استراحة عمنا الكبير الشاعر (صلاح جاهين)

[&& اشكوزا &&]

اتنين صباحـــــــــــــــــا

النور ملو الشوارع ،
و مليون راديو والع ،
الساعة اتين صباحا ،
لكن إيه الموانع !
.. الخلق رايحة جايه ،
و الدنيا لسه حيه ،
مليانه بالهأَو أَو ،
و زعيق القهوجية .
.. واحد يقول لواحد :
خليك يا عم قاعد ،
التانى يقول له : شكرا ،
ده انا م المغرب مواعد ،
فيه سهره لسه عندى ،
فى بيت فلان افندى ،
ح ناكل حاجة حلوه ،
و نشرب تمر هندى ..
و اللى تروح دالقه جردل ،
فوق حضرة المبجل ،
طبعا صاحبنا يزعل ،
و ينفجر شتايم ...
و الحى كله يوصل ،
ما بين مصلح و لايم ،
اللى يقول :
يا جماعة ...
و اللى يقول : يا بهايم ...
و مطرب الاذاعة ،
يصرخ ، و ف وجده هايم ..
و لو طرطقت ودنك ،
فى وسط دى العظايم ،
تسمع مسحراتى ،
بطبله صوتها واطى ،
بيقــــــــــــــــــــول :
اصحى يا نايم

[&& اشكوزا &&]

السيد عبد العاطى البروقراطى

السيد عبد العاطى البيرو قراطى ،
من ( بيروقراط ) مركز مش فاكر ايه ،
كل بلدهم بهوات سبحان العاطى ،
الكاتب بيه و مدير المصلحه بيه ،
و السيد عبد العاطى البيروقراطى
راجل دوغرى ، فاهم إيه اللى عليه ...
راجل يعرف أمتى ينخنخ ويطاطى
و كمان يعرف امتى يدلدل رجليه .
ييجى المكتب ، بدرى بمواعيد ظباطى ،
و الساعة اتنين و لا ورقة تكون فى ايديه .
فنان فى الشغل ، وفنه أرستقراطى ،
الفن فقط للفن ، بتضحكوا ليه ؟
لا تقوللى مصالح شعب و لا كلام و اطى ،
الهدف السامى علاوة تلاته جنيه .
و السيد عبد العاطى البيروقراطى
( السد العالى ) ف نظره .. اسمه دوسيه !

[&& اشكوزا &&]

الحرب مش نزهــــــــــــــــة

الحرب مش نزهة و مش تفاريح
مش طبل أجوف يملا سمع الريح
الحرب لما تبقى حرب صحيح
معناها موت و ألم و دم يسيح
راجل لراجل .. مش بتات قنازيح
على كتفهم مدفع فشنك صفيح
و شمال يمين يستعرضوا المفاضيح
و يرقَصوا هودهم بشكل قبيح
و يصوروهم مأجورين سناكيح
سايقين بطل مصى ف كرامته جريح
و يقولوا دول أسروه .. كدب صريح !
ده كان فى يونيه اللى ماشافش قتال
و دخلنا فى اكتوبر رجال لرجال
( إرحم يا مصرى ) بقم يقولم قال
و يسحسوا ا؟لأندال دموع ماسيح .. !

[&& اشكوزا &&]

الزبـــــــــــاين

اللى زّيك و بيشتغل بالأجره
و اللى زى و له ماهيه مسوجره
طول حياتنا نعرق على رغيف عيشنا
و النهاردة ما يفيضش حاجه لبكره
طول حياتنا نعرق على رغيف عيشنا
طول كا عشنا ما عمرناش حوَّشنا
المساكن و الأكل ناتفين ريشنا
و الملابس جايين لنا بالقدره
بعنا روحنا بالجمله و القطاعى
للشيطان و الخواجه و الإقطاعى
و اشترينا بصحتك و دارعى
يوم زياده برّا القبور الغبرة
يوم بيوم بالعرق كتبنا حياتنا
و كتبنا قصة حياة أَبهاتنا
و قصة الخلق كلهم إخواتنا
اللى شاربين كاسلتنا قطره بقطره
ناس كتير فى البلد دى زيك زيى
كلنا مولودين فى أحوال تعيىّ
الفرق كتير فى البلد دى زيك زيى
فى الحسين و الإمام وغمره وشبرا
فى المحله و المنزله و بورسعيد
و بنى سويف و كفر شكر و رشيد
و البلاد البعيد فى آخر الصعيد
و البلاد اللى أرضها لسه صفرا
كنت باشرب عصير قصب من مدّه
و المعلم واقف قصاد العِدّه
ينشف العود ده يلتفت للعود ده
شفت تِفل العيدان تلول دت عِبرعه
شفت تِفل القصب و ثفت الزباين
اللى ممصوص و اللى جميع عضمه باين
كلنا هلوكات عِدَد و مكاين
كلنا ممضوغين على ضبَه فاجره !

