قائمة الاعضاء المشار اليهم

النتائج 1 إلى 2 من 2

الموضوع: جواب بالليد

  1. #1
    .: جيماوي فعال :.
    الصورة الرمزية الملثم

    الحالة
    غير متواجد
    تاريخ التسجيل
    Aug 2009
    المشاركات
    246
    الشَكر (المُعطى)
    147
    الشَكر (المُستلَم)
    230
    الإعجاب (المُعطى)
    0
    الإعجاب (المُستلَم)
    0
    غير معجبون (المُعطى)
    0
    غير معجبون (المُستلَم)
    0
    تم تذكيره فى
    0 مشاركة
    تمت الاشارة اليه فى
    0 مواضيع
    معدل تقييم المستوى
    57

    Smile جواب بالليد

    جَوَابْ باللَيدْ
    !!... بِدُونْ عُلْوَانْ
    عَليكُم الله يَا الرّاحْلِينْ
    ويَا مْسَافْرِينْ
    ويَا الدَّاجِّينْ
    ويَا الشَّاقِّينْ
    !!..بطوُنْ التِّيهْ ومَا عَارْفِينْ
    سَلاَمِى كَتِيرْ
    تَشِيلوُهُوا
    وفِى أطْرَافْ
    كُفَانَتكُمْ تَصرُوّهُوا
    تَودُّوهُوا
    وتَدُّوهُوا
    لِحَد الزّينْ بنَيَّةْ شيخْنَا إسْمَاعِينْ
    سَلاَمْ سَنَتينْ
    سَلاَمْ عُمْرَنْ
    صِبِحْ يَايُمَّه لاَ يَسْوَىَ
    بِقىَ بَاهِتْ
    خُطُوطْ مَطْموُسَة
    فُوقْ لوُحْ الزَّمان
    مَمْسوُخَة
    مَابِتْبينْ
    مَا بتَنْشَافْ
    معَدْ زُولَنْ
    يَتَبِّنْ فِيَها بالايدينْ
    عَليكُمْ الله يَا مْسَافْرِينْ
    ويَا الدّاجِّينْ
    أَنا مُشْتَاقْ
    وَكَايِسْ أمِّى يَا رَاحْلِينْ
    لَوْ لِى لَحْظَةْ
    لَوْلِى ثَانْيَة
    بَسْ أدُّونِى
    رَمْشَةْ عِينْ
    فِى حَدّ الزّينْ
    بِنَيَّةْ شيخْنَا إسَْماعِينْ
    عَشَانْ
    طَوّلْتَ
    مَارَسَّلْتَ
    مَا سَطَّرْتَ
    حَتَّى
    انْ كَانْ
    جَوَابَنْ فِيُه لَوْ سَطْرينْ
    لحَدّ الزّينْ
    بَوَصِّيكُمْ
    وَعضارِفْ أمِّمى رَاجْيَاكُمْ
    عَشَانْ تِتْنَسَّمْ الأخْبَارْ
    بِتَنْشِدْكُمْ
    تَنَاشِدْكُمْ
    تَحلِّفْكُمْ
    وَمَا بْتِرتْاَحْ
    إلأّ إنْ قُلْتُوا
    موُ أسْمَاعِينْ
    قِريبْ
    جَايِّيكىِ ..يَا حَنّينْ
    وُ قُولُو ا ليهَا
    يَومْ قَايْمِينْ
    جَابْليِنَا السَّلاَم بالكُومْ
    خَسَاره جَوَابُه مَا مَخْتُومْ
    وَ كَانْ
    قِدَّامْنَا بِحْلِفْ بِيكْ
    وَقَالْ
    يَا وَالْدَة مَا نَاسِيكْ
    !! وَكِيفْ سَنْسَاكْ..؟
    وَ حَتّى انْ كَاسُه
    مَا بِيْقدَرْ
    لأنُّه حَنِينْ
    وَشُوقْ ضَايِعْ
    كَدٍى شُوفيهُو
    عَايِشْ فِيكِ يَا حَنّينْ
    كَلامْ
    قِدّامْنَا نِحنْ ..كُتَارْ
    كَلامْ
    مِنْ قَلْبُه كَانْ بيَقُولوُ ..
    مَا هُو هِزَارْ
    حُروُفَنْ
    شَارْبَه
    مِنْ لهَبْ الحَنينْ الحَارْ
    كَلامْ مِسْكِينْ
