خليــــكــ صــــايع
السلام عليكم ورحمة الله
هى مش كلمة " صايع " كانت شتيمة زمان .. ؟! "
حذرنا الكبار _ واحنا لسه عيال _ من خطورة أن
نصبح " عيال صايعة "
فعلى سبيل المثال
عندما تتأخر فى العودة إلى المنزل بعد المدرسة يتم استقبالك بسؤال " كنت فين ياصايع لحد دلوقتى .. ؟! "
وعندما يكون الزرار العلوى للقميص مفتوحا " متفتحش صدرك زى العيال الصايعة " .
وكان هناك ارتباطا وثيقا بين الصياعة والتدخين ، والوقوف ع النواصى ومعاكسة البنات ،
ووضع الأيدى فى الجيوب أثناء الكلام مع الأب ، وشرب القهوة ، والكلام فى التليفون بالساعات والرد على الكبار بإسلوب غير مهذب ، والتزويغ من المدرسة ، والرسوب فى امتحان نهاية العام وارتداء القميص على اللحم .
وكان لقب " صايع " لقبا مخيفا نهرب منه " وهو الواحد ايه ياجماعه غير سمعة وشوية حاجات فوق بعض " .
وكانا نحرص على الإبتعاد عن أى شخص يحمل لقب " صايع " علشان الواحد " ميتشبهش " .
ولكن بمرور الوقت حدثت طفرة ، لم تعد كلمة صايع شتيمة ، بل أصبحت وساما يضعه الآخرون على
صدر كل من يحوز إعجابهم ، ولم يعد الصايع هو الشخص " اللى مش متربى قليل الأدب ، اللى بيسقط
دايما وقاعد طول النهار ع النت ، وبيعلى صوته على أهله وبيسرق فلوس من ورا أهله علشان يجيب
بيها سجاير " .
هذا الشخص مبقاش اسمه " صايع " بقى اسمه " مغفل " يااخوانا .
وأصبح الشخص الصايع هو الشخص الناجح القادر على إثارة إعجاب الناس من حوله ، الشخص القادر
على انتزاع تصفيقهم ، وأصبح " الصايع " هو النموذج والقدوة والمثل الأعلى أحيانا .
ولقب " صايع " لم يعد أيضا مقصورا على الأشخاص فقط ، فهناك أشياء كثيرة ممكن نقول عليها صايعة
مثلا جهاز الموبايل اللى فيه كل الإمكانيات اللى محتاجها واللى بتحلم بيها ... يبقى( موبايل صايع . )
ممكن تلاقى ( جون صايع ) عبارة عن جملة بين 3 لاعبين سريعة ورشيقة وغير متوقعة .
ممكن تلاقى بوستر لألبوم لمطرب متصمم بطريقة صايعة ومحطوط فى حته صايعة .
ممكن تشوف فيلم نهايته غير متوقعة ولما تمر فى خيالك تبقى ( نهاية صايعة ) والسينارسيت اللى كتب الفيلم ( سينارست صايع ) .
وممكن تلاقى بلد يتقال عليها ( بلد صايعة ) زى الصين اللى قدرت انها تخترق مصر بمنتجاتها
ويبقالها فى كل بيت مصرى 20 منتجا على الأقل ، وبالتالى يمكنك أن تقول إن ( الصين دول
صايعين قوى ) .
لم يعد لقب " صايع " مزعجا مثل لقب " عنده ايدز " ولكن صايع أصبحت وسام وشرف مساو فى
قوته لوسام الـ " iso 9001 " ولا أعرف ماذا حدث بالضبط وغير سمعة الكلمة 180 درجة ..
... غالبا هى دى الصياعة !
أستطيع الآن _ وأنا ضميرى مستريح _ أن أشجعك على أن تكون " صايع " بالمعنى الجديد للكلمة
... للصياعة بمفهومها الجديد آداب يجب الإلتزام بها حتى تستحق اللقب .
1 – الصايع عمره ما يقول على نفسه صايع ، عمرك شفت واحد ذكى ماشى يقول للناس " أنا
ذكى ياجماعة ؟ "
2- الصايع يكره الفهلوة، لأن الفهلوة سرقة ومجرد استغفال للناس ، الصايع يحترم ذكاء الآخرين .
