اليوم المفتوح فى قناة المهيسين ...
نبدأ فقرات يوم المهيسيين المفتوح مع الفيلم الكوميدي الجديد ( روميو وجوليت 2010)
روميو : بحبكِ يا بت يا جولييت .. ونفسي أخرج معاكي ونتمشى شوية على الكورنيش . ( واد صايع برضه )
جولييت : آه وناكل سميط وجبنة ..
روميو : بصراحة حنتمشى بس أصلي لسه مش لاقي شغل .
جولييت : طيب وأخرة الحب ايه بقى يا سي روميو .
روميو : عادي بقى نقضي وقت ظريف ، ونتفسح وابعت لك مزد كول .
جولييت : بص بقى من الأخر عندك شاليه في مارينا .
روميو : لا
جولييت : عندك عربية شيروكي
روميو : لا
جولييت : يبقى يا حبيبي تركن على جنب .. سلاموز .
روميو : رايحه فين يا بت ؟
جولييت : بت في عينك .. انا رايحه اتجوز ابن عمي ، قال كورنيش وسميط وجبنة قال .
روميو : جولييت . جولييت .
جولييت : وعاملي سي روميو ، انت كفاية عليك البت فتحية الشغالة .
وذهبت جولييت لتتزوج ابن عمها .. أما روميو قعد يدور على شغل وبيحاول دلوقتي يكون نفسه بس للأسف .. قدامه مش اقل من خمسين سنة .
فاصل ونواصل .. واسيبكم شوية مع نكت سريعة
مره واحد تعب من المشى طلع يجرى
مره سواق تاكسي داس بنزين موته
مدير مدرسه عمل فرح وزع على المعازيم ارقام جلوس
واحد اتجوز واحد اسمها نعمة باسها وش وضهر
مره واحد فتح الثلاجه لقى الجيلى بيرتشع قال له ماتخافش انا ها اشرب ميه
واحد سباك نفسه اتسدت الشقه غرقت
مره ديك بيقول لفرخه تتجوزينى قالت له ده ابويا يقطعنى ويعملني بانية
واحد اخذ الدواء قبل ميعاده ليييييييه علشان يفاجى الجراثيم
صاحب محل فيديو جيم مات فكتب على قبره جيم اوفر
بخيل واقف فى البلكونه ابنه جاى من بعيد يقول با با با با قال له يا كلب بابا واحد كفايه
بخيل اتجوز بخيله جابو بنت سموها حصاله
عدنا من الفاصل مع مسلسل علاء الدين في قسم الشرطة
الضابط : أنت يا بني بتستعبط .. بتسرق أرض الدولة .. أنت فاكرها ايه سايبة ..
علاء الدين : ارض ايه اللي سرقتها .. مش فاهم
( الصول ضربه حتة قفا ) : كلم البية عدل يا مشبوه .
علاء الدين ( وهو بيحسس على قفاه ): هو أنا عملت حاجة ، ما تفهمونا يا جدعان .
الضابط : الناس الصبح لقت قصر كبير في المنطقة ، وعرفنا انه قصرك .. ازاي بقى يا شاطر تسرق ارض الدولة علشان تبني قصر ، وكمان مش مطلع رخصة .. ده انت هتروح في داهية .
الصول بيضربه على قفاه تاني ) : يا سارق اراضي الدولة .. يا لص .
علاء الدين : يا بيه القصر ده اللي بناه العفريت بتاع المصباح السحري .
الضابط : يا سلام .. وانت ازاي تقول له يبني حاجة من غير ترخيص من الحي .. انت بتستعبط ياض .
علاء الدين : طيب وانا مال اهلي ، العفريت قال لي نفسك في ايه ؟ قلت له قصر كبير ..حتى خد اسأله اهو ..
الضابط ( بعد ما خد المصباح ) : المصباح ده هيتحرز وهتتعرضوا أنتم الأتنين على النيابة بكره الصبح .. جره يا حضرة الصول على التخشيبة .
الصول ( بعد ما جره من قفاه وضربه بالشلوت ) : قدامي يا متهم على التخشيبة ، ده هيطلع عين ...... ( عبارة محذوفة )
علاء الدين : والله مظلوم .. العفريت هو السبب .
طبعاً علاء الدين بعد ما أتعرض على النيابة ، صادرو القصر بتاعه ، واتسجن يا عيني ( بس عارفين المصباح السحري راح لمين ؟) هههههههههههه أكيد عرفتوه .
فاصل ونواصل مع برنامج لقاء مع الشباب
المذيعة : ازيك عامل ايه ؟
الشاب : وانتي مالك؟
المذيعة : ممكن نتعرف بأسمك ؟
الشاب : لا .
المذيعة : ايه رأيك في شباب اليومين دول ؟
الشاب : الحمد لله بيسلموا عليكي .
المذيعة : بتقابلك مشاكل في الحياة ؟
الشاب : بصراحة اه ، عندي مشكلة ومش لاقي لها حل ؟
المذيعة : ايه هيه ؟
الشاب : ازاي اخلص من رغيك ؟
المذيعة : شارك معانا وهسيبك تغور في داهية .
الشاب : طيب اتنيلي اسألي .
المذيعة : سمعت عن غلاء الأسعار ؟
الشاب : اه طبعاً .. دي علبة السجاير غليت ربع جنيه حتة واحدة .
المذيعة : هو انت مش بتشتري غير السجاير بس .
الشاب : لا ازاي بقى .. بشتري كبريت طبعاً .
المذيعة : طيب والمواصلات والأكل والحاجات دي ؟
الشاب : لما الواحد يبقى يلاقي شغل الأول ، يدور على الرفهيات دي .
المذيعة : طيب وليه مش بتشتغل ؟
الشاب : يا ستي هي البلد فيها شغل .. في سره ( ده ايه البلاوي اللي بتتحدف علينا دي )
المذيعة : طيب مفكرتش في حل ؟
الشاب : آه طبعاً فكرت وقررت .. هسافر كولالمبور .
المذيعة : اشمعنى كولالمبور بالذات ؟
الشاب ( وهو بيضربها بالبوكس ) : علشان هناك مش هشوف شكل أهلك .
وإلى لقاء آخر إن شاء الله
رد مع اقتباس
المشاركة الأصلية كتبت بواسطة ezzat2007
.gif)
المفضلات