    عَلى دَرْبَ الضيَّاعْ مُحْتَارْ
    كَمَانْ
    قُولوُلهَا ..يَا مْسَافْرِينْ
    عَدِيلْ
    شُفْنَاهُو
    وَدَّعْنَاهُو
    خَليّنَاهُو
    سَتَّفْ عَفَشُو
    مِنْ بَدْرِى
    ومِنْ سَنَتينْ
    خَتَم تَسْرِيحُو
    مِنْ سَنَتينْ
    عَشَانْ جَايِّيكِى يَا حَنّينْ
    ومِن سَنَتينْ
    عَلَى دَرْبَ الرَّحِيلْ قَاعِدْ
    يَلَوِّحْ
    دِيمَه لِلرَّاحْلِينْ
    يوَدِّعْ دَيلْ
    يوَصِّيهمْ يَواعِدْهمْ
    وَلَحْظَةْ جَيْتُو مَا بتْطُولْ
    قَرِيْب وَاَعِدْ
    وَ شَادِدْ نُوقُو
    مِتْجَهِّزْ عَشَانْ صَاعِدْ
    وَكَايِسْ رِفْقَه
    لِلدَّرْبَ الطَّويلْ الشِّينْ
    كَمَانْ
    قُولُولهَا ..يَا مْسَافْريِنْ
    قَوافِلْ النَّاسْ
    تَجِى وتَروُحْ
    ومَشْدُوهِينْ
    وَ أنا مِنْ شَدْهَتُنْ
    مَشْدُوه
    قَدُرْ
    بَاصَرْتَ مَا قَادِرْ
    ألاَقِى
    فِريقَه قَدْرَ الرُّوحْ
    وَ خَايفْ ..يُمَّه
    لَوْ سَافَرْتَ
    مِنْ دُونْ رِفْقَة
    مِنْ دُونْ نَاسْ
    بطِشْ
    عَارْفَانىِ يُمَّه بَرُوحْ
    وَاتُوه
    فى العَتْمهَ
    وَينْ ألقاكِ ..يَا حَنّينْ ؟؟
    وعَارْفِكْ
    يُمّه خَايْفَه ..عَلَىْ
    ورَغْم الشّيبْ
    تَلوُلينى
    وَ فى حِجْرِكْ
    بَنُومْ يَا يُمّة
    تَفْليِنىِ
    تَخَالِينى
    تَحَجِّينى
    وَ اتُوهْ فى حِضْنِكْ الدَّافِى
    وَ ارُوحْ فِى عَالَم الأفْرَاحْ
    وَ اعُودْ مِنْ تَانِى
    زَىْ مَا كُنْتَ
    أبْقَى ..جِنَىْ
    وَصِيْتِكْ يُمَّه
    فى أعْمَاقِى ..بِتْزَغْرِدْ
    تَولْوِلْ
    فىِ مَسَارْب الرُّوحْ
    كَأنهَّا
    رَعْشَةْ التِّيَارْ
    وَصِيْتِكْ
    لَىْ أرافْق النَّاسْ
    رِفقْةَ النَّاسْ
    بِتْكَسِرْ حِدَّةْ الأسْفَارْ
    حَتَّى انْ كَانْ
    رُكُوبىِ قِطَارْ
    وَخَلّى اللّيلْ
    وصَيِتِْكْ
    !! لَيَّه ..حَتَّى..نَهارْ..
    مِن (( السَجَّانَه))
    تَبْرِينِى
    نَتْقََاوَدْ
    تَقَادْمِينِى
    تَوَصِّينِى
    وَتَانِى جَدِيدْ تَوَصِّينِى
    وَتبْكِى كَتِيرْ
    كَتيِرْ وَ غَزِيرْ
    عَشَانْ مُشْوَارى..
    لِى مُكْوِارْ..
    وكيفْ
    يَايُمَّه عَادْ أقْدَرْ
    أسَافِرْليكِى
    فِى بَحَرَنْ
    وَسِيعْ هَدَّارْ
    وشِى مَجْهُولْ
    وَحَاتِكْ يُمَّه
    لاَ بِنْطَاقْ وَ لاَ بِنْدَارْ
    بَخَاف
    رِيحْ العَدَمْ
    يا يُمَّه فِى الأغْوَارْ
    بَخَافْ يَايُمَّه
    أصْلِى بخَافْ
    مِن الأَقْدَارْ
    بَخَافْ الجَّنَّة ..يَايُمَّه
    وخُوفِى كَتِيرْ
    مِن الأَهْوَالْ
    وصُوتْ الصَّاقْعَة
    !!.. جُوَّة النَّارْ
    بَخَافْ
    مِنْ أَيّى
    شِى بَعْدِكْ
    بخَافْ الغُرْبة
