بسم الله الرحمن الرحيم
--------
وانا في المرحلة الابتدائية كانت الابلة اللي بتدرس لينا معظم المواد هي اشهر واقوي واقدم ابلة في المدرسة كلها.
كان ابنها معانا في نفس الفصل.
مش قادر افتكر كان اسمه ايه؟!!!! لان كلنا كنا بنقول عليه (الواد ابن الابلة)
------
الواد ابن الابلة دة كان بيتمتع بكل الامتيازات اللي بتتمتع بيها امه
كان يغيب زي ماهو عايز علي حسب مزاج مامته
كان كل المدرسين بيتعاملوا معاه معاملة خاصة جدا
يعني مستحيل حد من المدرسين يسأل الواد ابن الابلة اي سؤال شفوي اثناء الحصة
كان لازم يقعد في الصف الاول وكانوا بيتعاملوا معاه علي انه نابغة وعبقري
في امتحانات اخر السنة كل المراقبين كانوا بيقفوا جنب الواد ابن الابلة عشان يحلوا معاه الامتحان.
لو عملت مشكلة مع الواد ابن الابلة حتي لو مش قاصدك يبقي كرامة اللي خلفوك هتتبهدل واحتمال تشيلك مادة ولا اتنين.
كل تلاميذ المدرسة بلا استثناء اصحاب للواد ابن الابلة وبيحاولوا يتقربوله
يعني الواد ابن الابلة كان عايش ملك
-----------
مرت سنوات التعليم الابتدائي علي خير ووصلنا للصف الاول الاعدادي
كان بيتم تحويلنا اتوماتيكيا للمدرسة الاعدادية المجاورة
والشئ الوحيد اللي اتغيير هو
ان الواد ابن الابلة مابقاش الواد ابن الابلة
اصبح تلميذ مثل اي تلميذ
--------
كل يوم الواد يتضرب
مكانش فيه حد بيصاحبه
كان اول واحد يتسأل في الفصل
كل شئ اتغيير 160 درجة
لدرجة ان كلمة الواد ابن الابلة كانت تقال علي سبيل السخرية
------
وكان دايما السؤال اللي محييرني
مين المسئول عن كدة
الابلة؟
الواد ابن الابلة؟
المدرسين والتلاميذ اللي كانوا بتعاملوا كدة مع الواد ابن الابلة؟

-----
كل ما ذكر امامي شئ عن جمال مبارك اتذكر حكاية الواد ابن الابلة