صالون السامسونج (مع كيمو)

[kimohero]

بسم الله الرحمن الرحيم

بعد تعدد الاجهزه وكثرتها واختلاف الطرق فى تفليشها واللى عايز يتعلم السوفت (خاف ) اصله بصراحه معزور سامع اجهزه بتفقد البوت و(تموت) وتعوز بوكس تانى علشان ترجع تشتغل والبوكس التانى (غالى ) على رأى المثل كييف السامسونج يجيبله ريفييه (نسبه الى ال riff box ) انا قولت يا واد يا كيمو ربنا يقدرك وتعدى انتا بسلام....وبعدين لما سرحت لقيت حاجه خلتنى امد ايدى لان اللى محتاج يتعلم السوفت او الصيانه ده انسان محترم مش عايز يبدل برده جهاز ببرده تانيه ويكفن شاشه ويحط للزبون واحده مش شغاله .. وهكذا ..هو نفسه يشتغل ويكسب ويتعلم تانى ويشتغل يقوم يكسب اكتر ...يستاهل العلام

احنا نقعد مع بعض ونقرب المسافات لغايه كل بتوع الموبيلات ميفلشه سامسونج واحنا قدها ان شاء الله
والمنتدى مش هيبخل على ابناءه (لما يسبتلى الموضوع )
الله يرحم كان التثبيت ده شغلتنا

هنشوف المواضيع الجامده اللى على الساحه ونتكلم فيها وناخد راى ناس واللى عنده كلمه يقولها ..ماعد شكرااا ...مجهود كبير والكلام اللى ياخر ده اتكلم فى الموضوع او متتكلمش

بس فى الاول هنتكلم فى الموضوع من الاول من ساعه مكان الجهاز فى كوريا (فى المصنع )...........

[kimohero]

سوفت وير الجهاز ده عباره عن ايه؟

مجموعه برامج صغيره فى برنامج واحد كبير بلغات مختلفه مقفوله بطريقه معينه من الشركه (دى الفلاشه)
البرامج الصغيره زى مستعرض الصور مشغل الموسيقى قاموس للغات (علشان تكتب وتقرى الاسماء والرسايل) الاله الحاسبه برنامج يقوم بتسجيل البيانات علشان يحفظ اعدادات المستخدم ...الخ ممكن يعدو الالف برنامج بس انتا لما تعدهم تلاقيم شويه ..

الفلاشه دى كام ملف بالضبط ؟؟ ده حسب الجهاز

فى جهاز بيبقى ملف وجهاز ملفين وجهاز تانى تلاته وفيه سبعه وتمانيه.. مش شرط عدد معين
وهتعرف كل حاجه فى وقتها

ليه اى فلاشه مش بتركب على كل الاجهزه وكل فلاشه ليها جهازها؟؟؟

السؤال ده مش تافهه ده فى ناس شغاله سوفت ونفسها تسال السؤال ده... الاسباب اللى متخليش الجهاز يشتغل بفلاشه مش فلاشته كتيره اهمها:

- بعض ايسيهات الاجهزه بتبقى محتاجه ملفات معينه علشان عمليه التشغيل والملفات دى مش بتكون الا فى فلاشه الجهاز ده فقط لانها مبرمجه على كده انها لما تاخد الملفات ديه تقوم بوظيفتها وده يعتبر اهم سبب فى ان الجهاز مش بيشتغل الا على فلاشته
- جرب فى اى جهاز تشوف سحب الجهاز على البور سبلاى وهو فاقد سوفت هتلاقيه هو نفس السحب فى حاله عيب فى ايسى الفلاش اى ان الايسى الفلاش معطل يساوى ايسى فلاش بدون ملفات وليه ايسى الفلاش بالاخص لانه ده مكان تخزين الفلاشه اللى منه بتقوم بعملها على باقى الجهاز
- بعض البرامج الصغيره اللى قولنا عليها فى الاول بتبقى مصممه على اساس مقاسات معينه فى الجهاز زى الشاشه ومعتمده على وجود قطع هارد وير معينه زى البلوتوث

[kimohero]

ايه هو بوكس السوفت وير وايه لازمته؟؟؟؟

بوكس السوفت اى كان مش مهم بالنسبه لينا قوى المهم البرنامج اللى مع البوكس بس اغلب البرامج ديه مبتشتغلش الا مع البوكس بتاعه ودى مبرمجه كده علشان الشركه المنتجه للبرنامج تضمن انك تشترى البرنامج وتدفع فيه فلوس بس المهم البرنامج خليك فاكر دى كويس قوى البوكس ده حته حديده البرنامج مبيشتغلش الا لما يشوفها ودى وسيله تضمن بيها الشركه انك شارى البرنامج وبيديك بعض الخدمات مع البرنامج زى السبورت بتاع البوكس (الدعم الفنى )