    لَمأّنْ عَشْعَشَتْ
    !!..فِى الدَّارْ
    وَانْتِى تَعَرْفى يَا حَنّينْ
    لأَنِّكْ سَيْدَة العَارْفيِنْ
    مَا وَرُّونَا
    مَا قَالُولْنَا
    !!.. رَايْحيِنْ وينْ
    وَمَا دَامْ
    السَّفَرْ يَا يُمّه
    مَافِى اللِّيدْ وَ مِتْعزِّرْ
    وعُزْرِى شَدِيدْ
    وريدى أشَدَّه
    يَا يُمَّه
    دَا ..سيلَنْ
    فِى عَضَاىْ يِهْدِرْ
    وانْتِى
    تَلُومى يَا يُمَّه
    وَ دَايْرة جَوَابْ
    يَكُون
    إنْ شا الله مِنْ سَطْرينْ
    أرَسِّلْ ليكِى
    عَادْ
    !! بى .. وينْ ..؟
    عَِى لُوحْ الزَّمَانْ
    يَايُمّه
    !!. مَا مَكْتُوبْ عَلاَوِينُنْ
    وحَلاَّ لْكُنْ
    عَلِى الأبْعَادْ
    دِى مَا مَعْروُفه
    هَلْ مِنْ طِينْ
    وَ الاّ قصُورْ
    مِن الإبْرِيزْ
    حَدِيدْ مَنْسُوجْ
    !!.. دَرَابْزِينُنْ
    عَدِيلْ
    إحْتِرْتَ فِى أَهَلَنْ
    بِقُوا
    مَا هُنْ
    ومَاَ يَا هُنْ
    وشِيتَنْ تَانِى
    إخْتلَّتْ مَوَازِينُنْ
    قَوانِينْ أرْضَنَا
    وَا ..حَسَْره
    !!.. مَا عَادَتْ قَوانينُنْ
    ونَاسْ
    زَىْ ديلَه يَا حَنّينْ
    حَنَعْرِفْ كيفْ
    !!؟.. عَلاَوِينُنْ
    وفُوقْ الفَانْيَة
    مَا خَلُّولْنَا
    أيّى عَلاَمة
    تَبْقَى دَلِيلْ
    وايهْ بِيَفِيدْ
    ونِحْنِ ننوُحْ
    نَجَقْلِبْ
    !!.. فُوقْ قُفَاصْ طِينُنْ
    سُؤَالْ حَيَّرنْىِ
    وَ الأَفْكَارْ
    تَفُورْ
    فِى جُوفِى تَدَفِّقْ
    تَقُولْ تَنوُّرْ
    وتَانِى تَفُورْ
    !!..مِنْ الخَمَدَتْ بَرَاكِينُنْ
    ولَماَّ غَلَبْنَا يَا حَنّيِنْ
    ومَا قَادْرينْ
    نَدَارِى غُلُبْنَا
    مِنْ شِيتَنْ وَرَانَا
    نِحِنْ مَاَ شَايْفِنُّه
    مَا مَنْظُورْ
    يَحِزْ بِى سيفهُ
    !!.. فِينَا غَلَبْنا
    كُنَّا الحِيره
    وَ الحَايْرينْ
    وَقَفْنا عَليهَا مَغْلُوبِينْ
    ومَغْلُوليِنْ
    وَ مَشْدُهِينْ
    قُفَاصَةْ طِينْ
    نَقُولْ للدِنْيا
    !!.. حَالْ الدُّنْيَا يا حَنّينْ
    وَلَىْ سَنَتين
    أفَكِّرْ فيكى
    لاَ كَلّيتْ لاَ مَلَّيت
    لَىْ سَنَتينْ
    أفكِّر فِيكىِ
    فى ضُلْ الزَوَالْ قَاعِدْ
    كأنَى كَسِيحْ
    بَعِيدْ
    مِن نَاسِى مِتْباعِدْ
    تَسَابِيحْ
    هَايْمَه زَىْ النُّورْ
    تَرَفْرِفْ
    !!..فِى قَلبْ عَابِدْ
    وَأحْقَادْ
    الحَيَا ..جَمَدَتء
    بِجوُفْ الضُّلْمَة
    فى الحَاقِدْ
    أنَا يَايُمَّه مَا عَارِفْ
    أنَا غَايرْ
    معَ الأَغْوَارْ
    !!؟..عَلِى ضَهَرْ الرِّيَاحْ صَاعِدْ
    أَنَا
    يَا يُمَّه يَا حَنِّيِنْ
    هَمُودْ
    فِى لُجَّةْ المَجْهُولْ
    وألاّبَكُونْ
    دوى الرعد
