قبل اى حاجه انا مش من مؤيدى البرادعى
عشان مش الاقى واحد يقولى انتا بتعمله دعايه ويعترض وخلاص الى اخره من المداخلات
في احد الايام كنت جالسا مع احد اصدقائي نتحدث في الامور السياسية وتطرقنا في حديثنا الى شخصية د\البرادعي...و فجأة انفعل صديقي واخذ يكيل للبرادعي بكل اصناف الشتائم والاتهامات (دة عميل وطول عمره عايش برة مصر..دة حتي مبيعرفش يتكلم عربي كويس).
قلت...له...هو انت تعرف اية عن البرادعي اساسا؟؟؟.
قالي مش هو دة عالم الفيزياء اللي كان رئيس الوكالة الدولية للطاقة الذرية و اللي كان السبب في احتلال العراق؟؟؟!
...قولتله...ازاي تشتم في شخص لا تعرف عنه ابسط المعلومات؟!يا سيدي الفاضل الدكتور البرادعي حاصل علي ليسانس الحقوق ودكتوراة في القانون الدولي...يعني ملهوش أي علاقة بالفيزياء او الذرة (رئاسة الهيئة الدولية للطاقة الذرية هو منصب دبلوماسي وليس منصب فني)....
وبعدين ازاي واحد عنده ليسانس حقوق وعامل دكتوراة ودبلوماسي مشهور....مبيعرفش يتكلم. عربي ؟! هو بس عنده تأتأة خفيفه في كلامه ودي حاجة خلقية يعني ربنا خلقه كده...انا شخصيا معظم الحروف بايظة عندي.
ده حتى سيدنا موسى كان كده وطلب من ربنا انه يجعل اخيه هارون عونا له في الدعوة لرسالته.. وبعدين تأتأته لم تمنعه من ان يتولي منصب دوبلوماسي عالمي والسبب لأن الدول ده تنظر للكفاءه وليس لأي شيء اخر.
وبعدين تعالي قولي...ازاي هو اللي كان السبب في ضرب العراق؟!انت مشفتش التقارير اللي كان بيقدمها لمجلس الامن بعد كل عملية تفتيش عملها في العراق؟....وتقدر تشوف التقارير دي بنفسك علي موقع اليوتيوب...انا مبجبش حاجة من عندي....كل هذه التقارير تنفي امتلاك العراق لاسلحة الدمار الشامل وبناءا عليه امريكا ضربت العراق بدون غطاء من مجلس الامن وبدون غطاء قانوني يعني بالبلدي كدة امريكا ضربت العراق فتونة مش عشان تقارير محمد البرادعي...وكله موجود علي اليوتيوب وعلي مواقع كتيرة حتي علي الموقع الرسمي للامم المتحدة علي الانترنت.
صديقي سألني...امال ليه كل الناس بتقول عليه عميل؟!
قولتله...طب تقدر تقولي ليه كل الناس كانت بتقول علي الدكتور مصطفي محمود انه كافر؟ وتقدر تقولي ليه كانوا بيقولوا علي ايمن نور انه مزور؟ وليه بيقولوا علي الفنان خالد ابو النجا انه شاذ؟ وليه بيقولوا علي وائل غنيم انه ماسوني؟ وليه كانوا بيقولوا علي الريان انه حرامي؟....الخ.
واللي ماكنوش قادرين يجمعوله تهمة كانوا بيمنعوه من دخول مصر ذي عمرو خالد و الشيخ القرضاوي.
مصطفى كامل عاش اكثر من 16 سنة في فرنسا الم يكن وطني.
غاندي عاش 22 عام في جنوب افريقيا من 1893 وعاد الى الهند 1915.
وجود البرادعي خارج مصر لمهام رسمية لا ينقص من وطنيته و بالمناسبة هو كان يعيش في النمسا وليست امريكا كما يروج البعض. ولايحمل سوى الجنسيه المصريه ومراته كمان من كفر الدوار يعني مننا وعلينا والا يمكن كفر الدوار انضم للاتحاد الاوروبي واحنا مش عارفين. وبعدين احنا خدنا ايه من اللي عاشو في مصر طول عمرهم غير الفساد والقهر والظلم..
وبعدين انت تعرف ان البرادعي كان مساعد وزير الخارجيه اسماعيل فهمي ايام السادات واللي قدم استقالته معاه للسادات اعتراضا على بعض بنود اتفاقيه كامب ديفيد و في الاخر تقول عليه عميل!
للاسف الشديد احنا بقينا زي البغبغنات بنردد الاتهامات اللي كان بيوزعها النظام السابق علي خصومه....الاول عميل والتاني كافر والتالت شاذ والرابع بيبيع قولقاس.
انت مأخدتش بالك لما البرادعي اخد جايزة نوبل كل المسؤلين المصريين اشتغلوا يطبلوله ويهتفوله ويقولوا البرادعي رفع راس مصر لكن لما البرادعي ابتدا يتكلم عن حال البلد المايل كل الناس دى قلبت عليه واتهموه بكل الاتهامات...دول كان ناقص يتهموه انه السبب في الحرب العالمية التانية!
قال تعالى : {يَا أَيُّهَا الَّذِينَ آمَنُوا إِن جَاءكُمْ فَاسِقٌ بِنَبَأٍ فَتَبَيَّنُوا أَن تُصِيبُوا قَوْماً بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ }الحجرات6.
من انا؟
انا شخص مصري عادي لا باكل كنتاكي ولا بحب الاجندات الاجنبية.
اتظلمت كتير ودقت طعم الظلم ومبحبش اشوف غيري مظلوم وعشان مبحبش السلبية كتبت الكلام ده عشان اللي مش عارف يعرف و اللي مش فاهم يفهم.
هل انا هنتخب البرادعي اذا هو رشح نفسه؟.
لا....انا مش هنتخب البرادعي لمجرد انه البرادعي ولا هنتخب عمرو موسى لمجرد انه عمرو موسي....انا هقرا البرنامج الانتخابي بتاع البرادعي وبتاع عمرو موسي وبتاع اي شخص يرشح نفسه للانتخابات ,واشوف الشخصيه القادره على تنفيذ البرنامج وبعدين هقرر اختار مين سواء كان البرادعي او غيره
المفضلات