لو محلك او محل واحد صاحبك اتسرق (ادخل هنا)بداية اخوتى الكرام ربنا لا يكتبها على احد

[الصبر]

بداية اخوتى الكرام ربنا لا يكتبها على احد
ان تاتى لتفتح محلك فى يوم من الايام فتجدة قد كسر وسرق
الصدمة والضيق والحسرة وكل المشاعر السيئة ستجدها عندك
ومشاكل مع الزباين اللى ليها اجهزة عندك
والبداية من اول وجديد
او الرجوع سنة للوراء
او اكثر او اقل

كل هذة الاسباب هى التى جعلتنى اكتب هذا الموضوع وانا اتمنى ان نتعاون كل قدر استطاعتة

سنجعل هذا البوست يخص كل من مر بهذة التجربة بملابساتها ومشاكلها والدروس التى تعلمها منها خصوصا فى ظل حالة الانفلات الامنى التى نعيشها بعد ثورة 25 يناير

وسأبدا بنفسى :

طريقة سرقة المحلات :

وهنا ساكتب كل الطرق التى حدثت معى ومع زملائى فاتحين محلات برضة
اول حاجة التوقيت كان ساعة الفجر
يعنى الامام يقول اللة اكبر يبداو السرقة
الامام يقول السلام عليكم ورحمة اللة وبركاتة يكونوا مخلصين
طريقة فتح الابواب
اول معلومة لازم تعرفوها كلكم ودى انا عرفتها من (حداد) بتاع ابواب صاج ان كل الاقفال اللى بتكون موجودة فى اجناب الباب الصاج(تقريبا ملهاش لزمة)
لان كل الاقفال الموجودة فى مصر (تكتين فقط)
والقيمة اللى بيدخلها اللسان بتاع القفل فى المجرى بتاعة الباب الصاج ما بين 1.5 سم الى 2سم
دى حاجة
الحاجة التانية ان الباب الصاج لازم يكون فية خلوص (فراغ يعنى) 1 سم
ودة علشان الباب فى الفتح والقفل ميبقاش تقيل ويقفش فى مكانة
اطرح بقة قيمة الخلوص من قيمة اللسان بتاع الباب الصاج
هتلاقى ان القفل بيكون ماسك على واحد سنتيمتر فقط
(مفاجاة طبعا للكل)
بالبلدى يعنى امسك الباب الصاج بتاع المحل وحركة يمين وشمال مش فوق وتحت وانت هتفهم موضوع الخلوص وال 2 سنتيمتر

ودة اللى بيخلى كل الحرامية يدخلو عتلة ويردو اللسان جوة القفل بمنتهى السهولة

دة بالنسبة لموضوع اقفال الجنب

نيجى بقة للقفلين اللى تحت
اولا لو هما من الاقفال العادية ايا كان شكل المفتاح بتاعهم (كمبيوتر او نحاس او حتى بصمة صوت ) (ضعيفة جدا جدا)
لانك لو مسكت القفل فى ايدك وبصيت على الحتة اللى فية اللى بتمسك القفل
هتلاقى عمقها حوالى 3 مليمتر
ودى سهلة جدا تتطفش
لان اللى ماسك القفل كلة يعنى قوة القفل كلها تتمركز فى ال 3 مليمتر دول (تخيل المصيبة)

طيب نفترض انك جايب اقفال من نوع (الزمبة ) ودى اقفال متينة جدا جدا وغير قابلة للكسر
يبقى لازم تتاكد من نقطتين
اولا ان الحديدة اللى على شكل مثلث اللى بتبقى طالعة من الارض اللى انت بتعدى القفل من خلالها لو مش ملحومة على نفسها من تحت ((( بيفسخوها))) ويسيبوا القفل زى ما هو

ثانيا لو الحديدة اللى على شكل مثلث اللى طالعة من الارض ملحومة على نفسها يبقة لازم تتاكد انها متثبتة فى الارض كويس جدا جدا لان فى محلات عندنا رفعوا الباب من الارض بعتلة والقفل الحديدة اللى على شكل مثلث والتثبيتة بتاعتها اللى فى الارض كلهم طلعوا
لان التثبيتة اللى فى الارض كانت ضعيفة