مفيش وسيله تانيه غير شراء البوكس علشان اشتغل ؟؟؟؟ لألآ فيه

لما شركه سامسونج انتجت اجهزتها اتاحت للمستخدم انه يعمل سوفت وير بنفسه لاجهزته بون طبعااا اى بوكسات لانه مش معقول انه يقول للمستخدم لو حبيت تحدث جهازك ابقى اشترى بوكس سوفت عملت برنامج لكل جهاز يقدر ينزل السوفت للجهاز بدون اى بوكس ودى البرامج اللى هنبدء بيها شغلنا

طب البرامج ديه مين اللى عملها ونجيبها منين والفلاشات علشان نشتغل؟؟؟

البرامج مجانيه طبعااا (مغرقه المنتدى ) والفلاشات كمان ( انتا كبيرك فى الاول تحتاج كابل usb للجهاز اللى هتشتغل عليها.. مبسوط

[kimohero]

اسمع عن حاجه اسمها الجهاز ده مالوش تعريب وده بيتعرب ..اعرف منين؟؟؟

دخلنا فى الجد لما الشركه انتجت الاجهزه فى اجهزه انتجتها لمناطق معينه فى العالم مش للعالم كله عملت مثلا جهاز لشركه فودافون انجلترا (اكيد ده ممكن مش تلاقيله تعريب وممكن العكس ) اذا كان نزل الشرق الاوسط الشركه لازم تعمله فلاشه عربى .. منتج لشرق اسيا فقط ومكنوش عملينه علشان ينزل الشرق الاوسط فمعملوش ليه فلاشه عربى وهكذا

طب برده احنا نعرف منين؟؟؟

لما تدور على فلاشه للجهاز فى طريق معينه لكتابه اسم الفلاشه من الشركه هنتعلم منها نعرف الجهاز ده له عربى ولا لأ

[kimohero]

مثال:
بندور على فلاشه لجهاز e250 لاقينه الفلاشات ديه

E250 DXFL2
E250 CZGJ3
E250 XXJH6

السؤال بقى اعرف منين اى من الفلاشات ديه عربى ..الاجابه ان ولا فلاشه فىهم تحتوى على اللغه العربيه لان اسم الفلاشه عموما عباره عن اسم الجهاز + مجموعه حروف تتدل على اللغه التى تحتوى عليها الفلاشه والفلاشه اللى بتحتوى على اللغه العربيه لازم تكون تبدا الحروف بعد اسم الجهاز طبعااا (JP ) او ( JR ) مثال :
E250JPGC1
E250JPGJ1

شايف بعد اسم الجهاز مباشره حرفين JP كده الفلاشه ديه تحتوى على اللغه العربيه

[kimohero]

لقينه فلاشه وفهمنا موضوع اللغه .. التفليش بقى؟؟؟

نجى بقى لموضوع التفليش ده بيبقى عن طريق برنامج اسمه الدونلودر او الفلاشر او الاوبتى فلاش الخ..
وكل دى اسماء لبرامج بنزل فيها السوفت للجهاز ده طبعا غير موضوع البوكسات المتخصصه فى السوفت للسامسونج نراجع تانى على اسماء البرامج :
DOWNLOADER
OPTI FLASH
FLASHER
دى كلها بمعنى واحد وهى وسيله لتنزيل السوفت للجهاز وبعتبرها الطريق الشرعيه اللى معترفه بيها شركه

[Many]

تسلم ايدك يا ابو كيمـــــــــــــــــــــــــو بجد موضوع مهم جدا جدا

[REBAL]

الموضوع يجنن تسلم بجد يا غالي
بس ياريت تغير تنسيق الخط انا عيني ورمت من القاراءة بجد

ثانيا بقي تتشرف وتحط لنا كام موقع لفلاشات السامسونج او طريقة البحث عنها

[kimohero]

تسلم ايدك يا ابو كيمـــــــــــــــــــــــــو بجد موضوع مهم جدا جدا

احنا قولنا ايه يا باشا بلاش كلمه شكراا وتسلم وربنا يخليك لمصر .. عايز تعمل حاجه مفيده اسأل سؤال وانا ارد عليه او اجيب غيرى يرد عليه المهم اللى يدخل على الموضوع لازم ليفيد ليستفيد ان شاء الله.

[kimohero]

الموضوع يجنن تسلم بجد يا غالي
بس ياريت تغير تنسيق الخط انا عيني ورمت من القاراءة بجد

ثانيا بقي تتشرف وتحط لنا كام موقع لفلاشات السامسونج او طريقة البحث عنها

انا عينى ليك يا معلم اولا انا هكبر الخط شويه زى مطلبت بس موضوع الفلاشات ده ...لالا عيب المنتدى فيه كل اللى انتا عايزه ومنى انا انا كل مشاركه هحط خمس فلاشات ... حاجه تانى