.gif)
لوصفة اللولبية للحصول على جوازة سحرية ساغه لقلبك 2
من خلال الواقع المبهج
وما يحدث حولنا هنا وهناك
إليكم
الوصفة اللولبية للحصول على جوازة سحرية
إلى
كل فتاة مصرية ومش مصرية
وإلى
كل شاب مصري جدع...وبرده مش مصري وجدع
والله انتوا صعبانين عليّة
أولا
يا بنتي ابدأي بتكوين نفسك وحوشي وحاولي تشوفي عقد عمل لأبوكِ في بلاد بره علشان يسافر 20سنة ويقدر يبني عمارة ويبقى عندك شقة
وانت يا بني اشتغل 3 شغلانات الصبح والضهر وبالليل علشان تقدر تدفع إيجار شقة(إيجار جديد) لأنك أصلا مش حا تقدر تدفع تمن شقة تمليك
ثانيا
مش مهم الفرح يبقى في نادي...الناس كده كده يا حبيبة مش حا يعجبهم البوفية وحا يطلعوا يشتموا في العريس والعروسة وسنينهم..خليها حاجه ساقعة أو البسوا كلكم باتيناج وفوتوا على محل عصير قصب ويبقى فرح تيك أواي
ثالثا
مفيش داعي تشتري فستان استلفي فستان زوزو بنت خالتك هو صحيح واسع عليكِ بس مش مهم أربطيه بحزان من ورا...أهي ساعة والسلام
رابعا
ليه تشتري بدله ب3000جنيه... خد بدلة محمد صاحبك
أيوه اللي استلفها الشارع كله...أهي لسه ماسكه نفسها عاوزة بس تتكوي وتنية البنطلون تتفك لأنك أطول منه
وأهي ساعة وتعدي
خامسا
الشبكة تبقى بالنص
هي مش أحسن منك يعني...انت كمان عريس زي الفل
أو تشتروها شهر كده ...وبعد ما الناس تتفرج وانتوا كمان تتفرجوا ....تبيعوها وتجيبوا العفش
سادسا
مفيش داعي للسفرة...أصلا مش حا تقدروا تعزموا حد...لزمتها إيه بقى وبعدين دي عاوزالها طقم صيني يترص وطقم كاسات علشان يبان في النيش ومفرش مشغول وفازة تتحط عليها...
واللي حا يفقع مرارتي الشمعدانين والساعة اللي ماليين شوارع اسكندرية ولازم كل العرسان يجيبوهم ويحطوهم
سابعا
ليه صالون!
مفيش ضيوف
أصلا حا يخافوا ييجوا لأنهم لازم يجيبوا حاجة معاهم...تورتاية أو علبة شوكولاته والحمد لله الناس مقاطعة الحاجات دي
وبعدين الصالون عاوز فازة كروازينية وبرواز سيرما ونجفة من درب البرابرة
بلاش يا ولاد
ثامنا
ليه تلاجة....ليــــــــــــــــه
مالها القلّة
وبعدين انتوا حا تحطوا أصلا إيه في الفريزر...؟
كيلو اللحمة بقى بكام؟
قاطعوها
وقاطعوا كل حاجة
والفراخ فيها أنفلونزا...والسمك ملوث....واللب مغشوش...واللانشون والجبن مضروبة
تاسعا
ليه سجاجيد؟
الدنيا حررررر
وبعدين لو الشقة سيراميك,,,,مش حا تحتاج لفرش
والله العظيم هم اللي بيقولوا كده في التلافزيون
وكمان بلاش شقة لأنك حا تضطر تدفع فواتير إيجار ونور ومية وغاز ووصلة الإنترنت ووصلة التليفزيون يا إما حماتك حا تخليك تشتري دش
صدقني بلاش
وأخيرا
ليه تتجوزا
ما انتوا حلوين أهه وعندكم إنترنت وبتقروا كلامي....
بلاش أحسن
واستنوا لما حد يربح المليون
تصدقوا
المليون مش حا يكفوا يا ولاد
الله يكون في عونكم
رد مع اقتباس
المفضلات