على العموم
ربنا لا يكتبها على احد
انا محلى تسرق يوم الثلاثاء الفجر 22/3/2011
ودى قائمة ببعض الاشياء اللى اتسرقت منة
المحل بتاعى فى العاشر من رمضان

الاحهزة تخص زباين

+ 6131 نوكيا +5310نوكيا+ U900 + سامسونجD880 + سامسونجK300 صينى +صينى N73

بعض المسروقات المتنوعة:

40 ساعة حريمى

55 ساعة رجالى

120 ميدالية رجالى مشكلة

75 ولاعة سجائر رجالى سخان

2 ولاعة مكتب على شكل مسدس

15 مبسم

75 محفظة رجالى انواع متعددة

2 جهاز برجكتور ACERموديل 1165 معهم الشنط الخاصة بهم والكابلات

رجاء من يستدل على اى من هذة الاشياء ان يبلغ اقرب مركز شرطة لدية او الجيش او يتصل على

0106778572 مصطفى حسن او 0140013919 محمد حمدى

ويا رجالة كلة ياخد حذرة جدا جدا اليومن دول لان احنا عايشين فى ايام ما يعلم بيها الا ربنا وربنا ما يكتبها على حد ابدا

انا ارفقت صورتين للاقفال عشان تخدوا بالكم

ورفعت صورة لقائمة ببعض المسروقات من التليفونات باوصافها وعلامتها واخر 3 ارقام من السريل من على اليمين

[ahmedasmet]

تم نقل الموضوع بواستطى
للقسم العام
وربنا يسترها على الجميع محلات كتيره جدا اتسرقت وربنا يصبركم

[hassan moamen]

ربنا يعوض عليك اخى الفاضل

واصبر على البلاء واحتسب ولك الاجر ان شاء الله

وجزاك الله خيرا على التنبيه وربنا يعوضك خير

[aboslma]

قلبى معاك اخى العزيز مصطفى وفداك انت ومحمد وربنا ان شاء الله هيعوضك ويراضيك

توجه اليه بالدعاء وعليه العوض ومنه العوض

ولو محتاج حاجه انا تحت امرك فى اى وقت

اخوك احمد عاطف

[Salah Sharaf]

قلبى معاك اخى مصطفى
ان شاء الله ربنا يعوض عليك ويرزقك بأحسن منهم
مع الاسف فى شويه كلاب فى البلد لازم يتلموا ويتعدموا فى ميدان عام
حتى يكونوا عبره لغيرهم من المجرمين والبلطجيه
وان شاء الله ازمه وتعدى
اهم حاجه الواحد يكون ربنا راضى عنه ويكون مرتاح البال والنفس
فداك اكثر من محل اخى
ولو محتاج الجهاز الــ 6131 انا عندى جهاز تبع المحل بسى ضارب سريال ممكن تأخذه تحل به مشكله الزبون
انا مش محتاجه اصلا وهوا مرمى فى الدرج من سنه تقريبا
وانا تحت امرك فى اى شىء
اخوك صلاح شرف
مستنى اتصالك

[السخاوى]

ربنا يعوض عليك أخى الكريم

نحتسبه عند الله خيرا

وبارك فى جميع شباب الجيم فلاش على هده الروح

[هشام الرميحي]

ربنا يعوض عليك اخى الفاضل

واصبر على البلاء واحتسب ولك الاجر ان شاء الله

وجزاك الله خيرا على التنبيه وربنا يعوضك خير

[MiNa*GSM]

وربنا يكون فى عونك ويقدرك وربنا يعوضك على الخسائر اللى حصلت ليك وان شاء الله تعوضها من تانى

وشكرا ليك على التنبه لاخوتك لاخذ الحذر

تم اضافته فى التنبهات

[Mohammed_Awwad]

لا إله إلا الله . سيدنا محمد رسول الله
ربنا يخلف عليك بأفضل . ويقويك على حاجة الناس . ويجعل في قلوبهم رحمه من ناحيتك
وربنا يجعل كل هذا في ميزان حسناتك ويمحو من سيئاتك

[Robier*GSM]

ربنا معاك اخى الكريم ويعوض عليك
وشكرا على التنبيه