3 – الصياعة تعتمد على الثقافة العامة فى كل المجالات ، يكفيك أن " تعرف حاجه عن كل حاجه
4- الحظ قد يقودك إلى القمة ، والصياعة أن تحافظ عليها .
5 – الصياعة إن بالك يبقى طويل ، وماتبدأش بالغلط ، وماتردش على اللى بيستفزك ، وإنك
تسامح الشخص اللى تقدر تنتقم منه بسهولة
6 – الصياعة إنك ماتكررش نفس الغلطة مرتين
7 – الصياعة إنك تدى كل واحد حقه ، وتعرف قيمة اللى قدامك بالظبط .
8 – الصياعة إنك تبقى فاهم كويس إنه :-
- مش مهم إنك تغير الكون ... المهم إنك تخلى الكون ما يغيركش .
- الحب اللى يجى بسرعة لازم يروح بسرعة .
- الأحمق هو الشخص اللى لسانه أسرع من عقله .
- استمتع بالحاجات الصغيرة ، بكره هتعرف إنها كانت كبيرة .
- اتعلم تضحك على مشاكلك وانت عمرك ما هتبطل ضحك .
- الخط المستقيم أقصر طريق بين تقطتين ، والإبتسامة أقصر طريق بين شخصين .
- الصبر ... هو الحاجه الوحيدة اللى لازم تستعجل وانت بتتعلمها .
- وجودك فى الحياة هدية ماحدش يقدر يقدمهالك غير ربنا ، وفى ناس كتير بتيجى لهم هدايا قيمة
الشاطر هو اللى يعرف يستفيد من الهدية اللى جت له .
كل حاجه فى الدنيا فيها شىء جمييل ، بس مش أى حد يقدر يشوفه .
مش كل مرة تتعب فيها هتوصل للى انت عايزه ، بس عمرك ما هتوصل للى إنت عايزه من غير ما تتعب .
الفهلوة سرقة ... خد بالك مفيش طريق مختصر للمكان اللى يستحق إن الواحد يروحه
حياتك فيلم ، واللى حواليك بيلعبوا أدوار الأب والأم والجار والصديق ، بس إنت بطل الفيلم .. حاول دايما تتصرف زى الأبطال .
أخطر عيب فى البنى آدم إنه مايشوفش فى الناس غير عيوبهم .
الصديق الجيد هو الهدية الوحيدة اللى الواحد بيقدمها لنفسه بنفسه .
الصديق الكويس هو اللى بيبقى عارف عيوبك ومع ذلك بيحبك .
أول خطوة فى النجاح إنك تعرف إنت عايز إيه .
ابتسامتك فى وش أى حد هتخليه صعب إنه يكرهك .
مش مهم إن كل الناس تحبك ، المهم إنك تحب كل الناس .
عمرك ماهتعرف قيمة المية من غير ما تعطش ، وعمرك ما هتعرف الصح من غير ما تغلط .
مش أى هدية ينفع تقبلها .
ماتسيبش الريموت كنترول فى إيد أى حد إلا لو كنت بتثق فيه .
ماتصدقش اللى يقولك " هى كده " أو " هى ماتتعملش غير كده " كل الحاجات ينفع تفكر فيها من أول
وجديد حتى لو قالولك دى ثوابت ، وخليك فاكر إن السباحة لو كانت بتخسس _ زى ما بيقولوا
كان الحوت بقى سمكة زينة من زمان .
مافيش حاجه اسمها حظ ، والمحظوظ هو مجرد شخص عارف هو عايز إيه وبيقدر يستغل كل الحاجات
اللى بتقابله فى السكة لمصلحة الحاجه اللى هو عايزها.
أوحش حاجه إنك تكون مابتعملش حاجه ، لإنه هيبقى صعب تعرف هتخلّص إمتى .
الوقت اللى هتضيعه فى التفكير فى الحاجات الى نقصاك المفروض تديه للتفكير فى الحاجات اللى عندك.
الخبرة هى الحاجه الوحيدة المفيدة فى الفشل .
العقل زى الباراشوت ... ما بيشتغلش غير لما يتفتح .
ها .... إزى الحال .. ؟!
أقول مبروك على اللقب الجديد ؟؟؟؟
المفضلات