    فى الراعد
    وَحَاتِكْ
    إنْتِى مَا عَارِفْ
    وَكُلَّ العَارْفُه يا حَنيّنْ
    وَحَاتِكْ إنْتِى
    لَىْ ســَنَتَيْن
    وفىِ ضُل الزَّوالْ قَاعِد
    أكُورِكْ
    دِيمهَ للدَّاجين
    للرَّاحْلِينْ
    !!.. عليكم الله يا مسافرين
    عندى جواب
    فردْ ويحيد
    عشان تدوهو
    لى واحد
    جواب بالليد
    بدون عنوان
    عشان تدوهو
    حد الزين
    بنية شيخنا إسماعين
    وأصيح يا يمه
    زى مصيوب
    ومانى شديد
    عليكم الله يا الداجين
    فرد ويحيد
    عشان حنين
    !! فرد ويحيد
    يا مسافرين
    فرد ويحيد
    عيونن يمه
    مشدوهات
    ومشدودات
    وما شايفين
    وما عارفين
    !!.. حكاية الليد
    واصيح يا يمه من تانى
    وحاتك تانى
    !!..تانى جديد
    يا الداجين
    جواب بالليد
    !!.. عديل بالليد
    ويضحكوا يمه
    زى مصيوب
    يخلخل
    !!..فى حديد القيد
    وانا مبهور
    انا مبهوت
    !!..ومانى شديد
    قعدت ابكى
    والفايتين
    وحاتك يمه
    كان ..فايتين
    !!..جوابى أبوهوا..يا حنين
    الداجين
    !!..الفايتين..الرايحين
    يقولوا ليه
    لو فكرت
    لو شاورت يا مسكين
    لو بالليد
    ما سافرنا
    !!..من الدنيا لو بالليد
    لو فى ايد
    وعندك ايد
    !؟.. ليه سمونا فيها عبيد
    تصور
    إنه كان فى ايد
    وحد الزين تسافر
    فى دريبن شين
    كدى عاين
    وشوف القدرة
    !!..كيف بتكتف الليدين
    وقفة على قبرفنان حى
    صوت الشوق
    فى نص الليل..ينادينى
    يجابدنى
    ويصحينى
    يضحكنى..يبكينى
    يأسينى..يواسينى
    يشلنى يفوت
    يفوت
    ويفوت
    على جنحين من الأنوار
    لعالم ..ما عوالمنا
    يقالدنا ويخاصمنا
    يحاربنا ويسالمنا
    يحاسبنا
    يعاتبنا ويعاقبنا
    عوالم..فوق
    متاهات كلها أسرار
    عند نهاية المنهى
    يبدا دريب
    جديد
    وغريب
    ومامنهى
    !!؟..يقودك وين
    يوديك وين
    إنت الواقف الماشى
    تحس الشى
    يكون ..ماشى
    وانت تكون
    تكون يافى
    ومرة تكون
    !!..تكون مافى
    تشيل الكون
    بأعماقك
    ونور القدرة
    مبهول
    جُوة أحداقك
    ولا يُمكن
    وما ممكن
    تمد إيديك
    تكشف ما ورا الأستار
    هناك ..الكون
    هناك
    سرأً غميس
    مكنون
    فى جوف القدرة
    والأقدار
    هناك
    ما بيلحقنه..ظُنون
    تشابى الروح
    تشابى
    تهاتى..للبيكون
    حليل
    وقفة غريب
    مشدوه
    محل قبل
    يلاقى غريب
    وكل لحظة
    بشوف أغرب
    يتحسر
    على نفسه
    على ذاته
    ومن حالاته يتعجب
    طير محبوس
    ومسدود
    جُوه جوه
    اقفاص
    يفتش لى طريق يهرب
    هناك
    عجايب الأعجب
