مـد ايـدك يا اخـويـا

**&& اشكوزا &&** · 07-02-2011, 10:43 PM

امك بتبكي حزينة
ودمعها كاويها
والكل خانها وباعوها
واتفرجوا عليها
وأنا وانت ليه نختلف؟
مين غيرنا لو تنكشف
يجري يغطيها؟!!!!!!
-------
---
-
مين غيرنا قلبه اتوجع
لما كسرها الخوف؟
ولما نزف جرحها
مين قلبه كان ملهوف؟
مين غيرنا عمره اتسرق؟
مين غيرنا قلبه اتحرق
من حسرته عليها؟
------------
------
-
إحنا اللي دوقنا العذاب
والمرمطة والذل
وشربنا كاس المرار
لما الميزان اختل
قتلوا في عنينا النور
وعلوا ما بينا السور
واستفردوا بيها
--------
----
-
إزاي نسيب امنا
لعبة في ايد النخاس؟
وازاي نسيب عرضها
فرجة لكل الناس؟
امك ومن حقها
تشوف معاها ابنها
راجل ويحميها
--------
-----
--
دلوقتي مش مشكلة
نرفض ولا نقبل
وإنك تقول يمشي
واني اقول يفضل
المشكلة اننا
لازم نراعي امنا
ونعتني بيها
------
---
--
يا اخويا دا انت السند
وانت الشريك في الدار
وانا اللي جنبك وتد
يحميك من الاخطار
مد الايدين نتحد
وبإذن واحد احد
نرجع ونبنيها
-------
----
--
كل الطغاة زايلين
وانتي اللي باقية لنا
حبك دا شرع ودين
شايلينه لعيالنا
تحيا مصر
تحيا مصر
تحيا مصر

اهداء لكل المصريين
داخل وخارج ميدان التحرير

**هشام الرميحي** · 07-02-2011, 10:58 PM

تسلم ايدك يا ابو حميد

**R E M O** · 07-02-2011, 11:00 PM

كل الطغاة زايلين
وانتي اللي باقية لنا
حبك دا شرع ودين
شايلينه لعيالنا
تحيا مصر

**anim** · 07-02-2011, 11:02 PM

الله يفرج عن مصر

**~~Salah Sharaf~~** · 07-02-2011, 11:08 PM

واضرب الظالمين بالظالمين واخرجنا منهم سالمين
ايام وبتعدى وحكام بتموت وبتزول وبتعدى برده
لكن
لكن
لكن
لكن
مصــــــــــــــــــ باقيه ــــــــــــــــــــر