات الجاية ان شاء الله اكلمكوا عن تجارب دول تانية فالحة عننا شوية
نكمل بعدين