    وشى مجهوا
    كان..مبهول
    تعاين
    فيه تستغرب
    تدور توصل
    وفى لحظة ضعف
    تضهب
    ومرات
    تفصلك أشبار
    ومن دونه الخيال يتعب
    هناك
    عرفت
    سر الراحوا
    والجايين
    دريب
    نمشيهوا ..متساوين
    خطيوه
    خطيوه نمشيهوا
    نجر كرعينا
    حفيانين وتعبانين
    وكلنا فى الدرب ماشين
    وتعبانين
    المنفوخ
    بجاه الدنيا والمسكين
    مع الساكنين
    قصور شامخات
    وقايلين
    فى الحيا ..خالدين
    حليل الكانوا مغشوشين
    وما قايلين
    بأن الزول خلاصة طين
    وداك الحين
    يبق النور
    وتتعرى الحقيقة
    المرة للعينين
    أتاريك
    كنا ..عميانين
    وكنا فيها بالايجار
    وفوق
    !!؟.. درب الهلاك..طاشين
    وداك الحين
    حقيقة الأمر لينا يبين
    وحاتكن
    انتو يا السامعين
    داك الحين
    ما بتشفع
    قصور شامخات
    وبرضو
    كمان بيوت الطين
    وأصحاب
    الحرير والجوخ
    !! بدار الآخره عريانين
    هناك أعمال
    هناك أفعال
    يوم
    الموج يلاقى الموج
    وفى
    بحر العرق خايدين
    حليل الدنيا
    هادى الدنيا
    لمان
    !! نسكن الأشبار
    هناك
    عرفت
    يا سراً عجيب وغريب
    بذور
    تبذر برحم الغيب
    تخدر
    فى اليباب وتجيب
    برحم الغيب
    تجابه الريح
    تلاوى الريح
    ويمشى الريح
    يولول
    فى الدروب ويصيح
    شتيلة القدرة
    تكسر حدة الإعصار
    وياما بذور
    تموت
    فى التربة
    ياما بذور
    تحن للموية
    كايسة الرى
    وفوقها تزغرد الأمطار
    وشن بنقول
    كلامنا
    الهايف المعسول
    لسانا سنين
    سنين ودنين
    وديمة..يطول
    وشوف
    نادونا
    !! قالوا..الزول
    !! هوى يا زول
    اذا
    طعنتنا بس..بس شوكه
    شن بنقول
    يا الله.. ويا الله
    !!.. وديك اللحظه نطرى الله
    ننادى
    نهاتى من اعماقنا
    !!.. يا ستار ويا ستار
    تعالوا
    أقيفوا يا الماشين
    وما عارفين
    دريب الحى
    أصلو الموت ..دريب الحى
    كان فى الوادى
    أو فى الصى
    لا بفرز
    ولا بيعرف كبير وصبى
    حتى الجاهل
    البتاتى
    !!..لسه..جنى
    الولنه
    ناس أماته
    داخرتنه
    راجياتنه باكر ضى
    يكشف الغمه
    يبرى الزمه
    بين اخواته
    يكبر بكرة يبقى أخى
    شن بنسوى
    ديك
    ساعة البريده الحى
    ونحن علينا
    ووب واحى
    وما ممكن
    ولا يمكن
    أحد يفلت من الأقدار
    مصير محتوم
    اذا كُسناه
    !!أو درناه ما بنلقاه
    أوحاولنا
    يوم نهرب
    محل قبلنا
    ماشى معانا
    شادى رحاله ما بتعب
    وما بيضهب
    اذا إندسينا
    حشرنا ذواتنا جوه أحجار
    حيوصل يوم
