بياع ماسكات masks

[&& اشكوزا &&]

بياع ماسكات
ماسكات ماسكات
علي أعلي موضات
قرب واشتري
احسن ماركات
ماسكات ماسكات


عندي ماسك
فرحان وبشوش
بعيون جذابة
وسن بيضحك
يداري دموعك
يخفي خضوعك
يجعل منك شخص جديد
بقلب حديد
تظهر بين الناس طرزان
وانت جبان
يسقيك كاس القسوة حنان
يجعل صخر الحب لبان
بس كمان
الماسك اكيد فيه نقطة ضعف
انه بيدوب وقت الصدمات
واسألني أنا
ماهو اصل انا
بياع ماسكات


وانتي كمان ليكي عندي هدية
تخلي جمالك زي السكر
ماسك جميل بخدود وردية
وعين جذابة وننها اخضر
تظهري بين الكل ملاك
وبنت وزير
وانتي اصل ابوكي سباك
وبتاع بوابير
تكدبي ع الكل براحتك
تلقي الناس بدوب في صراحتك
بس في ثانية هايقع الماسك
وتلقي ضميرك جواكي مات
واسأليني انا
ماهو اصلي انا
بياع ماسكات


بقالي سنين بياع ماسكات
شوفت كتير م الناس حكايات
دة بيألف
ودة بيلحن
ودة بيقسم ع النغمات
اديك الماسك واشوفه عليك
واشوفه لفين كدبه يوديك
تبكي ودمعك تحت الماسك
تضحك ضحكك تحت الماسك
ولما ياحلو تسوق في الغش
هاتلقي الماسك لوحده يكش
وتبقي قصادي عاري الوش
اسيبك انا من غير كلمات
واسألني انا
ماهو اصلي انا
بياع ماسكات


ابيعه ياناس وماحبوش
واحب اللي مايلبسهوش
اصله وسيلة لكشف الغش
للخداع ابو 2000 وش
أما الأصل ابو قلب صريح
بيبكي كل مايبقي جريح
واما يكون مديها تفاريح
ترن ياناس صوت الضحكات
مش برضه احسن م الماسكات؟!!

[gsm.magic]

موضوع في قمة الروعة

[Raul]

الله على جمال لامك وتعبيره
دى مكنش المفروض تاخود المركز التانى
دى الاول بدون منازع
والله غايه فى الروعه والابداع

[HOBA_A0]

موضوع رائع
تسلم ايدك

[Jine]

شكراً لك على الموضوع الجميل يا غالي

[&& اشكوزا &&]

نورتوني والله

[EXplORer_70]

انا مش عارف ارد واللهى

لسانى عجز عن التعبير

[&& اشكوزا &&]

حبيبي وحيد
مرورك كفاية

[قرتاشي]

موضوع رائع من شخص اروع

[&& اشكوزا &&]

شكرا حمادة علي مرورك