[&& اشكوزا &&]

الظـــــــــــــــــلام

و انا فى الظلام .. .. من غير شعاع يهتكه
أقف مكانى بخوف و لا أتركه
و لما ييجى النور و أشوف الدروب
أحتار زيادة .. .. أيهم أسلكه .. .. ؟

عجبى

[&& اشكوزا &&]

الشدايـــــــــــــــــــــــــــد

الله يجازى الشدايد كل خير يا ولاد
البوتقة الضيقة القايدة بغير وقاد
حكم ما بين المعادن من ضعاف و شداد
و تقول .. و قالت لنا على كل شئ بحياد
بشراكى يا مصر يا أشرف وطن و بلاد
معدن ولادك شديد البأس كله عناد
لا ينكسر من محن و لا ينتنى فى جهاد
مصقول كأنه المراية يضّح الأبعاد
فى ضيه شاف الشباب : الحق و لحقاد
الثورة فى خصمها و كيد خصها المنكاد
أبو عقل شرير و فكر حقير و رأس فساد
قران بحور الحياه لص المياه و الزاد
نهض الشباب يد واحدة و نبض قلبه ازداد
ع الكتف مدفع و فى الحضان دفاتره جداد
قال يا أعادى الليلادى بكرة بعده معاد
بينى و بينكم و بين الغل و الأحقاد
أما انتى يا عدوة الانسان فى كل مهاد
انتى ( يا أمية ) يا لعنة مود على عاد
ما ابقاش شباب مصر لو م كنت أمحيكى
و اقطع بقية الطريق بالثورة للأمجاد

[&& اشكوزا &&]

العلـــــــــــــــم

كم ألف مرة يا علم يا مجيد
قدام صفوفنا مشيت خفيف و سعيد
و مشينا خلفك ننشد الأناشيد
و نشبعك بالحب و التأييد
كم ألف مرة كل صبح جديد
قبل الضباب ما ينقشع و يبيد
شفناك بتصد سارية التمجيد
و هتفنا ليك و حييناك بالايد
يا بؤرة الوطنية و التوحيد
يا مصدر الالهام لكل مريد
موت و تبقى مرتفع و عنيد
على كل شبر ف مصر يا صنديد
و لو فضل فى الدنيا مصرى وحيد
رح يرفعك يا علم يا مصرى أكيد
بكل قلب شجاع و زند حديد
اثبت مكانك فوق علالينا !
فوق كل قمة من جبال سينا !
و على العريش رفرف و كون زينة !
و اكتب فى كل قصيدة سطر جديد .

[&& اشكوزا &&]

القمـــــــــــــح

القمح زى الدهب بينادى شرشرتك
و زرعة القطن مسِتنيه منقرتك
و جاموستك الحلوة يم المسقه و بقرتك
لازم لهم حضن و الا اتنين حشيش أخضر
و تجيبهم الدار و تتعشى فى مندرتك

يا عازق الأَرض مين غيرك حايرويها
يا زارع الغلة يا منبّت تقويها
مين اللى حا يضمها و الا يدريّها
لو كنت ما نتاش هنا لا قدر الله يومد
و مين حايعلف بهايمك و الا يسقيها

يا بو العيال العيال ع الفرن نعسانين
حاضنين يا بو العيال حايقوموا فرحانين
لو كنت ما نتاش هنا لا قدر الله يوم
كان مين ح يفرح قلوبهم بالمحبة مين

ليام دى ع الجسر بتفوت ناس ما هيش منا
تقلَّع الزرع و تبهدل فى نسواننا
و تخطف اللقمة من أولادنا و تهيننا
و كل ما يفوتوا تحصل معركة حامية
و نصبح و الشهداء فايتيننا
ليام دى ع الجسر بيفوتوا انجليز أنجاس
سايبين بلادهم و جايين يدبحوا فى الناس
ما يعرفوش السلام و ما يعرفوش الناس
بيحرتوا بالسيوف و بيزرعوا فى الدم
صدق اللى قال مجرمين لم عندهم إحساس

لو كنت عايز تعيش فى سلام و حرّية
لو كنت عايز تعيش للزرع و الميه
لو كنت عايز تعيش و تربّى ذريه
قوم طهرّ البر بالخنجر و بالمدفع
من جنس دوده انجليزى فى أَرض مصريه

[&& اشكوزا &&]

ألفية ابن دنلوب

(1) ألفية خفيفة المسالكِ ،
أصعب من ألفية بن مالكِ .
(100) بالانجليزى يا شهاب الدينِ ،
اكتب من الشمال لليمينِ .
(200) و العربى يا طلب المعالى ،
فاكتب من اليمين للشمالِ .
(300) معلومة و الجمع معلومات
العلم ، لا دلع و مفهومات .
(400) اعلمهنا ، و نحن عند الشطَّ
أهم شئ هو حسن الخطَّ .
(500) السنَّ ضع فى الحبر ، و احذر البقع .
إذ ربما فوق الكراريس تقع .
(600) باشكاتباَ هو الذى نريد ،
مواظباَ ، سلوكه حميد .
(700) باشكاتباَ ، إن كان فى الديوانِ ،
أو من رجال الطب و البنيانِ .
(800) العلم يا مولاى للتوظفِ ،
لا يا جعِلت فداك للتفلسفِ .
(900) يقولها العلامة بن دنلبِ،
و ليس يبغى قط أى مكيبِ ..
(1000) فهل الذى كان زمانا قد جبّر؟ ..
و المبتدأ لوجاء ، هل يأتى الخبّر ؟ ..

[&& اشكوزا &&]

الملكـــــــــــــــــــوت

نظرت فى الملكوت كتير و انشغلت
و بكل كلمة ( ليه ؟ ) و ( عشانيه ) سالت
أسأل سؤال .. الرد يرجع سؤال
و أخرج و حيرتى أشد مما دخلت

عجبى

خرج ابن آدم م العدم قلت : ياه
رجع ابن آدم للعدم قلت : ياه
تراب بيحيا .. و حى بيصير تراب
الأصل هو الموت و الا الحياة

عجبى

ضريح رخام فيه السعيد الدفن
و حفره فيها شريد من غير كفن
مريت عليهم .. قلت يا للعجب
لاتنين ريحتهم فيها نفس العفن

عجبى

و الكون ده كيف موجود من غير حدود
و فيه عقارب ليه و تعابين ودود
عالم مجرب فاتو قال سلامات
ده ياما فيه سؤالات من غير ردود

عجبى