    بشيش يوصل
    اذا صاحين
    اذا نايمين
    اذا ماشين
    اذا قاعدين
    حتى ان كنا
    فى جوغ الحرير راقدين
    والانحاحى
    خايدين طين
    !!؟.. يجيك من وين
    !!..ما معروف يجيك من وين
    منو
    !!؟.. البشوفو راى العين
    براهو
    بيعرف المقصود
    دا
    سر الواحد المعبود
    يفوت مرضان
    مرضان ومتحدر
    يجى لى زول
    !!..لضيد وشديد ومتقدر
    يناطح الصخر والأحجار
    يفوت دى الدار
    ويدخل بعدها ..دى الدار
    وزى ما قلت
    كان
    ناس أحمد الطيبين
    وفنانين
    حروف منحوته
    فوق
    لوح القدر قاعدين
    يغنوا الليل
    يهجموا الليل
    وتسمع صوته
    شاقى الليل
    يقول ..ياليل
    (يا رايع جفيتنى
    وأنا ضايع..تعالى لى..يا رايع)
    وكان
    ناس أحمد الحلويت
    وفنانين
    مع الحلوين
    ودا المقدور
    وكان لابد
    تشوفوا العين
    وهبت
    ريح من المجهول
    وشالت
    احمد المعروف
    وما مجهول
    فروع ..وأصول
    شن بتقول
    !!؟..وشن ..بنقول
    حفيف كان
    رهيف كان
    ضعيف كان
    ويا ما كان
    ويا ما كانوا فانين
    وجاهو الريح
    وشالو الريح
    !!.. عليك يا الله سافر وطار
    ونفضل نحن يا أحمد
    وراك تايهين
    تعبانين وفنانين
    وما عارفين
    متين نلحق
    قوافل الراحو والراحلين
    ولا بديوم
    مصيرنا نجيك
    وبعدنا ناس
    على درب الضياع ضايعين
    وفنانين
    يقيموا الحزن والتأبين
    وزى ما انتو
    زى ما نحن
    هم بيروحو فنانين
    ويفضل شى
    وحيد خالد
    وراكا ورانا
    يا احمد
    حروف المغنى والأشعار




    التعديل الأخير تم بواسطة EXplORer_70 ; 20-12-2009 الساعة 10:04 AM
    لاتكن كالدخان يعلو إلى طبقات الجو وهو وضيع

    http://img197.imageshack.us/img197/6134/283967914.jpg

  2. #2
    صديق المنتدى
    اسم المحل
    كامتشو
    الصورة الرمزية EXplORer_70

    الحالة
    غير متواجد
    تاريخ التسجيل
    Dec 2008
    الدولة
    GeM-FlAsH
    العمر
    32
    Sonork
    100.1607685
    Phone
    iphone 7S
    المشاركات
    17,436
    الشَكر (المُعطى)
    18065
    الشَكر (المُستلَم)
    26630
    الإعجاب (المُعطى)
    13
    الإعجاب (المُستلَم)
    86
    غير معجبون (المُعطى)
    0
    غير معجبون (المُستلَم)
    0
    تم تذكيره فى
    2 مشاركة
    تمت الاشارة اليه فى
    648 مواضيع
    معدل تقييم المستوى
    893

    افتراضي رد: جواب بالليد

    شكرا لك احى على الموضوع


    سبحان الله
    وبحمده سبحان الله العظيم

الكلمات الدلالية لهذا الموضوع

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •